ഐപിഎൽ 2026-ലെ ഏറ്റവും വലിയ പോരാട്ടത്തിന് മുന്നോടിയായി ചെന്നൈ സൂപ്പർ കിംഗ്സ് ആരാധകർക്ക് ആവേശവാർത്ത. ചിരവൈരികളായ മുംബൈ ഇന്ത്യൻസിനെതിരായ മത്സരത്തിൽ എം.എസ്. ധോണി കളിക്കുമെന്ന് ഉറപ്പായി. പരിക്കിനെത്തുടർന്ന് സീസണിലെ ആദ്യ 25 ദിവസങ്ങൾ നഷ്ടമായ ധോണി, വ്യാഴാഴ്ച നടക്കുന്ന മത്സരത്തിൽ വിക്കറ്റ് കീപ്പറായി തിരിച്ചെത്തുമെന്നാണ് റിപ്പോർട്ടുകൾ. മുൻ സിഎസ്കെ താരം രവിചന്ദ്രൻ അശ്വിനാണ് ഈ വലിയ വാർത്ത പുറത്തുവിട്ടത്.
ധോണിയുടെ തിരിച്ചുവരവ് സൂചിപ്പിക്കുന്ന ചില നിർണ്ണായക നിരീക്ഷണങ്ങൾ അശ്വിൻ പങ്കുവെച്ചു. “എന്റെ ജീവിതത്തിൽ ഇന്നുവരെ ധോണി നെറ്റ്സിൽ വിക്കറ്റ് കീപ്പിംഗ് പരിശീലിക്കുന്നത് ഞാൻ കണ്ടിട്ടില്ല. എന്നാൽ ഇന്ന് അദ്ദേഹം കീപ്പിംഗ് ഗ്ലൗസ് അണിഞ്ഞ് പരിശീലനം നടത്തി. ഇതിനർത്ഥം അദ്ദേഹം വിക്കറ്റിന് പിന്നിൽ തിരിച്ചെത്തുമെന്നാണ്,” അശ്വിൻ തന്റെ യൂട്യൂബ് ചാനലിൽ പറഞ്ഞു. ധോണി കീപ്പറായി എത്തുന്നതോടെ മലയാളി താരം സഞ്ജു സാംസൺ ഔട്ട്ഫീൽഡിൽ ഫീൽഡിംഗിന് ഇറങ്ങേണ്ടി വരും. അല്ലെങ്കിൽ സഞ്ജുവിനെ ഇംപാക്ട് പ്ലെയറായി ഉപയോഗിക്കാനും സാധ്യതയുണ്ട്. കാലിലെ പേശീവലിവ് പൂർണ്ണമായും ഭേദമായ ധോണി, നെറ്റ്സിൽ മാറ്റ് ഹെൻട്രി, ജാമി ഓവർട്ടൺ എന്നീ വിദേശ പേസർമാരെ അനായാസം നേരിട്ടു.
ഖലീൽ അഹമ്മദ്, ആയുഷ് മാത്രേ എന്നിവർ പരിക്കേറ്റ് സീസണിൽ നിന്ന് പുറത്തായതോടെ തകർന്നുനിന്ന സിഎസ്കെയ്ക്ക് ധോണിയുടെ വരവ് വലിയ ആത്മവിശ്വാസം നൽകും. അതേസമയം, മുംബൈ ഇന്ത്യൻസ് ക്യാമ്പിലും സന്തോഷവാർത്തയുണ്ട്. ഇംഗ്ലീഷ് ഓൾറൗണ്ടർ വിൽ ജാക്സ് പൂർണ്ണ കായികക്ഷമത വീണ്ടെടുത്തതായും ചെന്നൈയ്ക്കെതിരായ മത്സരത്തിൽ കളിക്കുമെന്നും മുംബൈ സ്ഥിരീകരിച്ചു.
