കഠിനമായ ഉഷ്ണതരംഗത്തിനിടയിൽ ഒരു റാപ്പിഡോ ഡ്രൈവറും യാത്രക്കാരിയും തമ്മിലുണ്ടായ ഹൃദയസ്പർശിയായ ഇടപെടൽ സോഷ്യൽ മീഡിയയിൽ വൈറലാകുന്നു. ചെറിയൊരു കരുണയുടെ സ്പർശം ഒരാളുടെ ജീവിതത്തിൽ എത്രത്തോളം വലിയ മാറ്റമുണ്ടാക്കുമെന്ന് തെളിയിക്കുന്നതാണ് ഈ സംഭവം.
യാത്രയ്ക്കിടയിൽ തനിക്ക് കുടിക്കാൻ കരുതിയിരുന്ന തണുത്ത പാനീയം ബൈക്ക് ടാക്സി ഡ്രൈവർക്ക് നൽകിയ യാത്രക്കാരിയുടെ പ്രവൃത്തിയാണ് കയ്യടി നേടുന്നത്. യാത്രയ്ക്കിടയിൽ കാലാവസ്ഥയെക്കുറിച്ചും കഠിനമായ ചൂടിനെക്കുറിച്ചും ഡ്രൈവറുമായി യാത്രക്കാരി സംസാരിച്ചിരുന്നു. യാത്ര അവസാനിച്ചപ്പോൾ, തന്റെ കയ്യിലുണ്ടായിരുന്ന പാനീയം അദ്ദേഹത്തിന് നൽകുകയും ആരോഗ്യം ശ്രദ്ധിക്കണമെന്ന് നിർദ്ദേശിക്കുകയും ചെയ്തു. “നിങ്ങളുടെ ആരോഗ്യത്തിൽ ശ്രദ്ധിക്കണം, ധാരാളം വെള്ളം കുടിക്കണം” എന്ന് പറഞ്ഞ് പാനീയം നൽകിയപ്പോൾ ആ ഡ്രൈവർ വികാരാധീനനായി.
യാത്രക്കാരിയുടെ സ്നേഹപ്രകടനത്തിന് മുന്നിൽ കണ്ണ് നിറഞ്ഞുകൊണ്ട് അദ്ദേഹം പറഞ്ഞ മറുപടിയാണ് സോഷ്യൽ മീഡിയയുടെ ഹൃദയം കവരുന്നത്. “ഞങ്ങളെക്കുറിച്ചൊന്നും ആരും അധികം ചിന്തിക്കാറില്ല” എന്നായിരുന്നു അദ്ദേഹത്തിന്റെ വാക്കുകൾ. ലോകം കുറച്ചുകൂടി കാരുണ്യമുള്ളതായാൽ ജീവിതം എത്ര മനോഹരമാകുമായിരുന്നു എന്ന് യാത്രക്കാരി തന്റെ എക്സ് (X) പോസ്റ്റിൽ കുറിച്ചു.
“മനുഷ്യത്വം മരിച്ചിട്ടില്ല” എന്നായിരുന്നു പോസ്റ്റിന് താഴെ വന്ന ഒരു കമന്റ്. താൻ ഓർഡർ ചെയ്യുന്ന സാധനങ്ങൾ എത്തിക്കുന്നവർക്ക് എപ്പോഴും ഒരു തണുത്ത പാനീയം നൽകാറുണ്ടെന്ന് മറ്റൊരാൾ കുറിച്ചു. കഠിനമായ കാലാവസ്ഥയിൽ നമുക്ക് വേണ്ടി ജോലി ചെയ്യുന്നവരെ ചേർത്തുപിടിക്കേണ്ടതിന്റെ ആവശ്യകതയാണ് ഈ പോസ്റ്റ് ചർച്ചയാക്കുന്നത്.
