പാകിസ്ഥാൻ സൂപ്പർ ലീഗ് 2026 സീസണിനിടെ ഇന്ത്യൻ ക്രിക്കറ്റ് ടീമിനെതിരെ വിവാദ പ്രസ്താവന നടത്തി പുലിവാല് പിടിച്ച് പാകിസ്ഥാൻ യുവതാരം ഹസൻ നവാസ്. ഒരു പ്രാദേശിക മാധ്യമത്തിന് നൽകിയ അഭിമുഖത്തിലാണ് 23-കാരനായ പാക് ബാറ്റർ ഹസൻ നവാസ് ഇന്ത്യൻ ബൗളർമാർക്കെതിരെ വിവാദ പരാമർശം നടത്തിയത്. ഏത് ബൗളർക്കെതിരെ റൺസ് നേടാനാണ് ഏറ്റവും കൂടുതൽ ആഗ്രഹിക്കുന്നത് എന്ന മാധ്യമപ്രവർത്തകന്റെ ചോദ്യത്തിനായിരുന്നു താരത്തിന്റെ അപ്രതീക്ഷിത മറുപടി.
ഇന്ത്യൻ ടീമിനെതിരെ കളിക്കാൻ എപ്പോഴും ആഗ്രഹമുണ്ടെന്ന് പറഞ്ഞ താരം, വിദ്വേഷം നിറഞ്ഞ വാക്കുകളാണ് പിന്നീട് ഉപയോഗിച്ചത്. “ഇന്ത്യൻ ടീമിനെക്കുറിച്ച് സംസാരിക്കുമ്പോഴും ചിന്തിക്കുമ്പോഴുമെല്ലാം അവർക്കെതിരെ റൺസ് നേടണമെന്നാണ് ഞങ്ങൾ ആഗ്രഹിക്കുന്നത്. അവരുടെ ഓരോ ബൗളർമാരോടും ഞങ്ങൾക്ക് കടുത്ത വെറുപ്പാണ്. ഭാവിയിൽ അവസരം ലഭിച്ചാൽ അവർക്കെതിരെ മികച്ച പ്രകടനം നടത്താൻ ഞാൻ ആഗ്രഹിക്കുന്നു,” ഹസൻ നവാസ് പറഞ്ഞു.
ഇന്ത്യൻ ബൗളർമാർക്കെതിരെ ഇത്രയും വലിയ വെല്ലുവിളി നടത്തുന്ന ഹസൻ നവാസ് തന്റെ കരിയറിൽ ഇതുവരെ ഇന്ത്യക്കെതിരെ കളിച്ചത് ഒരേയൊരു മത്സരം മാത്രമാണ്. കഴിഞ്ഞ വർഷത്തെ ഏഷ്യാ കപ്പിൽ നടന്ന ആ പോരാട്ടത്തിൽ വെറും 5 റൺസ് മാത്രമെടുത്ത താരത്തെ ഇന്ത്യൻ സ്പിന്നർ കുൽദീപ് യാദവ് കൂടാരത്തിലേക്ക് മടക്കി അയക്കുകയായിരുന്നു. താരത്തിന്റെ പ്രസ്താവന സമൂഹമാധ്യമങ്ങളിൽ വൈറലായതോടെ വലിയ രീതിയിലുള്ള വിമർശനങ്ങളും ട്രോളുകളുമാണ് ഉയർന്നുവരുന്നത്. ഇന്ത്യൻ ആരാധകർ താരത്തെ കണക്കറ്റ് പരിഹസിച്ചപ്പോൾ, സ്വന്തം നാട്ടുകാരായ പാകിസ്ഥാൻ ആരാധകരും നവാസിനെതിരെ തിരിഞ്ഞു. “വെറുപ്പോ? നിങ്ങൾ തമാശ പറയുകയാണോ? ഇതൊരു സ്പോർട്സ് ആണ്, അല്ലാതെ യുദ്ധക്കളമല്ല,” എന്ന് ഒരു പാക് ആരാധകൻ എക്സിൽ (X) കുറിച്ചു.
“നമ്മുടെ കളിക്കാർക്ക് മാധ്യമങ്ങളോട് എങ്ങനെ സംസാരിക്കണമെന്ന് പഠിപ്പിച്ചു കൊടുക്കേണ്ടതുണ്ട്. ചെറിയ കുട്ടികളെപ്പോലെയാണ് അവർ പെരുമാറുന്നത്. വളരെ നിരാശാജനകമായ വാക്കുകളാണിത്,” എന്ന് മറ്റൊരു പാകിസ്ഥാൻ ആരാധകനും പ്രതികരിച്ചു. പിഎസ്എൽ 2026 സീസണിൽ ക്വെറ്റ ഗ്ലാഡിയേറ്റേഴ്സിന് (Quetta Gladiators) വേണ്ടി കളിച്ച നവാസ് 10 മത്സരങ്ങളിൽ നിന്ന് 291 റൺസാണ് നേടിയത്. ഈ സീസണിൽ വെറും 3 വിജയങ്ങൾ മാത്രം സ്വന്തമാക്കിയ ക്വെറ്റ ഗ്ലാഡിയേറ്റേഴ്സ് പോയിന്റ് പട്ടികയിൽ താഴെനിന്നും രണ്ടാമതായാണ് ഫിനിഷ് ചെയ്തത്.
