അമേരിക്കയും ഇറാനും തമ്മിലുള്ള നിർണ്ണായകമായ സമാധാന ചർച്ചകൾക്ക് വേദിയായതിന് പിന്നാലെ പാകിസ്താനെ പരിഹസിച്ച് ബോളിവുഡ് താരം പരേഷ് റാവൽ. അതീവ സുരക്ഷാ മേഖലയിലുള്ള പഞ്ചനക്ഷത്ര ഹോട്ടലിൽ നടന്ന ചർച്ചകളുടെ വൻ തുക വരുന്ന ഹോട്ടൽ ബില്ലുകൾ ആര് അടയ്ക്കുമെന്ന സോഷ്യൽ മീഡിയയിലെ ചോദ്യത്തിന് ‘ഐഎംഎഫ്’ (IMF) എന്ന് ഒറ്റവാക്കിൽ മറുപടി നൽകിയാണ് താരം പാകിസ്താനെ ട്രോളിയത്. സാമ്പത്തിക പ്രതിസന്ധിയിൽ ഉഴലുന്ന പാകിസ്താന്റെ കടക്കെണിയെ പരിഹസിച്ചുകൊണ്ടുള്ള പരേഷ് റാവലിന്റെ പോസ്റ്റ് നിമിഷങ്ങൾക്കകം വൈറലായി.
യുഎസ് വൈസ് പ്രസിഡന്റ് ജെ.ഡി വാൻസിന്റെയും ഇറാന്റെ ഉന്നത ഉദ്യോഗസ്ഥരുടെയും നേതൃത്വത്തിൽ ഇസ്ലാമാബാദിലെ പ്രശസ്തമായ സെറീന ഹോട്ടലിലായിരുന്നു 21 മണിക്കൂർ നീണ്ട ചർച്ചകൾ നടന്നത്. നൂറ്റമ്പതിലധികം പ്രതിനിധികൾ പങ്കെടുത്ത ചർച്ചയ്ക്കായി വൻ സുരക്ഷാ ക്രമീകരണങ്ങളും സജ്ജീകരണങ്ങളുമാണ് പാകിസ്താൻ ഒരുക്കിയിരുന്നത്. ഇതിനായി ചെലവായ കോടികൾ ആര് നൽകുമെന്ന ചർച്ചകൾ സോഷ്യൽ മീഡിയയിൽ സജീവമായിരുന്നു. “ഇത്രയും വലിയ ഹോട്ടൽ ബില്ലുകൾ ഇനി ആര് തീർപ്പാക്കും?” എന്ന ഒരാളുടെ ചോദ്യത്തിനാണ്, പാകിസ്താൻ പണത്തിനായി എപ്പോഴും ആശ്രയിക്കുന്ന അന്താരാഷ്ട്ര നാണയ നിധിയുടെ (IMF) പേര് പരേഷ് റാവൽ കുറിച്ചത്.
കഴിഞ്ഞ സെപ്റ്റംബറിൽ പാകിസ്താന് ഏഴ് ബില്യൺ ഡോളറിന്റെ സാമ്പത്തിക സഹായത്തിന് ഐഎംഎഫ് അംഗീകാരം നൽകിയിരുന്നു. സ്വന്തം സമ്പദ്വ്യവസ്ഥ തകർന്നുനിൽക്കുമ്പോഴും ആഡംബരത്തോടെ ഇത്തരം ചർച്ചകൾക്ക് വേദിയൊരുക്കുന്ന പാകിസ്താന്റെ വൈരുദ്ധ്യമാണ് പരേഷ് റാവൽ ചൂണ്ടിക്കാട്ടിയത്. അതേസമയം, വൻ പ്രതീക്ഷയോടെ തുടങ്ങിയ ഇസ്ലാമാബാദ് ചർച്ചകൾ ഫലം കാണാതെയാണ് അവസാനിച്ചത്. ആണവായുധങ്ങൾ വികസിപ്പിക്കില്ലെന്ന ഉറപ്പ് നൽകാൻ ഇറാൻ തയ്യാറാകാത്തതാണ് ചർച്ചകൾ പരാജയപ്പെടാൻ കാരണമെന്ന് ജെ.ഡി വാൻസ് വ്യക്തമാക്കി. നയതന്ത്ര തലത്തിൽ പാകിസ്താൻ നടത്തിയ ഈ നീക്കം പരാജയപ്പെട്ടതിന് പിന്നാലെയാണ് സോഷ്യൽ മീഡിയയിൽ പരിഹാസം ശക്തമാകുന്നത്.
