കൊൽക്കത്ത : ബംഗാൾ നിയമസഭാ തിരഞ്ഞെടുപ്പിന്റെ ഒന്നാം ഘട്ട വോട്ടെടുപ്പിന് മണിക്കൂറുകൾ മാത്രം ബാക്കിനിൽക്കെ, തൃണമൂൽ കോൺഗ്രസ് അധ്യക്ഷ മമത ബാനർജിക്ക് പിന്തുണയുമായി ആം ആദ്മി പാർട്ടി ദേശീയ കൺവീനർ അരവിന്ദ് കെജ്രിവാൾ. ബുധനാഴ്ച മമത ബാനർജിയെ ഫോണിൽ വിളിച്ച കെജ്രിവാൾ തൃണമൂൽ കോൺഗ്രസിന് പൂർണ്ണ പിന്തുണ വാഗ്ദാനം ചെയ്തു. കേന്ദ്ര അന്വേഷണ ഏജൻസികളെയും തിരഞ്ഞെടുപ്പ് കമ്മീഷനെയും ഉപയോഗിച്ചാലും ഇത്തവണ മോദി പരാജയപ്പെടും എന്ന് കെജ്രിവാൾ അഭിപ്രായപ്പെട്ടു.
”ഞാൻ ഇപ്പോൾ മമത ദീദിയുമായി സംസാരിച്ചു. അവർക്ക് എന്റെ എല്ലാവിധ പിന്തുണയും ഐക്യദാർഢ്യവും അറിയിച്ചു. ഇന്ത്യൻ ജനാധിപത്യം സംരക്ഷിക്കാനുള്ള ഏറ്റവും കഠിനവും എന്നാൽ പ്രധാനപ്പെട്ടതുമായ പോരാട്ടങ്ങളിലൊന്നാണ് അവർ നടത്തുന്നത്. കേന്ദ്ര അന്വേഷണ ഏജൻസികളെയും തിരഞ്ഞെടുപ്പ് കമ്മീഷനെയും ഉപയോഗിച്ചാലും ഇത്തവണ മോദി പരാജയപ്പെടും,” എന്ന് എക്സിൽ പങ്കുവെച്ച ഒരു പോസ്റ്റിൽ കെജ്രിവാൾ അറിയിച്ചു.
