ഇന്ത്യൻ ക്രിക്കറ്റ് ലോകത്തെ ഇപ്പോഴത്തെ സംസാരവിഷയമായ പതിനഞ്ചുകാരൻ വൈഭവ് സൂര്യവംശി ചരിത്രം കുറിക്കാനൊരുങ്ങുന്നു. ഐപിഎല്ലിലെ തകർപ്പൻ പ്രകടനത്തിന് പിന്നാലെ ഇന്ത്യൻ സീനിയർ ടീമിലേക്കുള്ള അരങ്ങേറ്റത്തിന് താരം ഒരുങ്ങുന്നതായാണ് പുതിയ റിപ്പോർട്ടുകൾ. അയർലൻഡ് പര്യടനത്തിനുള്ള ഇന്ത്യൻ സാധ്യതാ പട്ടികയിൽ വൈഭവും ഇടംപിടിച്ചിട്ടുണ്ട്.
അജിത് അഗാർക്കർ നയിക്കുന്ന സെലക്ഷൻ കമ്മിറ്റി യുവതാരങ്ങൾക്ക് കൂടുതൽ അവസരം നൽകുന്നതിന്റെ ഭാഗമായി അയർലൻഡ് പര്യടനത്തിനായി ഒരു രണ്ടാം നിര ടീമിനെയാണ് അയക്കാൻ പദ്ധതിയിടുന്നത്. ഇതിന്റെ സാധ്യതാ പട്ടികയിൽ വൈഭവുമുണ്ട്. അയർലൻഡ് പരമ്പരയ്ക്ക് പുറമെ ഈ വർഷം നടക്കാനിരിക്കുന്ന സിംബാബ്വെ പര്യടനത്തിലും താരം ഇടംപിടിച്ചേക്കുമെന്ന് ഇന്ത്യൻ എക്സ്പ്രസ് റിപ്പോർട്ട് ചെയ്യുന്നു.
സച്ചിൻ ടെണ്ടുൽക്കറുടെയും ഷഫാലി വർമ്മയുടെയും റെക്കോർഡുകൾ തകർത്ത് ഇന്ത്യയുടെ ഏറ്റവും പ്രായം കുറഞ്ഞ അരങ്ങേറ്റക്കാരനാകാൻ വൈഭവ് അർഹനാണെന്ന് ഐപിഎൽ ചെയർമാൻ അരുൺ ധുമാൽ പറഞ്ഞു. “ഈ സീസണിൽ വൈഭവ് സൂര്യവംശിയുടേത് അതിശയകരമായ ബാറ്റിംഗ് പ്രകടനമാണ്. ഈ പ്രായത്തിൽ ഇത്രയും കഴിവുള്ള ഒരാളെ ലഭിക്കുന്നത് അപൂർവ്വമാണ്. ഏറ്റവും പ്രായം കുറഞ്ഞ ഇന്ത്യൻ അരങ്ങേറ്റക്കാരൻ എന്ന റെക്കോർഡ് അവൻ തീർച്ചയായും അർഹിക്കുന്നു,” ധുമാൽ എക്സിൽ (X) കുറിച്ചു.
മുൻ താരങ്ങളായ അനിൽ കുംബ്ലെ, ഇർഫാൻ പഠാൻ എന്നിവരും വൈഭവിനെ പിന്തുണച്ച് രംഗത്തെത്തിയിട്ടുണ്ട്. നിലവിൽ പുരുഷ ക്രിക്കറ്റിൽ ഇന്ത്യയ്ക്കായി ഏറ്റവും പ്രായം കുറഞ്ഞ പ്രായത്തിൽ അരങ്ങേറിയത് സാക്ഷാൽ സച്ചിൻ ടെണ്ടുൽക്കറാണ്. പുരുഷ-വനിതാ ക്രിക്കറ്റ് ഒന്നിച്ചെടുത്താൽ ഈ റെക്കോർഡ് ഷഫാലി വർമ്മയുടെ പേരിലാണ് . വൈഭവ് അരങ്ങേറുന്നതോടെ ഈ റെക്കോർഡുകൾ പഴങ്കഥയാകും.
അയർലൻഡ് പരമ്പരയ്ക്ക് ശേഷം ജൂലൈ 1 മുതൽ ആരംഭിക്കുന്ന ഇംഗ്ലണ്ട് പര്യടനത്തിൽ സീനിയർ താരങ്ങൾ ടീമിലേക്ക് മടങ്ങിയെത്തുമെന്നാണ് സൂചന.
