ആഗോളതാപനം മൂലം ഭൂമിയുടെ ശ്വാസകോശമായ ആമസോൺ വനങ്ങളെപ്പോലെ തന്നെ പ്രധാനപ്പെട്ട സമുദ്രങ്ങളിലെ ‘രക്തചംക്രമണ സംവിധാനം’ തകർച്ചയുടെ വക്കിലെന്ന് ഞെട്ടിക്കുന്ന മുന്നറിയിപ്പ്. അറ്റ്ലാന്റിക് മെറിഡിയണൽ ഓവർടേണിങ് സർക്കുലേഷൻ (AMOC) എന്ന് വിളിക്കപ്പെടുന്ന സമുദ്ര പ്രവാഹങ്ങൾ ഈ നൂറ്റാണ്ടിന്റെ പകുതിയോടെ തന്നെ പൂർണ്ണമായും നിലച്ചേക്കാമെന്നാണ് പുതിയ പഠനങ്ങൾ വ്യക്തമാക്കുന്നത്. സയൻസ് അഡ്വാൻസസ് ജേണലിൽ പ്രസിദ്ധീകരിച്ച ഡോ. വാലന്റൈൻ പോർട്ട്മാന്റെ നേതൃത്വത്തിലുള്ള പഠന റിപ്പോർട്ടാണ് ലോകത്തെ നടുക്കിയിരിക്കുന്നത്. ഉഷ്ണമേഖലയിൽ നിന്നുള്ള ചൂടുവെള്ളം വടക്കൻ ധ്രുവങ്ങളിലേക്ക് എത്തിക്കുകയും തണുത്ത ജലം തിരികെ തെക്കോട്ട് എത്തിക്കുകയും ചെയ്യുന്ന ഈ പ്രതിഭാസം നിലയ്ക്കുന്നത് ഭൂമിയുടെ കാലാവസ്ഥാ സന്തുലിതാവസ്ഥയെ പാടെ തകർക്കും. ആർട്ടിക് പ്രദേശത്തെ മഞ്ഞുരുകി വൻതോതിൽ ശുദ്ധജലം സമുദ്രത്തിലേക്ക് എത്തുന്നതാണ് ഈ ഒഴുക്കിന്റെ വേഗത കുറയ്ക്കുന്നത്. ഉപ്പുവെള്ളത്തെക്കാൾ സാന്ദ്രത കുറഞ്ഞ ശുദ്ധജലം സമുദ്രത്തിനടിയിലേക്ക് താഴാത്തതോടെ ഈ ബെൽറ്റ് സിസ്റ്റം നിശ്ചലമാവുകയാണ്.
ഈ സംവിധാനം തകർന്നാൽ യൂറോപ്പിലെ താപനില കുത്തനെ കുറയുകയും അവിടെ അതിഭീകരമായ ശൈത്യകാലം അനുഭവപ്പെടുകയും ചെയ്യും. അതേസമയം ആഫ്രിക്കയിലും തെക്കേ അമേരിക്കയിലും മഴ ലഭിക്കുന്ന രീതികൾ മാറുന്നത് ആഗോളതലത്തിൽ വൻ ഭക്ഷ്യക്ഷാമത്തിന് വഴിതെളിക്കും. അറ്റ്ലാന്റിക് തീരങ്ങളിൽ സമുദ്രനിരപ്പ് ഒരു മീറ്ററോളം ഉയരാൻ ഇത് കാരണമാകും. മുൻപ് ശാസ്ത്രലോകം കരുതിയതിനേക്കാൾ 50 ശതമാനത്തിലേറെ വേഗത്തിലാണ് ഈ മാറ്റങ്ങൾ സംഭവിക്കുന്നതെന്ന് പ്രശസ്ത കാലാവസ്ഥാ ശാസ്ത്രജ്ഞൻ പ്രഫസർ സ്റ്റെഫാൻ രാംസ്റ്റോർഫ് ചൂണ്ടിക്കാട്ടുന്നു. സമുദ്രത്തിലെ ഓക്സിജൻ കൈമാറ്റം നിലയ്ക്കുന്നത് മത്സ്യസമ്പത്തിനെയും കടലിലെ ആവാസവ്യവസ്ഥയെയും പൂർണ്ണമായും നശിപ്പിക്കും. 2100-ഓടെ പ്രവാഹത്തിന്റെ വേഗത 58 ശതമാനം വരെ കുറയാമെന്നാണ് പ്രവചനം. മനുഷ്യരാശി ഒരു ‘ടിപ്പിങ് പോയിന്റിലേക്ക്’ അഥവാ തിരിച്ചുപോക്കില്ലാത്ത അപകടഘട്ടത്തിലേക്ക് അടുക്കുകയാണെന്നും കാർബൺ ഉദ്വമനം അടിയന്തരമായി കുറയ്ക്കാത്ത പക്ഷം വരുംതലമുറയെ കാത്തിരിക്കുന്നത് അതിഭീകരമായ കാലാവസ്ഥാ ദുരന്തങ്ങളാണെന്നും ശാസ്ത്രജ്ഞർ മുന്നറിയിപ്പ് നൽകുന്നു.
