വാഷിംഗ്ടൺ : അമേരിക്കൻ പ്രസിഡന്റിന്റെ ഔദ്യോഗിക വസതിയായ വൈറ്റ് ഹൗസിന് നേരെ ആക്രമണം. വൈറ്റ് ഹൗസിന്റെ സുരക്ഷാ ചെക്ക്പോയിന്റിന് നേരെ ഒരാൾ വെടിവെപ്പ് നടത്തുകയായിരുന്നു. പ്രസിഡണ്ട് ഡൊണാൾഡ് ട്രംപ് വൈറ്റ് ഹൗസിനുള്ളിൽ ഉള്ള സമയത്ത് ആയിരുന്നു വെടിവെപ്പ് ഉണ്ടായത്. തുടർന്ന് സുരക്ഷാ ഉദ്യോഗസ്ഥർ നടത്തിയ പ്രത്യാക്രമണത്തിൽ അക്രമി കൊല്ലപ്പെട്ടു.
വെടിവെപ്പിൽ വഴിയാത്രക്കാരനായ ഒരു സാധാരണക്കാരനും പരിക്കേറ്റിട്ടുണ്ട്. പ്രസിഡന്റ് ഡൊണാൾഡ് ട്രംപ് പൂർണ്ണ സുരക്ഷിതനാണെന്നും അദ്ദേഹത്തിന് യാതൊരുവിധ പരിക്കുകളുമില്ലെന്നും യുഎസ് സീക്രട്ട് സർവീസ് വക്താവ് അറിയിച്ചു. പ്രാദേശിക സമയം വൈകുന്നേരം 6:00 മണിയോടെ വൈറ്റ് ഹൗസ് കോംപ്ലക്സിന് പുറത്തുള്ള 17-ാം സ്ട്രീറ്റ് പെൻസിൽവാനിയ അവന്യൂവിലുള്ള സീക്രട്ട് സർവീസ് ചെക്ക്പോയിന്റിലേക്ക് 21 കാരനായ അക്രമി നടന്നു വരികയായിരുന്നു. തുടർന്ന് കയ്യിലുണ്ടായിരുന്ന ബാഗിൽ നിന്ന് റിവോൾവർ പുറത്തെടുത്ത് ഡ്യൂട്ടിയിലുണ്ടായിരുന്ന ഉദ്യോഗസ്ഥർക്ക് നേരെ ഇയാൾ പെട്ടെന്ന് മൂന്ന് തവണ വെടിയുതിർക്കുകയായിരുന്നു എന്ന് പിന്നീട് വൈറ്റ് ഹൗസ് വൃത്തങ്ങൾ ഔദ്യോഗികമായി അറിയിച്ചു.
