താരതമ്യം ചെയ്യാനില്ല, ഇവൻ ഒരുപടി മുന്നിലാണ്; പ്രിയാൻഷ് ആര്യയുടെ റേഞ്ച് ഓഫ് ഷോട്ടുകൾ കണ്ട് കണ്ണ് തള്ളി അശ്വിൻ

ഐപിഎൽ 2026-ൽ പഞ്ചാബ് കിംഗ്‌സിനായി തകർപ്പൻ പ്രകടനം പുറത്തെടുക്കുന്ന യുവ ബാറ്റർ പ്രിയാൻഷ് ആര്യയെ പുകഴ്ത്തി ആർ. അശ്വിൻ രംഗത്ത്. കഴിഞ്ഞ ആഴ്ച ലഖ്‌നൗ സൂപ്പർ ജയന്റ്‌സിനെതിരെ വെറും 37 പന്തിൽ 93 റൺസ് അടിച്ചുകൂട്ടിയ പ്രിയാൻഷ്, ഈ സീസണിലെ ഏറ്റവും അപകടകാരിയായ ബാറ്ററായി മാറിക്കഴിഞ്ഞു. തന്റെ യൂട്യൂബ് ചാനലിലൂടെയാണ് അശ്വിൻ താരത്തിന്റെ കഴിവിനെ പ്രശംസിച്ചത്.

മറ്റ് യുവ പ്രതിഭകളുമായി താരതമ്യം ചെയ്യുമ്പോൾ പ്രിയാൻഷ് ആര്യയ്ക്കുള്ള പ്രത്യേകതകൾ അശ്വിൻ എടുത്തുപറഞ്ഞു. “ആരെയും താഴ്ത്തിക്കെട്ടാനല്ല ഞാൻ ഇത് പറയുന്നത്, പക്ഷേ ആയുഷ് മാത്രെയെയും വൈഭവ് സൂര്യവംശിയെയും അപേക്ഷിച്ച് പ്രിയാൻഷ് ഒരുപടി മുന്നിലാണെന്ന് എനിക്ക് തോന്നുന്നു. ഞാൻ അവരെ താരതമ്യം ചെയ്യുകയല്ല, പക്ഷേ പ്രിയാൻഷ് വലിയ സ്കോറുകൾ നേടാൻ പ്രാപ്തനാണ്. അദ്ദേഹത്തിന്റെ പക്കൽ വൈവിധ്യമാർന്ന ഷോട്ടുകളുണ്ട്,” – അശ്വിൻ വ്യക്തമാക്കി.

കഴിഞ്ഞ സീസണിൽ 475 റൺസ് നേടി വരവറിയിച്ച പ്രിയാൻഷ്, താൻ ഒരു ‘വൺ സീസൺ വണ്ടർ’ അല്ലെന്ന് ഈ വർഷത്തെ പ്രകടനത്തിലൂടെ തെളിയിച്ചു കഴിഞ്ഞു. ഈ സീസണിൽ ഇതുവരെ കളിച്ച 5 മത്സരങ്ങളിൽ നിന്ന് 248 സ്ട്രൈക്ക് റേറ്റിൽ 211 റൺസാണ് പ്രിയാൻഷ് അടിച്ചുകൂട്ടിയത്. 11 പന്തിൽ 39, 20 പന്തിൽ 57, 37 പന്തിൽ 93 എന്നിങ്ങനെയാണ് ഈ സീസണിലെ താരത്തിന്റെ പ്രധാന സ്കോറുകൾ. നിലവിൽ 42.2 എന്ന മികച്ച ശരാശരിയിലാണ് താരം മുന്നേറുന്നത്.