ഐപിഎൽ 2026-ൽ അഞ്ച് മത്സരങ്ങൾ പിന്നിടുമ്പോൾ വെറും 63 റൺസ് മാത്രമാണ് സിഎസ്കെ നായകൻ രുതുരാജ് ഗെയ്ക്വാദിന്റെ സമ്പാദ്യം (ശരാശരി 12.60, സ്ട്രൈക്ക് റേറ്റ് 102.00). കൊൽക്കത്ത നൈറ്റ് റൈഡേഴ്സിനെതിരായ അവസാന മത്സരത്തിലും 7 റൺസെടുത്ത് താരം നിരാശപ്പെടുത്തിയിരുന്നു. ഈ സാഹചര്യത്തിൽ മൂന്നാം നമ്പറിൽ തകർപ്പൻ ഫോമിലുള്ള ആയുഷ് മാത്രയെ ഓപ്പണറായി ഇറക്കണമെന്ന ആവശ്യം ആരാധകരിൽ ശക്തമാണ്. എന്നാൽ ഈ നീക്കത്തിനെതിരെ രംഗത്തെത്തിയിരിക്കുകയാണ് അശ്വിൻ.
ഋതുരാജിനെ മൂന്നാം നമ്പറിലേക്ക് മാറ്റുന്നത് താരത്തിന്റെ ആത്മവിശ്വാസം കെടുത്തുമെന്ന് അശ്വിൻ പറയുന്നു. “എനിക്കൊരു ചോദ്യമുണ്ട്. ക്യാപ്റ്റനായിരുന്ന സമയത്ത് എംഎസ് ധോണി എല്ലാ മത്സരത്തിലും റൺസ് നേടിയിട്ടുണ്ടോ? ക്യാപ്റ്റൻസിയുടെ വലിയ സമ്മർദ്ദമുള്ളതുകൊണ്ട് ഇങ്ങനെ സംഭവിക്കാം. കഴിഞ്ഞ രണ്ട് വിജയങ്ങൾക്ക് ശേഷം ചെന്നൈയുടെ ആത്മവിശ്വാസം വർദ്ധിച്ചിട്ടുണ്ട്. ഈ സമയത്ത് ആരാധകരും മാനേജ്മെന്റും രുതുരാജിനെ വെറുതെ വിട്ടാൽ അവനിൽ നിന്ന് റൺസ് താനേ വന്നുകൊള്ളും. ആയുഷ് മ्हाത്രെയെ ഓപ്പണറാക്കാനും രുതുരാജിനെ മൂന്നാം നമ്പറിലേക്ക് മാറ്റാനും ആളുകൾ പറയുന്നുണ്ട്. അത് തീർത്തും തെറ്റായ തീരുമാനമാണ്,” അശ്വിൻ തന്റെ യൂട്യൂബ് ചാനലിൽ വ്യക്തമാക്കി.
ഈ പ്രതിസന്ധി ഘട്ടത്തിൽ സിഎസ്കെ മാനേജ്മെന്റ് രുതുരാജിനൊപ്പം നിൽക്കണമെന്ന് അദ്ദേഹം ആവശ്യപ്പെട്ടു. “പുറത്തുനിൽക്കുന്ന നമ്മളാണ് ഇതൊക്കെ പറയുന്നത്. ഈ സാഹചര്യത്തിൽ ടീം മാനേജ്മെന്റ് കൂടി പിന്തുണച്ചില്ലെങ്കിൽ അവന്റെ ആത്മവിശ്വാസം എന്താകും? ക്യാപ്റ്റന് മാനേജ്മെന്റിൽ നിന്ന് ഉറപ്പ് ലഭിച്ചില്ലെങ്കിൽ പിന്നെ എവിടെ നിന്ന് ലഭിക്കാനാണ്? ഈ ഘട്ടത്തിൽ സിഎസ്കെയ്ക്ക് ചെയ്യാൻ കഴിയാത്ത ഒരേയൊരു കാര്യം ഗെയ്ക്വാദിനെ ഓപ്പണിംഗിൽ നിന്ന് മാറ്റുക എന്നതാണ്,” അശ്വിൻ കൂട്ടിച്ചേർത്തു.
അതേസമയം, തന്റെ ബാറ്റിംഗ് ഫോമിനെക്കുറിച്ച് താരം തികഞ്ഞ ശുഭാപ്തിവിശ്വാസത്തിലാണ്. വിജയവഴിയിലേക്ക് തിരിച്ചെത്തിയതിൽ സന്തോഷമുണ്ടെന്നും, താൻ മാനസികമായി വളരെ പോസിറ്റീവാണെന്നും കൊൽക്കത്തയ്ക്കെതിരായ മത്സരത്തിന് ശേഷം അദ്ദേഹം പറഞ്ഞു. “മറ്റ് താരങ്ങൾ മികച്ച രീതിയിൽ കളി മുന്നോട്ട് കൊണ്ടുപോകുന്നത് നല്ല കാര്യമാണ്. എന്റെ ബാറ്റിൽ നിന്ന് ഒരു വലിയ ഇന്നിംഗ്സ് ഉടൻ തന്നെ ഉണ്ടാകുമെന്ന് എനിക്ക് ഉറപ്പുണ്ട്,” നായകൻ വ്യക്തമാക്കി.
ഏപ്രിൽ 18 ശനിയാഴ്ച സൺറൈസേഴ്സ് ഹൈദരാബാദിനെതിരെയാണ് ചെന്നൈയുടെ അടുത്ത മത്സരം.
