ആലപ്പുഴ : അമ്പലപ്പുഴയിൽ സ്ഥാനാർത്ഥിയെ നിർത്തില്ലെന്ന് പ്രഖ്യാപിച്ച് യുഡിഎഫ്. സിപിഎം വിട്ട് സ്വതന്ത്രനായി മത്സരിക്കുന്ന ജി സുധാകരന് പിന്തുണ നൽകാനാണ് അമ്പലപ്പുഴയിൽ കോൺഗ്രസ് സ്ഥാനാർത്ഥിയെ നിർത്തില്ലെന്ന് വ്യക്തമാക്കിയത്. നേരത്തെ അമ്പലപ്പുഴയിൽ എം ലിജുവിനെ സ്ഥാനാർത്ഥിയാക്കാൻ ആയിരുന്നു കോൺഗ്രസ് തീരുമാനിച്ചിരുന്നത്. എന്നാൽ ജി സുധാകരൻ സ്വതന്ത്ര സ്ഥാനാർത്ഥിയായി മത്സരിക്കുമെന്ന് വ്യക്തമാക്കിയതോടെ ആണ് അമ്പലപ്പുഴയിൽ സ്ഥാനാർത്ഥിയെ നിർത്തേണ്ട എന്ന തീരുമാനത്തിലേക്ക് കോൺഗ്രസ് എത്തിയത്.
ജി സുധാകരന് നിരുപാധിക പിന്തുണ നല്കാനാണ് കോണ്ഗ്രസ് തീരുമാനിച്ചിട്ടുള്ളത്. ആരുടേയും പിന്തുണ തേടില്ലെന്ന് ജി സുധാകരൻ പ്രഖ്യാപിച്ചിരുന്നെങ്കിലും അദ്ദേഹത്തെ പിന്തുണയ്ക്കാൻ യുഡിഎഫ് തീരുമാനിക്കുകയായിരുന്നു. യുഡിഎഫ് നേതാക്കള് ജി സുധാകരനുമായി ആശയവിനിമയം നടത്തുകയും, പിന്തുണ സ്വീകരിക്കുമെന്ന ഉറപ്പ് ലഭിച്ചതായും സൂചനയുണ്ട്. സിപിഎമ്മിന്റെ എച്ച് സലാമാണ് അമ്പലപ്പുഴയിൽ ഇടതുമുന്നണി സ്ഥാനാര്ത്ഥി. കഴിഞ്ഞ നിയമസഭ തെരഞ്ഞെടുപ്പില് 11,126 വോട്ടുകളുടെ ഭൂരിപക്ഷത്തിനാണ് കോൺഗ്രസ് സ്ഥാനാർത്ഥിയായ എം ലിജുവിനെ പരാജയപ്പെടുത്തി എച്ച് സലാം അമ്പലപ്പുഴയിൽ വിജയിച്ചിരുന്നത്.
