ലോക ക്രിക്കറ്റിലെ വമ്പന്മാരായ ഓസ്ട്രേലിയയെ പാഠം പഠിപ്പിച്ച് ധോണിയുടെ യുവപ്പട പ്രഥമ ടി20 ലോകകപ്പിന്റെ ഫൈനലിൽ പ്രവേശിച്ച ആ മത്സരം നിങ്ങൾ ഓർക്കുന്നുണ്ടോ? ഒരു മാസ് പടത്തിന്റെ ക്ലൈമാക്സ് രംഗങ്ങളെപ്പോലും വെല്ലുന്ന ഉദ്വേഗഭരിതമായ പോരാട്ടത്തിൽ 15 റൺസിനാണ് ഇന്ത്യ ഓസീസിനെ തറപറ്റിച്ചത്.ക്രിക്കറ്റ് ലോകം ഇന്നേവരെ കാണാത്ത തരത്തിലുള്ള ഒരു അതിശയിപ്പിക്കുന്ന ബാറ്റിങ് വിരുന്നിനാണ് ഡർബൻ സാക്ഷ്യം വഹിച്ചത്. ടോസ് നേടി ബാറ്റിങ്ങിനിറങ്ങിയ ഇന്ത്യക്ക് തുടക്കത്തിൽ തന്നെ തിരിച്ചടികൾ നേരിട്ടു. എന്നാൽ പിന്നീട് ക്രീസിലെത്തിയത് സിക്സറുകളുടെ സുൽത്താൻ യുവരാജ് സിങ്ങായിരുന്നു.
ഇംഗ്ലണ്ടിനെതിരെ ആറ് സിക്സറുകൾ അടിച്ച് ചരിത്രം സൃഷ്ടിച്ച യുവരാജ്, ഓസ്ട്രേലിയൻ ബൗളർമാരെയും കണക്കറ്റ് പ്രഹരിച്ചു. വെറും 30 പന്തിൽ നിന്ന് 5 സിക്സറുകളും 5 ഫോറുകളുമടക്കം 70 റൺസാണ് യുവി അടിച്ചുകൂട്ടിയത്. ലോകത്തിലെ ഏറ്റവും വേഗമേറിയ ബൗളർമാരിൽ ഒരാളായ ബ്രെറ്റ് ലിയുടെ പന്തിൽ യുവരാജ് അടിച്ച 119 മീറ്റർ നീളമുള്ള സിക്സർ ഗാലറിയെ നിശ്ചലമാക്കി. ക്യാപ്റ്റൻ എം.എസ്. ധോണിയുടെ (18 പന്തിൽ 36) വെടിക്കെട്ട് കൂടിയായപ്പോൾ ഇന്ത്യ 20 ഓവറിൽ 188 റൺസ് എന്ന കൂറ്റൻ സ്കോർ പച്ചപ്പുല്ലിൽ എഴുതിച്ചേർത്തു.
189 റൺസ് വിജയലക്ഷ്യവുമായി ഇറങ്ങിയ ഓസ്ട്രേലിയയ്ക്ക് വേണ്ടി മാത്യു ഹെയ്ഡനും (62) ആൻഡ്രൂ സൈമൺസും (43) അനായാസം ബാറ്റ് വീശിയപ്പോൾ ഇന്ത്യൻ ആരാധകർ നെഞ്ചിടിപ്പോടെയാണ് കളി കണ്ടത്. കളി കൈവിട്ടുപോകുമെന്ന ഘട്ടത്തിലാണ് മലയാളി താരം എസ്. ശ്രീശാന്ത് രക്ഷകനായി അവതരിച്ചത്.അപകടകാരിയായ മാത്യു ഹെയ്ഡന്റെ വിക്കറ്റ് തെറിപ്പിച്ചുകൊണ്ട് ശ്രീശാന്ത് നടത്തിയ ആക്രോഷവും പിച്ചിലെ ആഹ്ലാദപ്രകടനവും സ്റ്റേഡിയത്തെ ഇളക്കിമറിച്ചു.
തീയുണ്ടകൾ പോലെയുള്ള പന്തുകളുമായി 4 ഓവറിൽ വെറും 12 റൺസ് മാത്രം വഴങ്ങി 2 വിക്കറ്റുകൾ വീഴ്ത്തിയ ശ്രീശാന്തിന്റെ സ്പെൽ മത്സരത്തിന്റെ ഗതി പൂർണ്ണമായി മാറ്റിമറിച്ചു.അവസാന ഓവറുകളിൽ ഹർഭജൻ സിങ്ങും ജോഗീന്ദർ ശർമ്മയും കൂടി നിയന്ത്രണം ഏറ്റെടുത്തതോടെ ഓസ്ട്രേലിയൻ ഇന്നിങ്സ് 173 റൺസിൽ അവസാനിച്ചു. അഹങ്കാരത്തോടെ വന്ന കംഗാരുപ്പടയെ അക്ഷരാർത്ഥത്തിൽ മുട്ടുകുത്തിച്ചുകൊണ്ട് ഇന്ത്യൻ സിംഹങ്ങൾ കലാശപ്പോരാട്ടത്തിന് യോഗ്യത നേടി.
