രാജ്യതലസ്ഥാനത്തെ നടുക്കി പാകിസ്താൻ ചാരസംഘടനയായ ഐഎസ്ഐയുടെ (ISI) വൻ ചാരശൃംഖല ഡൽഹി പോലീസ് തകർത്തു. ഡൽഹി പോലീസ് സ്പെഷ്യൽ സെൽ നടത്തിയ അതിസാഹസികമായ നീക്കത്തിലൂടെ പത്തോളം ചാരന്മാരെയാണ് പിടികൂടിയത്. അഡീഷണൽ പോലീസ് കമ്മീഷണർ പ്രമോദ് കുശ്വാഹയുടെ നേരിട്ടുള്ള നേതൃത്വത്തിലായിരുന്നു ഈ നിർണ്ണായക ഓപ്പറേഷൻ. ഇന്ത്യയുടെ ദേശീയ സുരക്ഷയെ അസ്ഥിരപ്പെടുത്തുക എന്ന ലക്ഷ്യത്തോടെ വിദേശത്തിരുന്ന് നിയന്ത്രിക്കപ്പെടുന്ന വലിയൊരു ശൃംഖലയുടെ കണ്ണികളാണ് പിടിയിലായതെന്ന് പോലീസ് വ്യക്തമാക്കി. വൻ സുരക്ഷാ ഭീഷണിയാണ് ഇതിലൂടെ ഒഴിവാക്കപ്പെട്ടതെന്നാണ് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നത്.
പിടിയിലായവർ ഇന്ത്യയുടെ പ്രതിരോധ മേഖലയുമായി ബന്ധപ്പെട്ട തന്ത്രപ്രധാന രേഖകളും സൈനിക നീക്കങ്ങളെക്കുറിച്ചുള്ള വിവരങ്ങളും അതിർത്തി കടത്തിയിരുന്നതായി പ്രാഥമിക അന്വേഷണത്തിൽ തെളിഞ്ഞു. പാക് ചാരസംഘടനയുമായി ഇവർ ദീർഘകാലമായി നിരന്തരം ബന്ധപ്പെട്ടിരുന്നതായും രഹസ്യ വിവരങ്ങൾ കൈമാറുന്നതിന് വൻതുക പ്രതിഫലം കൈപ്പറ്റിയിരുന്നതായും കണ്ടെത്തിയിട്ടുണ്ട്. ഡിജിറ്റൽ തെളിവുകളും ഫോൺ രേഖകളും പോലീസ് പിടിച്ചെടുത്തു. രാജ്യത്തിന്റെ ഹൃദയഭാഗത്ത് ഇത്രയധികം ചാരന്മാർ ഒളിഞ്ഞിരുന്ന് പ്രവർത്തിച്ചത് അതീവ ഗൗരവത്തോടെയാണ് അന്വേഷണ ഏജൻസികൾ കാണുന്നത്. ഇവരെ കൂടുതൽ ചോദ്യം ചെയ്യുന്നതിലൂടെ ഇന്ത്യയിലുടനീളം പ്രവർത്തിക്കുന്ന ചാരക്കണ്ണികളെ കണ്ടെത്താൻ സാധിക്കുമെന്ന പ്രതീക്ഷയിലാണ് സ്പെഷ്യൽ സെൽ. രാജ്യതലസ്ഥാനത്ത് ഇതോടെ സുരക്ഷ കടുപ്പിക്കുകയും അതീവ ജാഗ്രതാ നിർദ്ദേശം നൽകുകയും ചെയ്തിട്ടുണ്ട്.
