ഐപിഎൽ 2026-ൽ പഞ്ചാബ് കിംഗ്സിനെ മുന്നിൽ നിന്ന് നയിക്കുന്ന ക്യാപ്റ്റൻ ശ്രേയസ് അയ്യർക്ക് വേണ്ടി വാദിച്ച് ഇന്ത്യൻ താരം രവിചന്ദ്രൻ അശ്വിൻ. അവിശ്വസനീയമായ ഫോമിൽ കളിക്കുന്ന ശ്രേയസിനെ ഇനിയും ഇന്ത്യൻ ടി20 ടീമിലേക്ക് പരിഗണിച്ചില്ലെങ്കിൽ അത് ഇന്ത്യയുടെ മാത്രം നഷ്ടമായിരിക്കുമെന്ന് അശ്വിൻ തുറന്നടിച്ചു.
ബാറ്റിംഗിലും ക്യാപ്റ്റൻസിയിലും ഫീൽഡിങ്ങിലുമെല്ലാം ശ്രേയസ് തന്റെ മികവ് തെളിയിച്ചു കഴിഞ്ഞു. ഈ സാഹചര്യത്തിൽ താരത്തെ തഴയുന്നതിലെ അനീതി അശ്വിൻ ചൂണ്ടിക്കാട്ടി. “ഇത്രയൊക്കെ ചെയ്തിട്ടും ശ്രേയസ് അയ്യർ ഇപ്പോഴും ഇന്ത്യൻ ടി20 ടീമിന്റെയും നേതൃനിരയുടെയും ഭാഗമല്ലെങ്കിൽ, അത് അവരുടെ മാത്രം നഷ്ടമാണ്, അല്ലാതെ ശ്രേയസ് അയ്യരുടെയല്ല,” അശ്വിൻ വ്യക്തമാക്കി.
ഐപിഎൽ 2026-ൽ പഞ്ചാബ് കിംഗ്സിനെ പോയിന്റ് പട്ടികയിൽ ഒന്നാമതെത്തിച്ചത് നായകൻ ശ്രേയസ് അയ്യരുടെ മാസ്മരിക പ്രകടനമാണ്. ചെന്നൈ സൂപ്പർ കിംഗ്സ്, സൺറൈസേഴ്സ് ഹൈദരാബാദ്, മുംബൈ ഇന്ത്യൻസ് തുടങ്ങിയ വമ്പൻ ടീമുകൾക്കെതിരെ തുടർച്ചയായ മൂന്ന് അർദ്ധസെഞ്ച്വറികൾ നേടിയാണ് ശ്രേയസ് തന്റെ ബാറ്റിംഗ് ഫോം തെളിയിച്ചത്. കൂടാതെ കഴിഞ്ഞ ദിവസം മുംബൈക്കെതിരായ മത്സരത്തിൽ ഹാർദിക് പാണ്ഡ്യയെ പുറത്താക്കാൻ ശ്രേയസ് എടുത്ത അത്ഭുത ക്യാച്ചും വലിയ ശ്രദ്ധ നേടിയിരുന്നു.
ഈ ഗംഭീര പ്രകടനങ്ങളുടെ പശ്ചാത്തലത്തിലാണ് അശ്വിന്റെ വാക്കുകൾ പ്രാധാന്യമർഹിക്കുന്നത്. വെറുമൊരു ബാറ്റർ എന്നതിലുപരി, ഇന്ത്യൻ ടീമിന്റെ ഭാവി നേതൃനിരയിലേക്ക് എന്തുകൊണ്ടും യോഗ്യനായ താരമാണ് ശ്രേയസ് എന്ന ശക്തമായ സന്ദേശമാണ് ബിസിസിഐക്കും സെലക്ടർമാർക്കും അശ്വിൻ നൽകുന്നത്.
