2004 മാർച്ച് 29 , പാകിസ്ഥാനെതിരായ ഒന്നാം ടെസ്റ്റിൽ വിരേന്ദർ സെവാഗ് തന്റെ ആദ്യ ട്രിപ്പിൾ സെഞ്ച്വറി നേടി ചരിത്രം കുറിച്ച മത്സരമായിരുന്നു അത്. എന്നാൽ ക്രിക്കറ്റ് ലോകം ആ മത്സരത്തെ ഓർക്കുന്നത് മറ്റൊരു കാരണത്താലാണ്. സച്ചിൻ ടെണ്ടുൽക്കർ തന്റെ കരിയറിലെ മറ്റൊരു ഇരട്ട സെഞ്ച്വറിയിലേക്ക് ആറ് റൺസ് മാത്രം അകലെ നിൽക്കെ, നായകൻ രാഹുൽ ദ്രാവിഡ് പെട്ടെന്ന് ഇന്നിംഗ്സ് ഡിക്ലയർ ചെയ്യുന്നു.
ഇന്ത്യ 5 വിക്കറ്റ് നഷ്ടത്തിൽ 675 റൺസ് എന്ന അതിശക്തമായ നിലയിലായിരുന്നു അപ്പോൾ. സച്ചിൻ 194 റൺസുമായി ക്രീസിലുണ്ട്. ചായസമയത്തിന് ശേഷം കളി പുനരാരംഭിച്ച് മിനിറ്റുകൾക്കുള്ളിലാണ് ദ്രാവിഡ് ഡ്രസ്സിംഗ് റൂമിൽ നിന്ന് ഡിക്ലയറേഷൻ പ്രഖ്യാപിച്ചത്. ഡിക്ലയർ ചെയ്യുന്നതിന് മുൻപ് ദ്രാവിഡ് ഒരു സന്ദേശം സച്ചിന് അയച്ചിരുന്നു. സച്ചിൻ 190 റൺസിൽ നിൽക്കുമ്പോൾ പന്ത്രണ്ടാമനായ രമേശ് പവാർ വഴി ദ്രാവിഡ് അറിയിച്ചത്, “ഇനി രണ്ട് ഓവർ കൂടി മാത്രമേ ബാക്കിയുള്ളൂ, അതിനുള്ളിൽ ഇരട്ട സെഞ്ച്വറി തികയ്ക്കണം” എന്നായിരുന്നു. എന്നാൽ ആ രണ്ട് ഓവറുകൾക്ക് ശേഷം അടുത്ത ഓവറിലെ ആദ്യ പന്ത് എറിയുന്നതിന് മുൻപാണ് ദ്രാവിഡ് അപ്രതീക്ഷിതമായി ഡിക്ലയർ ചെയ്തത്. ഇരട്ട സെഞ്ച്വറിക്ക് തൊട്ടടുത്ത് നിൽക്കുന്ന ഒരു താരത്തെ സംബന്ധിച്ചിടത്തോളം ഇത് അപ്രതീക്ഷിതമായിരുന്നു. അമ്പരപ്പോടെയും നിരാശയോടെയുമാണ് സച്ചിൻ മൈതാനം വിട്ടത്.
അന്ന് ക്യാപ്റ്റനായിരുന്ന സൗരവ് ഗാംഗുലി പരിക്കേറ്റ് പുറത്തിരിക്കുകയായിരുന്നു. ദ്രാവിഡാണ് ടീമിനെ നയിച്ചിരുന്നത്. ഡിക്ലയർ ചെയ്യാനുള്ള തീരുമാനത്തിൽ ടീം മാനേജ്മെന്റും പരിശീലകൻ ജോൺ റൈറ്റും ഉൾപ്പെട്ടിരുന്നു. വർഷങ്ങൾക്ക് ശേഷം ഗാംഗുലി സമ്മതിച്ചു, “സച്ചിന് ഇരട്ട സെഞ്ച്വറി തികയ്ക്കാൻ കുറച്ച് സമയം കൂടി നൽകാമായിരുന്നു, ആ തീരുമാനം തെറ്റായിരുന്നു” എന്ന്. സച്ചിൻ 194 റൺസിൽ പുറത്താകാതെ മടങ്ങിയപ്പോൾ ഇന്ത്യൻ ഡ്രസ്സിംഗ് റൂം അക്ഷരാർത്ഥത്തിൽ നിശബ്ദമായിരുന്നു. സച്ചിന്റെ മുഖത്ത് ദേഷ്യവും സങ്കടവും പ്രകടമായിരുന്നു. സാധാരണയായി ഒരു താരം സെഞ്ച്വറി തികയ്ക്കുമ്പോൾ എഴുന്നേറ്റുനിന്ന് കൈയടിക്കുന്ന സഹതാരങ്ങൾ അന്ന് എന്ത് ചെയ്യണമെന്ന് അറിയാതെ പകച്ചുനിന്നു.
സച്ചിൻ തന്റെ ആത്മകഥയിൽ ഇങ്ങനെ കുറിച്ചു: “ഞാൻ ഇരട്ട സെഞ്ച്വറിക്ക് വേണ്ടിയല്ല കളിച്ചിരുന്നത്. ടീമിന് വേണ്ടിയാണ് കളിച്ചത്. 675 റൺസ് എടുത്ത ഒരു ടീമിന് ഒരു ഓവർ കൂടി കാത്തിരിക്കുന്നത് കൊണ്ട് ഒന്നും സംഭവിക്കില്ലായിരുന്നു. ദ്രാവിഡ് എടുത്ത തീരുമാനം എന്നെ മാനസികമായി തളർത്തി.”
എന്തായാലും ക്രിക്കറ്റ് കളത്തിൽ അനേകം വർഷങ്ങൾ വലിയ കൂട്ടുകരയായി കഴിഞ്ഞ ഇരുവർക്കുമിടയിൽ ഉള്ള പോറൽ ആയിരുന്നു ഈ സംഭവം
