ഐപിഎല്ലിലെ രാജാക്കന്മാരായ ചെന്നൈ സൂപ്പർ കിംഗ്സും മുംബൈ ഇന്ത്യൻസും സീസണിലെ ആദ്യ പോരാട്ടത്തിന് തയ്യാറെടുക്കുമ്പോൾ മൈതാനത്തിന് പുറത്ത് ആരാധകരുടെ മനം കവരുകയാണ് എം.എസ്. ധോണിയും ദീപക് ചഹാറും. ചെന്നൈയിൽ ധോണിയുടെ വിശ്വസ്തനായിരുന്ന ചഹാർ ഇപ്പോൾ മുംബൈ ഇന്ത്യൻസ് ജേഴ്സിയിലാണ്. പരിശീലനത്തിനിടെ ധോണിയെ കാണാനെത്തിയ ചഹാറിനെ ധോണി കളിയാക്കുന്ന ദൃശ്യങ്ങളാണ് ഇപ്പോൾ ചർച്ചയാകുന്നത്.
നെറ്റ്സ് പരിശീലനത്തിനിടെ തന്നെ കാണാനെത്തിയ ചഹാറിനൊപ്പം മുംബൈയുടെ ക്യാമറ കണ്ടതും ധോണി തന്റെ സ്വഭാവഗുണമുള്ള തമാശയുമായി എത്തി. “നീ വന്നപ്പോൾ കൂടെ ക്യാമറയും കൊണ്ടുവന്നോ? ഇവനെ ഇവിടുന്ന് ഓടിക്കൂ…” എന്നായിരുന്നു ധോണിയുടെ തമാശ കലർന്ന പ്രതികരണം. ഉടൻ തന്നെ ചഹാർ ക്യാമറമാനോട് “അയ്യോ ചേട്ടാ, നിങ്ങളൊന്ന് പോകൂ” എന്ന് പറയുന്നതും വീഡിയോയിൽ കാണാം.
“ക്യാമറയുണ്ടെങ്കിൽ നമുക്ക് ഒന്നും സംസാരിക്കാൻ പറ്റില്ലല്ലോ” എന്ന് ചിരിച്ചുകൊണ്ട് ധോണി കൂട്ടിച്ചേർത്തു. സിഎസ്കെയിൽ ആയിരുന്നപ്പോൾ മുതൽ ധോണിയും ചഹാറും തമ്മിലുള്ള ‘ജ്യേഷ്ഠൻ-അനിയൻ’ ബന്ധം പ്രശസ്തമാണ്. കഴിഞ്ഞ സീസണിൽ ധോണി ബാറ്റ് ചെയ്യാൻ ഇറങ്ങിയപ്പോൾ ഷോട് സില്ലി പോയിന്റിൽ പോയി നിന്ന് ചഹാർ ധോണിയെ കളിയാക്കിയിരുന്നു. മത്സരശേഷം ഹസ്തദാനത്തിനിടെ ധോണി ചഹാറിനെ ബാറ്റ് കൊണ്ട് തമാശയ്ക്ക് തട്ടുന്ന വീഡിയോയും വൈറലായിരുന്നു.
ഇരുടീമുകളും ഈ സീസണിൽ ഇതുവരെ കളിച്ച ആറ് മത്സരങ്ങളിൽ രണ്ടെണ്ണത്തിൽ മാത്രമാണ് വിജയിച്ചത്. അതുകൊണ്ട് തന്നെ വാംഖഡെ സ്റ്റേഡിയത്തിൽ നടക്കാൻ പോകുന്ന ഈ 40-ാം പോരാട്ടം ഇരുവർക്കും നിർണ്ണായകമാണ്. നേർക്കുനേർ പോരാട്ടത്തിൽ 22 ജയങ്ങളുമായി മുംബൈയ്ക്ക് നേരിയ മുൻതൂക്കമുണ്ട്. ചെന്നൈ 19 തവണയാണ് വിജയിച്ചിട്ടുള്ളത്.
