റാഞ്ചിയിൽ നടന്ന രണ്ടാം ടി20 മത്സരത്തിൽ വെസ്റ്റ് ഇൻഡീസ് 250 റൺസ് വിജയലക്ഷ്യം അനായാസം മറികടന്നതിന് പിന്നാലെ, ബാറ്റ്‌സ്മാൻമാർക്ക് മാത്രം തുണയാകുന്ന പിച്ചുകൾക്കെതിരെ രൂക്ഷവിമർശനവുമായി ഇന്ത്യൻ ലെഗ് സ്പിന്നർ യുസ്വേന്ദ്ര ചാഹൽ. ബാറ്റിങ്ങിനെ മാത്രം പിന്തുണയ്ക്കുന്ന ഫ്ലാറ്റ് പിച്ചുകൾ, ചെറിയ ബൗണ്ടറികൾ, മഞ്ഞുവീഴ്ച, ഐപിഎല്ലിലെ ഇംപാക്ട് പ്ലെയർ നിയമം എന്നിവ ബൗളർമാരുടെ നിലനിൽപ്പ് തന്നെ അപകടത്തിലാക്കുകയാണെന്ന് ചാഹൽ കുറ്റപ്പെടുത്തി.
ഇത്തരത്തിലുള്ള പിച്ചുകളിൽ ബൗളർമാർക്ക് ഒരു ആനുകൂല്യവും ലഭിക്കുന്നില്ലെന്നും, കളി പൂർണ്ണമായും ബാറ്റ്‌സ്മാൻമാരുടെ കയ്യിലാകുന്ന അവസ്ഥയിൽ ബൗളർമാരുടെ കഴിവിന് എന്താണ് വിലയെന്നും അദ്ദേഹം ചോദിച്ചു. പിച്ചുകളിൽ ബൗളർമാർക്കായി എന്തെങ്കിലും മാറ്റങ്ങൾ വരുത്താൻ അധികൃതർ തയ്യാറാകണമെന്നും, അല്ലാത്തപക്ഷം മൈതാനത്ത് ബൗളർമാർക്ക് പകരം ബോളിങ് മെഷീനുകൾ സ്ഥാപിക്കുന്നതാവും നല്ലതെന്നും ചാഹൽ പരിഹസിച്ചു. മുമ്പ് ഇംപാക്ട് പ്ലെയർ നിയമം ഇല്ലാതിരുന്നപ്പോൾ 170-180 റൺസ് പോലും വിജയലക്ഷ്യമായി ഉയർത്താൻ കഴിയുമായിരുന്നെങ്കിൽ, ഇന്ന് ആദ്യ ആറ് ഓവറുകളിൽ തന്നെ 70 മുതൽ 80 റൺസ് വരെ അടിച്ചെടുക്കുന്ന അവസ്ഥയാണുള്ളത്.
ഷായ് ഹോപ്പിന്റെ പുറത്താകാതെ നേടിയ സെഞ്ച്വറിയുടെ മികവിൽ 18.3 ഓവറിൽ വെസ്റ്റ് ഇൻഡീസ് ലക്ഷ്യം മറികടന്നതോടെയാണ് പിച്ചുകളുടെ നിലവാരത്തെച്ചൊല്ലിയുള്ള ചർച്ചകൾ കൂടുതൽ ചൂടുപിടിച്ചത്.
