ആകാശയാത്രയ്ക്കിടെ അപ്രതീക്ഷിതമായി ലഭിച്ച ഒരു അനൗൺസ്മെന്റ് കേട്ട് അമ്പരന്നിരിക്കുകയാണ് ഇൻഡിഗോ വിമാനത്തിലെ യാത്രക്കാർ. വിമാനം പറത്തുന്നത് മുൻ കേന്ദ്രമന്ത്രിയും പൈലറ്റുമായ രാജീവ് പ്രതാപ് റൂഡി. യാത്രക്കാരുടെ നിരയിലാകട്ടെ കേന്ദ്ര റെയിൽവേ മന്ത്രി അശ്വിനി വൈഷ്ണവും കേന്ദ്രമന്ത്രി ജിതേന്ദ്ര സിംഗും ഉൾപ്പെടെയുള്ള ഉന്നതതല സംഘം. ജമ്മുവിൽ നിന്ന് ഡൽഹിയിലേക്കുള്ള ഇൻഡിഗോ വിമാനത്തിലാണ് രാഷ്ട്രീയ വത്യാസങ്ങൾക്കപ്പുറമുള്ള ഈ ഹൃദ്യമായ കൂടിക്കാഴ്ചയ്ക്ക് ആകാശം സാക്ഷിയായത്. നോർത്തേൺ റെയിൽവേ തങ്ങളുടെ ഔദ്യോഗിക എക്സ് (ട്വിറ്റർ) ഹാൻഡിലിലൂടെ പങ്കുവെച്ച വീഡിയോ ഇതിനകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു.
പ്രൊഫഷണൽ പൈലറ്റ് കൂടിയായ രാജീവ് പ്രതാപ് റൂഡി വിമാനത്തിന്റെ അനൗൺസ്മെന്റ് സിസ്റ്റത്തിലൂടെ അതിഥികളെ പരിചയപ്പെടുത്തിയതോടെയാണ് യാത്രക്കാർ വിവരം അറിയുന്നത്. “ഇന്ന് നമുക്കൊപ്പം വളരെ സവിശേഷമായ ഒരു അതിഥിയുണ്ട്, ബഹുമാനപ്പെട്ട റെയിൽവേ മന്ത്രി അശ്വിനി വൈഷ്ണവ് നമ്മോടൊപ്പം യാത്ര ചെയ്യുന്നുണ്ട്,” എന്ന് റൂഡി അനൗൺസ് ചെയ്തു. പിന്നാലെ കേന്ദ്രമന്ത്രി ജിതേന്ദ്ര സിംഗ്, എസ്റ്റിമേറ്റ് കമ്മിറ്റി ചെയർമാൻ സഞ്ജയ് ജയ്സ്വാൾ, പ്രശസ്ത സിനിമാതാരവും എംപിയുമായ മനോജ് തിവാരി, ചന്ദൻ ചൗഹാൻ, മനീഷ് ജയ്സ്വാൾ തുടങ്ങി നിരവധി പ്രമുഖരെ അദ്ദേഹം ഓരോരുത്തരായി പേരെടുത്തു പറഞ്ഞ് സ്വാഗതം ചെയ്തു.
പാർലമെന്ററി സമിതിയുടെ ഭാഗമായി ജമ്മു കശ്മീരിൽ സന്ദർശനം നടത്തിയ ശേഷം മടങ്ങുകയായിരുന്നു മന്ത്രിമാരും എംപിമാരും അടങ്ങുന്ന സംഘം. നിങ്ങളെയെല്ലാം ഡൽഹിയിലെത്തിക്കുക എന്നത് തന്റെ പ്രിവിലേജ് ആണെന്ന് പറഞ്ഞാണ് റൂഡി അനൗൺസ്മെന്റ് അവസാനിപ്പിച്ചത്. മുൻ കേന്ദ്രമന്ത്രി തന്നെ പൈലറ്റായി വിമാനം പറത്തുന്നതും സഹപ്രവർത്തകരായ മന്ത്രിമാർ യാത്രക്കാരായി എത്തിയതും ഇന്ത്യൻ രാഷ്ട്രീയത്തിലെ തന്നെ കൗതുകകരമായ കാഴ്ചയായി മാറി. രാജ്യം ഡിജിറ്റൽ യുഗത്തിലും വികസനക്കുതിപ്പിലും മുന്നേറുമ്പോൾ വിഐപി പ്രോട്ടോക്കോളുകൾക്കപ്പുറം സാധാരണ വിമാനത്തിൽ ജനപ്രതിനിധികൾ ഒന്നിച്ചു യാത്ര ചെയ്തതിനെ അഭിനന്ദിച്ച് നിരവധി പേരാണ് രംഗത്തെത്തുന്നത്.
