വാഷിംഗ്ടൺ : ലോകത്തിലെ ഏറ്റവും കരുത്തുറ്റ അന്വേഷണ ഏജൻസിയായി അറിയപ്പെടുന്ന അമേരിക്കയുടെ ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ (FBI) ഡയറക്ടർ കാഷ് പട്ടേലിന്റെ വ്യക്തിഗത ഇ-മെയിൽ അക്കൗണ്ട് ഹാക്ക് ചെയ്യപ്പെട്ടു. വൻ സുരക്ഷാ വീഴ്ചയാണ് സംഭവിച്ചിരിക്കുന്നത്. ഇറാനിയൻ അനുകൂല ഹാക്കിങ് ടീം ആണ് എഫ്ബിഐ മേധാവിയുടെ ഇ-മെയിൽ ചോർത്തിയത് എന്നാണ് വിലയിരുത്തൽ. ‘ഹണ്ടാല ഹാക്ക് ടീം’ എന്ന ഗ്രൂപ്പാണ് ഈ സൈബർ ആക്രമണത്തിന്റെ അവകാശവാദം ഉന്നയിച്ചിട്ടുള്ളത്. അമേരിക്കൻ നീതിന്യായ വകുപ്പ് ഈ സൈബർ ആക്രമണം സ്ഥിരീകരിച്ചിട്ടുണ്ട്.
കാഷ് പട്ടേലിന്റെ വ്യക്തിഗത ഇൻബോക്സിൽ നിന്നുള്ള വിവരങ്ങൾ ഹാക്കർമാർ പരസ്യപ്പെടുത്തി. സ്വകാര്യ ചിത്രങ്ങൾ, അദ്ദേഹത്തിന്റെ ഔദ്യോഗിക ബയോഡാറ്റ , ചില വ്യക്തിഗത കത്തിടപാടുകൾ എന്നിവ ഹാക്കർമാർ അവരുടെ വെബ്സൈറ്റിൽ പ്രസിദ്ധീകരിച്ചു. “ഇൻപെനട്രബിൾ (ഭേദിക്കാൻ കഴിയാത്തത്) എന്ന് അവകാശപ്പെടുന്ന എഫ്ബിഐയുടെ സംവിധാനങ്ങളെ ഏതാനും മണിക്കൂറുകൾക്കുള്ളിൽ ഞങ്ങൾ മുട്ടുകുത്തിച്ചു” എന്നാണ് ഹാക്കർ ഗ്രൂപ്പ് അവരുടെ വെബ്സൈറ്റിൽ അവകാശപ്പെടുന്നത്.
