ഐപിഎൽ 2026-ൽ പഞ്ചാബ് കിംഗ്സിന്റെ വിജയരഥം തുടരുന്നു. ഹൈദരാബാദിനെതിരെയുള്ള ആവേശകരമായ പോരാട്ടത്തിൽ ആറ് വിക്കറ്റ് വിജയം നേടിയ പഞ്ചാബിനായി ക്യാപ്റ്റൻ ശ്രേയസ് അയ്യർ മുന്നിൽ നിന്ന് നയിച്ചു. പവർപ്ലേയിലെ മികച്ച തുടക്കം മുതലെടുത്ത ശ്രേയസ്, 209.09 സ്ട്രൈക്ക് റേറ്റിൽ 5 ഫോറും 5 സിക്സറുകളും പറത്തിയാണ് ടീമിനെ വിജയതീരത്തെത്തിച്ചത്.
ശ്രേയസ് അയ്യരുടെ പ്രകടനത്തിൽ ആകൃഷ്ടനായ മുൻ ഇംഗ്ലണ്ട് താരം കെവിൻ പീറ്റേഴ്സൺ അദ്ദേഹത്തെ വാനോളം പുകഴ്ത്തി. “ശ്രേയസ് ഒരു അത്ഭുത പ്രതിഭയാണ്. ഏത് ഫോർമാറ്റിലും ഇന്ത്യൻ ടീമിലേക്ക് ആദ്യം തിരഞ്ഞെടുക്കേണ്ട പേര് അദ്ദേഹത്തിന്റേതാകണം. മികച്ച ക്രിക്കറ്റ് ബുദ്ധിക്ക് ഉടമയാണദ്ദേഹം,” പീറ്റേഴ്സൺ എക്സിൽ (X) കുറിച്ചു.
കഠിനമായ റൺ ചേസുകളിൽ ശ്രേയസ് പുലർത്തുന്ന ശാന്തതയെക്കുറിച്ചാണ് ആർ. അശ്വിൻ സംസാരിച്ചത്. “നിലവിൽ ശ്രേയസ് അയ്യർ തികച്ചും അചഞ്ചലനാണ് . സമ്മർദ്ദഘട്ടത്തിൽ പങ്കാളിയെ നയിക്കാനും ശരിയായ ബൗളറെ തിരഞ്ഞെടുത്ത് ആക്രമിക്കാനും അദ്ദേഹത്തിന് പ്രത്യേക കഴിവുണ്ട്. ഷോട്ട് മേക്കിംഗ് കൊണ്ട് ആവേശമുണ്ടാക്കുന്ന ഒരുപാട് താരങ്ങൾ നമുക്കുണ്ട്, എന്നാൽ ശ്രേയസിനെപ്പോലെ കളി നിയന്ത്രിക്കുന്നവർ കുറവാണ്,” അശ്വിൻ അഭിപ്രായപ്പെട്ടു.
സീസണിലെ മൂന്ന് ഇന്നിംഗ്സുകളിൽ നിന്നായി 68.50 ശരാശരിയിൽ 137 റൺസാണ് ശ്രേയസ് ഇതുവരെ നേടിയത്. 187.67 എന്ന മികച്ച സ്ട്രൈക്ക് റേറ്റിൽ നാലാം നമ്പറിൽ താരം ബാറ്റിംഗ് ഭരിക്കുന്നു. “220 റൺസ് പിന്തുടരുമ്പോൾ മികച്ചൊരു തുടക്കം ആവശ്യമാണ്. അത് ഞങ്ങൾക്ക് ലഭിച്ചു. കളി കൃത്യമായി വായിച്ചെടുക്കുക എന്നതായിരുന്നു എന്റെ ജോലി,” പ്ലെയർ ഓഫ് ദി മാച്ച് പുരസ്കാരം ഏറ്റുവാങ്ങി ശ്രേയസ് പറഞ്ഞു.
