കാൻസർ—പേരുകേൾക്കുമ്പോൾ തന്നെ ലോകം ഭയക്കുന്ന ആ വിപത്ത് ഇന്നും അതിന്റെ സംഹാരതാണ്ഡവം തുടരുകയാണ്. 2026-ലെ ഏറ്റവും പുതിയ കണക്കുകൾ പ്രകാരം, ചികിത്സാരംഗം ഏറെ മുന്നേറിയിട്ടും ചില ‘ക്രിമിനൽ’ കാൻസറുകൾ ഇപ്പോഴും കീഴടങ്ങാൻ വിസമ്മതിക്കുന്നു. അവയിൽ ഏറ്റവും അപകടകാരികളായ മൂന്ന് വില്ലന്മാരെ പരിചയപ്പെടാം:
1 . ശ്വാസകോശ കാൻസർ (Lung Cancer)- ലോകത്ത് ഏറ്റവും കൂടുതൽ ആളുകളുടെ ജീവനെടുക്കുന്ന കാൻസറാണിത്. 2026-ലെ കണക്കുകൾ പ്രകാരം, മറ്റ് പല കാൻസറുകളും ചേർന്നുണ്ടാക്കുന്ന മരണങ്ങളേക്കാൾ കൂടുതൽ ശ്വാസകോശ കാൻസർ ഒറ്റയ്ക്ക് ഉണ്ടാക്കുന്നു. ലക്ഷണങ്ങൾ കാണിക്കുമ്പോഴേക്കും ഇത് ശരീരത്തിന്റെ മറ്റ് ഭാഗങ്ങളിലേക്ക് പടർന്നിട്ടുണ്ടാകും. പുകവലി തന്നെയാണ് പ്രധാന വില്ലൻ. എന്നാൽ വായു മലിനീകരണവും പുതിയ കാലത്തെ വില്ലനായി മാറിയിരിക്കുന്നു. ഈ ക്യാൻസർ വന്നാൽ അതിന്റെ അതിജീവന നിരക്ക് 28 % മാത്രമാണ്.
2. നിശബ്ദ കൊലയാളി: പാൻക്രിയാറ്റിക് കാൻസർ (Pancreatic Cancer)- കണ്ടെത്താൻ ഏറ്റവും പ്രയാസമുള്ളതും ഏറ്റവും വേഗത്തിൽ ജീവനെടുക്കുന്നതുമായ കാൻസറാണിത്. ഈ കാൻസർ ബാധിച്ചാൽ ആദ്യഘട്ടത്തിൽ വേദനയോ ലക്ഷണങ്ങളോ ഉണ്ടാകില്ല. മഞ്ഞപ്പിത്തമോ നടുവേദനയോ വരുമ്പോഴേക്കും സമയം കൈവിട്ടുപോയിട്ടുണ്ടാകും. ഇത് ബാധിക്കുന്നവരിൽ വെറും 13% പേർ മാത്രമാണ് അഞ്ച് വർഷത്തിലധികം ജീവിക്കുന്നത്. അതുകൊണ്ടാണ് ഇതിനെ ഏറ്റവും മാരകമായ കാൻസറുകളുടെ പട്ടികയിൽ ഉൾപ്പെടുത്തിയിരിക്കുന്നത്.
3. യുവാക്കളുടെ പേടിസ്വപ്നം: കൊളോറെക്റ്റൽ കാൻസർ (Colorectal Cancer)- യുവാക്കളുടെ ഉറക്കം കെടുത്തുന്ന വില്ലനായി കൊളോറെക്റ്റൽ കാൻസർ (Colorectal Cancer) മാറിയിരിക്കുകയാണ്. ഒരുകാലത്ത് 50 വയസ്സിന് മുകളിൽ ഉള്ളവരെ മാത്രം ബാധിച്ചിരുന്ന ഈ രോഗം, 2026-ലെ കണക്കുകൾ പ്രകാരം 30-കളിൽ ഉള്ളവരിലും വലിയ തോതിൽ കണ്ടുവരുന്നു. ഭക്ഷണരീതിയാണ് ഇതിലെ പ്രധാന വില്ലൻ. അമിതവണ്ണവും വ്യായാമക്കുറവും ഈ ക്യാൻസർ വിളിച്ചുവരുത്താൻ കാരണമാകുന്നു.
യുവാക്കൾക്കിടയിൽ വർദ്ധിച്ചുവരുന്ന കൊളോറെക്റ്റൽ കാൻസറിന്റെ ലക്ഷണങ്ങളെ പലപ്പോഴും പൈൽസ് അല്ലെങ്കിൽ സാധാരണ ഗ്യാസ് പ്രശ്നങ്ങൾ എന്ന് കരുതി നിസ്സാരമായി തള്ളിക്കളയുന്നത് അപകടകരമാണ്. ആഴ്ചകളോളം നീണ്ടുനിൽക്കുന്ന തുടർച്ചയായ വയറിളക്കമോ മലബന്ധമോ പോലുള്ള മലവിസർജ്ജനത്തിലെ മാറ്റങ്ങൾ ഗൗരവമായി കാണേണ്ടതുണ്ട്. മലത്തിലൂടെ രക്തം പോകുകയോ മലത്തിന്റെ നിറം കറുപ്പായി മാറുകയോ ചെയ്യുന്നത് കുടലിലെ രക്തസ്രാവത്തിന്റെ സൂചനയാകാം. ശരീരത്തിൽ രക്തം കുറയുന്നത് മൂലം അനുഭവപ്പെടുന്ന അമിതമായ ക്ഷീണവും തളർച്ചയും മറ്റൊരു പ്രധാന ലക്ഷണമാണ്. ഇതിനുപുറമെ, വിട്ടുമാറാത്ത വയറുവേദന, ഗ്യാസ് കെട്ടിനിൽക്കുന്ന അവസ്ഥ, വയർ എപ്പോഴും നിറഞ്ഞിരിക്കുന്നത് പോലെയുള്ള അസ്വസ്ഥത എന്നിവയും ശ്രദ്ധിക്കണം. പ്രത്യേക വ്യായാമമോ ഡയറ്റോ ഇല്ലാതെ തന്നെ ശരീരഭാരം പെട്ടെന്ന് കുറയുന്നുണ്ടെങ്കിൽ അത് ശരീരത്തിന്റെ അപകടസൂചനയാകാം. ഇത്തരം ലക്ഷണങ്ങൾ കണ്ടാൽ ഒട്ടും വൈകാതെ വിദഗ്ദ്ധ ചികിത്സ തേടുന്നത് രോഗം നേരത്തെ കണ്ടെത്തി സുഖപ്പെടുത്താൻ സഹായിക്കും.
