കളിക്കളത്തിലെ പ്രകടനങ്ങൾ കൊണ്ട് മാത്രമല്ല, തന്റെ എളിമ കൊണ്ടും സഞ്ജു സാംസൺ ആരാധകരുടെ മനം കവരുകയാണ്. കഴിഞ്ഞ ദിവസം കോഴിക്കോട് സന്ദർശനത്തിനിടെ തന്നെ കാണാൻ കഴിയാത്തതിൽ വിഷമിച്ച് കരഞ്ഞ ഒരു ആറാം ക്ലാസുകാരനെ നേരിട്ട് വിളിച്ച് സർപ്രൈസ് നൽകിയിരിക്കുകയാണ് സഞ്ജു.
മലബാർ ക്രിസ്ത്യൻ കോളേജ് ഗ്രൗണ്ടിൽ സഞ്ജു കുട്ടികൾക്കൊപ്പം ക്രിക്കറ്റ് കളിക്കാൻ എത്തിയിരുന്നു. എന്നാൽ അവിടെ എത്തിയ ആറാം ക്ലാസുകാരന് ജനത്തിരക്ക് കാരണം സഞ്ജുവിനെ നേരിട്ട് കാണാൻ സാധിച്ചില്ല. “സഞ്ജുവിനെ കാണാൻ ഭാഗ്യമില്ല” എന്ന് പറഞ്ഞ് കുട്ടി പൊട്ടിക്കരയുന്ന വീഡിയോ സമൂഹമാധ്യമങ്ങളിൽ നിമിഷനേരം കൊണ്ട് വൈറലായി.
സഞ്ജുവിന്റെ സുഹൃത്തായ രാഹുൽ രാഘവനും താരത്തിന്റെ ഔദ്യോഗിക ഫാൻ ഗ്രൂപ്പായ ‘ടീം സാംസൺ’ പ്രവർത്തകരും ചേർന്നാണ് ഈ വിവരം സഞ്ജുവിനെ അറിയിച്ചത്. പിന്നാലെ താരം കുട്ടി ആരാധകനെ വീഡിയോ കോളിലൂടെ തേടിയെത്തി. വീഡിയോ കോളിൽ സഞ്ജുവിനെ കണ്ടതും കുട്ടിക്ക് വിശ്വസിക്കാനായില്ല. “സ്കൂളിലൊന്നും പോയില്ലേ, അവധിയാണോ?” എന്ന് സഞ്ജു സ്നേഹത്തോടെ ചോദിച്ചു. കുട്ടി ആരാധകൻ ‘സാർ’ എന്ന് അഭിസംബോധന ചെയ്തപ്പോൾ “അങ്ങനെ വിളിക്കരുത്, സഞ്ജു എന്ന് വിളിച്ചാൽ മതി” എന്ന് താരം തിരുത്തി. “ആവശ്യമില്ലാതെ ചുമ്മാ കരയല്ലേ ഡാ മോനെ, അടുത്ത തവണ വരുമ്പോൾ നമുക്ക് ഒരുമിച്ച് ക്രിക്കറ്റ് കളിക്കാം” എന്ന ഉറപ്പും നൽകിയാണ് സഞ്ജു സംഭാഷണം അവസാനിപ്പിച്ചത്.
അന്ന് കാണാത്ത സങ്കടത്തിലായിരുന്നു കരച്ചിൽ എങ്കിൽ, ഇന്ന് തന്റെ പ്രിയ താരം നേരിട്ട് വിളിച്ച സന്തോഷത്തിലാണ് ആ കുട്ടി ക്രിക്കറ്റ് ആരാധകൻ.
View this post on Instagram
