ഇന്ത്യൻ ക്രിക്കറ്റിലെ സൂപ്പർ ഓൾറൗണ്ടർ ഹാർദിക് പാണ്ഡ്യയെ ആദ്യമായി കണ്ടുമുട്ടിയ നിമിഷങ്ങൾ ആരാധകരുമായി പങ്കുവെച്ച് മുൻ ഇന്ത്യൻ താരം വസിം ജാഫർ. വർഷങ്ങൾക്ക് മുൻപ് ഇർഫാൻ പത്താന്റെ വീട്ടിൽ വെച്ചാണ് താൻ ആദ്യമായി ഹാർദിക്കിനെയും സഹോദരൻ ക്രുണാലിനെയും കാണുന്നതെന്ന് ജാഫർ ഓർത്തെടുക്കുന്നു.
2014-15 രഞ്ജി ട്രോഫി സീസണിൽ ബറോഡയും മുംബൈയും തമ്മിലുള്ള മത്സരത്തിനിടെയാണ് സംഭവം. അന്ന് പരിക്ക് കാരണം താൻ കളിച്ചിരുന്നില്ലെങ്കിലും ടീമിനൊപ്പം ബറോഡയിലേക്ക് യാത്ര ചെയ്തിരുന്നുവെന്ന് ജാഫർ പറയുന്നു. മുംബൈക്ക് വേണ്ടിയുള്ള തന്റെ അവസാന സീസൺ കൂടിയായിരുന്നു അത്. “മത്സരശേഷം ഞങ്ങൾ ഇർഫാൻ പത്താന്റെ വീട്ടിൽ അത്താഴത്തിന് പോയി. അവിടെ വെച്ചാണ് ഞാൻ ഹാർദിക്കിനെയും ക്രുണാലിനെയും ആദ്യമായി കാണുന്നത്,” അദ്ദേഹം വ്യക്തമാക്കി.
ഇർഫാൻ പത്താനാണ് ഹാർദിക്കിനെ ജാഫറിന് പരിചയപ്പെടുത്തിയത്. “ഇവനെ പരിചയപ്പെടൂ, ഇത് ഹാർദിക് ആണ്. ഇവൻ ഉടൻ തന്നെ വലിയ നിലയിൽ കളിക്കാൻ തുടങ്ങും,” എന്ന് ഇർഫാൻ പ്രവചിച്ചതായി ജാഫർ ഓർക്കുന്നു. ആ സീസണിൽ തന്നെയാണ് ഹാർദിക്കിനെ മുംബൈ ഇന്ത്യൻസ് സ്വന്തമാക്കുന്നത്. അന്ന് ഹാർദിക് തന്നോട് പറഞ്ഞ വാക്കുകളും ജാഫർ പങ്കുവെച്ചു: “ഞാൻ നിങ്ങളുടെ ബാറ്റിംഗ് ഒരുപാട് കാണാറുണ്ട്, നിങ്ങളുടെ ശൈലി എനിക്ക് വലിയ ഇഷ്ടമാണ്.”
ഇന്ന് ലോകമറിയുന്ന വലിയൊരു താരമായി മാറിയിട്ടും, ഇപ്പോഴും തന്റെ പേര് ഒരു പ്രചോദനമായി ഹാർദിക് പറയുന്നതിൽ വലിയ സന്തോഷമുണ്ടെന്ന് ജാഫർ വ്യക്തമാക്കി. “ഇത്രയും വലിയ താരങ്ങളുടെ മുന്നിൽ വെച്ച് അവൻ എന്റെ പേര് പറയുന്നത് വളരെ നല്ല കാര്യമാണ്. അതുകൊണ്ടാണ് വസിം ജാഫർ ആരാണെന്ന് ആളുകൾ ഇപ്പോൾ തിരയുന്നത്. ഫസ്റ്റ് ക്ലാസ് ക്രിക്കറ്റിലാണ് ഞാൻ കൂടുതൽ തിളങ്ങിയത് എന്നതുകൊണ്ട് പലർക്കും എന്നെ പെട്ടെന്ന് ഓർമ്മവരണമെന്നില്ല,” അദ്ദേഹം കൂട്ടിച്ചേർത്തു.
അടുത്തിടെ നടന്ന ഒരു ഷോയിൽ ജാഫർ ആണ് തന്റെ റോൾ മോഡൽ എന്ന് ഹാർദിക് പറഞ്ഞത് ഏറെ ചർച്ചകൾക്ക് കാരണമായിരുന്നു.
