കാലിഫോർണിയ : ലോകത്തെ ഏറ്റവും വലിയ ടെക് കമ്പനികളിലൊന്നായ ആപ്പിളിൽ നിർണ്ണായകമായ നേതൃമാറ്റം. 15 വർഷമായി ആപ്പിളിനെ നയിക്കുന്ന ടിം കുക്ക് ചീഫ് എക്സിക്യൂട്ടീവ് ഓഫീസർ സ്ഥാനമൊഴിഞ്ഞു. പുതിയ ആപ്പിൾ സിഇഒ ആയി ജോൺ ടെർണസ് നിയമിക്കപ്പെട്ടു. ആപ്പിളിന്റെ ഹാർഡ്വെയർ എൻജിനീയറിങ് വിഭാഗം മേധാവിയായിരുന്നു അദ്ദേഹം.
2026 സെപ്റ്റംബർ 1 മുതൽ പുതിയ മാറ്റങ്ങൾ പ്രാബല്യത്തിൽ വരും. സിഇഒ സ്ഥാനമൊഴിയുന്ന ടിം കുക്ക് ആപ്പിൾ ബോർഡ് ഓഫ് ഡയറക്ടേഴ്സിന്റെ എക്സിക്യൂട്ടീവ് ചെയർമാനായി തുടരുമെന്ന് കമ്പനി വ്യക്തമാക്കി. ആപ്പിളിന്റെ ഐഫോൺ, ഐപാഡ്, ആപ്പിൾ വാച്ച് തുടങ്ങിയ പ്രധാന ഉൽപ്പന്നങ്ങളുടെ രൂപകൽപ്പനയിലും നിർമ്മാണത്തിലും നിർണ്ണായക പങ്ക് വഹിച്ച വ്യക്തിയാണ് 50-കാരനായ പുതിയ സിഇഒ ജോൺ ടെർണസ്. 2001-ൽ ആപ്പിളിന്റെ പ്രൊഡക്ട് ഡിസൈൻ ടീമിൽ ചേർന്ന ടെർണസ് കഴിഞ്ഞ 25 വർഷത്തോളമായി ആപ്പിളിലെ നിർണായക സാന്നിധ്യമാണ്.
എം-സീരീസ് ചിപ്പുകളിലേക്കുള്ള (Apple Silicon) ആപ്പിളിന്റെ മാറ്റം, മാക് കമ്പ്യൂട്ടറുകളുടെ വിപണിയിലെ തിരിച്ചുവരവ്, ‘മാക്ബുക്ക് നിയോ’ എന്ന പുതിയ ലാപ്ടോപ്പിന്റെ അവതരണം എന്നിവയിൽ പ്രധാന പങ്കുവഹിച്ച വ്യക്തിത്വമാണ് ജോൺ ടെർണസ്. ”ജോണിന് ഒരു എൻജിനീയറുടെ മനസ്സും ഒരു നവീനചിന്തകന്റെ ആത്മാവുമാണുള്ളത്. ആപ്പിളിനെ നയിക്കാൻ ഏറ്റവും അനുയോജ്യമായ വ്യക്തി അദ്ദേഹമാണ്,” എന്ന് ടിം കുക്ക് അഭിപ്രായപ്പെട്ടു.
