ഐപിഎൽ 2026 സീസണിലെ ദയനീയ പ്രകടനത്തിന് പിന്നാലെ മുംബൈ ഇന്ത്യൻസിൽ വൻ അഴിച്ചുപണിക്ക് കളമൊരുങ്ങുന്നു. നായകൻ ഹാർദിക് പാണ്ഡ്യയെ ക്യാപ്റ്റൻ സ്ഥാനത്തുനിന്ന് നീക്കാനും, അദ്ദേഹം ടീം വിട്ടുപോകാൻ ഒരുങ്ങുകയാണെന്നുമാണ് പുതിയ റിപ്പോർട്ടുകൾ. ഐപിഎൽ 2026 സീസണിൽ 14 മത്സരങ്ങളിൽ നിന്ന് വെറും 4 വിജയങ്ങൾ മാത്രം നേടാനായ മുംബൈ ഇന്ത്യൻസ് കടുത്ത തീരുമാനങ്ങളിലേക്ക് കടക്കുന്നു. മാനേജ്മെന്റുമായുള്ള ബന്ധം വഷളായതിനെത്തുടർന്ന് ഹാർദിക് പാണ്ഡ്യ ടീം വിടാൻ ആലോചിക്കുന്നതായാണ് വിവരം.
പുതിയ ക്യാപ്റ്റൻ, രോഹിത്തിന്റെ അനുഗ്രഹം തേടും: അടുത്ത ക്യാപ്റ്റനെ തീരുമാനിക്കുമ്പോൾ മുൻ നായകൻ രോഹിത് ശർമ്മയുടെ അഭിപ്രായത്തിനും അനുഗ്രഹത്തിനും മുംബൈ ഇന്ത്യൻസ് മാനേജ്മെന്റ് മുൻഗണന നൽകും. 2023-ൽ രോഹിത്തിന് പകരം ഹാർദിക്കിനെ ക്യാപ്റ്റനാക്കിയത് വലിയ പിഴവായിരുന്നുവെന്ന് മാനേജ്മെന്റിന് തിരിച്ചറിവുണ്ടായിട്ടുണ്ട്.
രോഹിത് ശർമ്മ മുംബൈ ഇന്ത്യൻസിന്റെ ക്യാപ്റ്റൻ സ്ഥാനത്തേക്ക് മടങ്ങിവരില്ല എന്നത് ഉറപ്പാണ്. എന്നാൽ പുതിയ നായകനെ കണ്ടെത്തുന്നതിൽ അദ്ദേഹം നിർണ്ണായക പങ്കുവഹിക്കും. മാനേജ്മെന്റുമായുള്ള അഭിപ്രായവ്യത്യാസം കാരണം ഹാർദിക് പാണ്ഡ്യ ടീം വിടാൻ സാധ്യതയുണ്ടെന്നാണ് റിപ്പോർട്ടുകൾ. “മാനേജ്മെന്റുമായി നല്ല ബന്ധമില്ലാത്ത ഒരു കമ്പനിയിൽ നിങ്ങൾക്ക് ജോലി ചെയ്യാൻ കഴിയുമോ?” എന്നാണ് വിഷയത്തിൽ ഒരു മുൻ താരം പ്രതികരിച്ചത്.
അടുത്ത രണ്ടാഴ്ചയ്ക്കുള്ളിൽ ഹാർദിക് പാണ്ഡ്യയുടെ കാര്യത്തിൽ മുംബൈ ഇന്ത്യൻസ് മാനേജ്മെന്റ് ഔദ്യോഗികമായി ഒരു അന്തിമ തീരുമാനം അറിയിക്കുമെന്നാണ് പ്രതീക്ഷിക്കുന്നത്.
