ഗാന്ധി നഗർ : ഗുജറാത്ത് തദ്ദേശ സ്വയംഭരണ തെരഞ്ഞെടുപ്പിൽ പുതിയ റെക്കോർഡ് നേട്ടവുമായി ബിജെപി. ആകെയുള്ള 15 മുനിസിപ്പൽ കോർപ്പറേഷനുകളിലും ബിജെപി ആധിപത്യം ഉറപ്പിച്ചു. പ്രധാനപ്പെട്ട നഗരങ്ങളിലെല്ലാം പ്രതിപക്ഷ പാർട്ടികളായ കോൺഗ്രസിനെയും ആം ആദ്മി പാർട്ടിയെയും ബഹുദൂരം പിന്നിലാക്കിയാണ് ബിജെപിയുടെ കുതിപ്പ്. ഗുജറാത്ത് നിയമസഭാ തെരഞ്ഞെടുപ്പിന് മുന്നോടിയായുള്ള സെമിഫൈനൽ ആയി കണക്കാക്കപ്പെടുന്ന ഈ തിരഞ്ഞെടുപ്പ് ഗുജറാത്തിലെ ബിജെപിയുടെ നിർണായക നേട്ടമായി മാറുകയാണ്.
2026 ഏപ്രിൽ 26 ന് ആയിരുന്നു ഗുജറാത്തിൽ തദ്ദേശസ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് നടന്നത്.
അഹമ്മദാബാദ്, സൂറത്ത്, വഡോദര, രാജ്കോട്ട് ഉൾപ്പെടെയുള്ള 15 മുനിസിപ്പൽ കോർപ്പറേഷനുകളിലും ബിജെപി വൻ മുന്നേറ്റമാണ് ഉണ്ടാക്കിയത്. നവസാരി, ഗാന്ധിധാം, മോർബി, വാപി, ആനന്ദ്, നദിയാദ്, മെഹ്സാന, പോർബന്തർ, സുരേന്ദ്രനഗർ എന്നിവയുൾപ്പെടെ പുതുതായി രൂപീകരിച്ച ഒമ്പത് മുനിസിപ്പൽ കോർപ്പറേഷനുകളിലും ബിജെപി ശക്തമായ വിജയം സ്വന്തമാക്കി. കൂടാതെ താലൂക്ക്, ജില്ലാ പഞ്ചായത്തുകൾ, മുനിസിപ്പാലിറ്റികൾ എന്നിവിടങ്ങളിലും ബിജെപി വൻ വിജയമാണ് നേടിയിരിക്കുന്നത്.
താലൂക്ക് പഞ്ചായത്തുകളിൽ 1,165 സീറ്റുകളും, ജില്ലാ പഞ്ചായത്തുകളിൽ 251 സീറ്റുകളും, മുനിസിപ്പാലിറ്റികളിൽ 825 സീറ്റുകളും, മുനിസിപ്പൽ കോർപ്പറേഷനുകളിൽ 290 സീറ്റുകളും നേടി ബിജെപി എതിരാളികളേക്കാൾ ബഹുദൂരം മുന്നിലെത്തി. പ്രധാന പ്രതിപക്ഷമായ കോൺഗ്രസ് തകർന്നടിയുന്ന കാഴ്ചയാണ് ഗുജറാത്തിൽ ആകെയായി കാണുന്നത്. കോൺഗ്രസ് താലൂക്ക് പഞ്ചായത്തുകളിൽ 235 സീറ്റുകളും, ജില്ലാ പഞ്ചായത്തുകളിൽ 23 സീറ്റുകളും, മുനിസിപ്പാലിറ്റികളിൽ 118 സീറ്റുകളും, മുനിസിപ്പൽ കോർപ്പറേഷനുകളിൽ 8 സീറ്റുകളും ആണ് നേടിയത്.
