ഹൈദരാബാദിലെ ഐടി ഇടനാഴിയിൽ നിന്നും സോഷ്യൽ മീഡിയയെ ഒന്നടങ്കം ഞെട്ടിച്ചുകൊണ്ട് ഒരു വീഡിയോ ഇപ്പോൾ അതിവേഗം വൈറലാവുകയാണ്. മോട്ടോർ സൈക്കിളിന്റെ ഫ്യുവൽ ടാങ്കിന് മുകളിൽ ലാപ്ടോപ്പ് തുറന്നുവെച്ച്, അതിലേക്ക് നോക്കി ബൈക്കോടിക്കുന്ന ഒരു യുവാവിന്റെ ദൃശ്യങ്ങളാണ് കാർ യാത്രക്കാർ പകർത്തിയത്.
ഹൈദരാബാദിലെ മാധാപൂർ ഐടി കോറിഡോറിലുള്ള ഹിടെക് കമാൻ പരിസരത്തുവെച്ചാണ് ഈ അപകടകരമായ ദൃശ്യം ക്യാമറയിൽ പതിഞ്ഞത്. ട്രാഫിക്കിലൂടെ ബൈക്കോടിച്ചു പോകുമ്പോഴും യുവാവിന്റെ മുന്നിലിരുന്ന ലാപ്ടോപ്പ് സ്ക്രീൻ തെളിഞ്ഞുതന്നെ ഇരിക്കുന്നുണ്ടായിരുന്നു. വീഡിയോ പുറത്തുവന്നതോടെ സോഷ്യൽ മീഡിയയിൽ കടുത്ത പ്രതികരണങ്ങളാണ് ഉയരുന്നത്.
ഈ ദൃശ്യങ്ങളെ “വർക്ക് ഫ്രം ബൈക്ക്” എന്നും “വർക്ക് കൾച്ചറിന്റെ അങ്ങേയറ്റം” എന്നുമാണ് പലരും വിശേഷിപ്പിച്ചത്. തങ്ങളുടെ ജീവൻ പോലും പണയം വെച്ച് ഓഫീസിലേക്ക് പോകുന്ന വഴിയിൽപ്പോലും ജോലി ചെയ്യാൻ ജീവനക്കാരെ പ്രേരിപ്പിക്കുന്ന ആധുനിക കോർപ്പറേറ്റ് തൊഴിൽ സമ്മർദ്ദങ്ങളെ പലരും കടുത്ത ഭാഷയിൽ വിമർശിച്ചു. “ആഴ്ചയിൽ 70 മണിക്കൂർ ജോലി തികയ്ക്കാനുള്ള ഓട്ടത്തിലാകും പുള്ളി, ഇതാണ് ഇന്നത്തെ കാലത്തെ ഐടി ജോലികൾ,” എന്ന് ഒരു ഉപഭോക്താവ് പരിഹാസത്തോടെ കുറിച്ചു. സ്വന്തം ജീവനും മറ്റുള്ളവരുടെ ജീവനും അപകടത്തിലാക്കുന്ന ഈ പ്രവർത്തിക്കെതിരെ കടുത്ത ട്രാഫിക് നിയമനടപടികൾ സ്വീകരിക്കണമെന്ന് ഭൂരിഭാഗം ആളുകളും ആവശ്യപ്പെടുന്നു.
ഇത്തരത്തിൽ ലാപ്ടോപ്പ് ഉപയോഗിച്ച് ബൈക്ക് ഓടിക്കുന്ന സംഭവങ്ങൾ മുൻപും റിപ്പോർട്ട് ചെയ്യപ്പെട്ടിട്ടുണ്ട്. കഴിഞ്ഞ ഏപ്രിൽ മാസത്തിൽ, ഒരാൾ തന്റെ മോട്ടോർ സൈക്കിളിലിരുന്ന് ലാപ്ടോപ്പിലേക്ക് അതീവ ശ്രദ്ധയോടെ നോക്കുന്ന ഒരു വീഡിയോ ഇൻസ്റ്റാഗ്രാമിൽ വൈറലായിരുന്നു. മറ്റൊരു സംഭവത്തിൽ, ഒരു സ്ത്രീ ബൈക്കിന് പിന്നിലിരുന്ന് യാത്ര ചെയ്യുന്നതിനിടയിൽ ലാപ്ടോപ്പിൽ ജോലി ചെയ്യുന്ന ദൃശ്യങ്ങളും വലിയ രീതിയിൽ വിമർശിക്കപ്പെട്ടിരുന്നു.
'Work From Bike': Hyderabad Man Spotted With Laptop On Fuel Tank Of Vehicle, Video Viral pic.twitter.com/oTkGZryurC
— NDTV (@ndtv) June 13, 2026
