കരിപ്പൂർ വിമാനത്താവളം വഴി കടത്താൻ ശ്രമിച്ച കള്ളക്കടത്ത് സ്വർണം തട്ടിയെടുക്കാൻ ശ്രമിച്ച ക്വട്ടേഷൻ സംഘത്തോടൊപ്പം സിപിഎം ബ്രാഞ്ച് സെക്രട്ടറി പോലീസ് പിടിയിലായ സംഭവം രാഷ്ട്രീയ കേരളത്തിൽ വൻ വിവാദമാകുന്നു. കണ്ണൂർ പേരാവൂർ ഏരിയയിലെ മുഴക്കുന്ന് ലോക്കൽ കമ്മിറ്റിക്ക് കീഴിലുള്ള വട്ടപ്പൊയിൽ ബ്രാഞ്ച് സെക്രട്ടറി വി. ശരത്തിനെയാണ് പാർട്ടിയിൽ നിന്ന് അടിയന്തരമായി പുറത്താക്കിയത്. പാർട്ടിക്ക് കടുത്ത അവമതിപ്പ് ഉണ്ടാക്കുന്ന തരത്തിൽ പ്രവർത്തിച്ചതിനാലാണ് ശരത്തിനെ പ്രാഥമിക അംഗത്വത്തിൽ നിന്ന് പുറത്താക്കിയതെന്ന് സിപിഎം ജില്ലാ കമ്മിറ്റി ഔദ്യോഗിക പ്രസ്താവനയിലൂടെ അറിയിച്ചു. കരിപ്പൂർ വിമാനത്താവളത്തിന് സമീപത്തുനിന്നും സ്വർണം പൊട്ടിക്കാനുള്ള (കള്ളക്കടത്ത് സ്വർണം തട്ടിയെടുക്കൽ) നീക്കത്തിനിടെ കഴിഞ്ഞ ദിവസമാണ് ശരത് ഉൾപ്പെടെ 14 പേരടങ്ങുന്ന സംഘത്തെ പോലീസ് തന്ത്രപരമായി പിടികൂടിയത്.
നേരത്തെയും കണ്ണൂർ കേന്ദ്രീകരിച്ച് പ്രവർത്തിക്കുന്ന സ്വർണ്ണക്കടത്ത് ക്വട്ടേഷൻ സംഘങ്ങളും സിപിഎം പ്രവർത്തകരും തമ്മിലുള്ള അവിശുദ്ധ ബന്ധം സംസ്ഥാനത്ത് വലിയ രാഷ്ട്രീയ കൊടുങ്കാറ്റ് ഉയർത്തിയിരുന്നു. അന്ന് അത്തരം സംഘങ്ങളെ പാർട്ടി പരസ്യമായി തള്ളിപ്പറയുകയും ക്രിമിനൽ പശ്ചാത്തലമുള്ളവർക്കെതിരെ കർശന നടപടി സ്വീകരിക്കുമെന്ന് പ്രഖ്യാപിക്കുകയും ചെയ്തിരുന്നതാണ്. എന്നാൽ, പാർട്ടി നേതൃത്വത്തിന്റെ കണ്ണ് വെട്ടിച്ച് വീണ്ടും താഴേത്തട്ടിലുള്ള ഉത്തരവാദിത്തപ്പെട്ട ബ്രാഞ്ച് സെക്രട്ടറി തന്നെ ഇത്തരം മാഫിയാ സംഘങ്ങളുടെ തലവനായി രംഗത്തിറങ്ങിയത് സിപിഎമ്മിനെ കടുത്ത പ്രതിരോധത്തിലാക്കിയിരിക്കുകയാണ്.
സംഭവം പുറത്തുവന്നതോടെ പ്രതിപക്ഷ പാർട്ടികൾ സർക്കാരിനും സിപിഎമ്മിനുമെതിരെ ശക്തമായ വിമർശനവുമായി രംഗത്തെത്തിക്കഴിഞ്ഞു. അതേസമയം, വിഷയം സമൂഹമാധ്യമങ്ങളിലും വലിയ ചേരിതിരിവിനും വാക്പോരിനും കാരണമായിട്ടുണ്ട്. പാർട്ടി അനുകൂലികളും സൈബർ സഖാക്കളും പ്രതിരോധിക്കാൻ പാടുപെടുമ്പോൾ, കടുത്ത ട്രോളുകളും വിമർശനങ്ങളുമായി എതിരാളികൾ സൈബർ ഇടം കീഴടക്കുകയാണ്.
