ലഖ്നൗ : ഉത്തർപ്രദേശിലെ ഹാപ്പൂരിൽ ശനിയാഴ്ച നടന്ന മഹാറാണാ പ്രതാപ് ജയന്തി ആഘോഷങ്ങൾക്കിടെ സംഘർഷം. മഹാറാണാ പ്രതാപ് ജയന്തിയോടനുബന്ധിച്ച് ഗ്രാമത്തിലൂടെ നടന്ന ഘോഷയാത്രക്ക് നേരെ കല്ലേറ് ഉണ്ടായതോടെയാണ് സംഘർഷം ആരംഭിച്ചത്. തുടർന്ന് രണ്ട് വിഭാഗങ്ങൾ തമ്മിൽ കനത്ത ഏറ്റുമുട്ടൽ ഉണ്ടായി.
ഘോഷയാത്രയ്ക്ക് നേരെയുണ്ടായ കല്ലേറിൽ മൂന്ന് പേർക്ക് പരിക്കേറ്റു. ഘോഷയാത്രയിൽ പങ്കെടുത്ത ചില വാഹനങ്ങൾക്കും കേടുപാടുകൾ സംഭവിച്ചു. സംഭവവുമായി ബന്ധപ്പെട്ട് ഇതുവരെ രണ്ട് പേരെ അറസ്റ്റ് ചെയ്തിട്ടുണ്ട്. സംഘർഷത്തെത്തുടർന്ന് ദെഹ്റ ഗ്രാമത്തിലും പരിസര പ്രദേശങ്ങളിലും സുരക്ഷാ ക്രമീകരണങ്ങൾ കർശനമാക്കി. ഉന്നത പോലീസ് ഉദ്യോഗസ്ഥർ സ്ഥലത്തെത്തി സ്ഥിതിഗതികൾ നേരിട്ട് വിലയിരുത്തി. അക്രമികളെ തിരിച്ചറിയുന്നതിനും ഗ്രാമത്തിലെ സ്ഥിതി നിരീക്ഷിക്കുന്നതിനും പോലീസ് ഡ്രോണുകൾ ഉപയോഗിച്ചുള്ള നിരീക്ഷണങ്ങൾ ഉൾപ്പടെ നടത്തുന്നുണ്ട്. പൊതുസമാധാനം തകർക്കാൻ ശ്രമിക്കുന്നവർക്കെതിരെ കർശനമായ നിയമനടപടികൾ സ്വീകരിക്കുമെന്ന് പോലീസ് അറിയിച്ചു.
