മഴ കാരണം 25 ഓവറാക്കി ചുരുക്കിയ ഇന്ത്യ-അഫ്ഗാനിസ്ഥാൻ ഒന്നാം ഏകദിനത്തിൽ ടി20 ശൈലിയിൽ തകർത്തടിച്ച് കെ.എൽ. രാഹുൽ. ഏകദിന ഫോർമാറ്റിലെ ഇന്ത്യയുടെ വിശ്വസ്തനായ ഈ മധ്യനിര ബാറ്റർ, തനിക്ക് ലഭിച്ച സുവർണ്ണാവസരം മുതലാക്കി വെറും 19 പന്തിൽ നിന്ന് 39 റൺസാണ് അടിച്ചുകൂട്ടിയത്. മത്സരത്തിൽ രാഹുൽ പറത്തിയ ഒരു സിക്സർ കണ്ട് ഡഗ്ഔട്ടിലിരുന്ന ഇന്ത്യൻ ഹെഡ് കോച്ച് ഗൗതം ഗംഭീർ വരെ അത്ഭുതപ്പെട്ടുപോയി. ഗംഭീറിന്റെ ആ ഭാവവ്യത്യാസം ഇപ്പോൾ സോഷ്യൽ മീഡിയയിൽ വലിയ രീതിയിൽ ചർച്ചയാകുകയാണ്.
കനത്ത മഴ കാരണം ഇരുവിഭാഗത്തിനും 25 ഓവർ വീതമാക്കി ചുരുക്കിയ മത്സരത്തിൽ അഫ്ഗാനിസ്ഥാൻ ഉയർത്തിയ 195 റൺസ് വിജയലക്ഷ്യം ഇന്ത്യ 22.5 ഓവറിൽ മറികടക്കുകയായിരുന്നു. ഇന്ത്യയുടെ വിജയത്തിൽ നിർണ്ണായക പങ്കുവഹിച്ചത് അവസാന ഓവറുകളിൽ കെ.എൽ. രാഹുൽ നടത്തിയ വെടിക്കെട്ട് ബാറ്റിംഗാണ്. ടി20 ടീമിലേക്കുള്ള തന്റെ തിരിച്ചുവരവ് പ്രഖ്യാപിക്കുന്ന തരത്തിലായിരുന്നു രാഹുലിന്റെ ബാറ്റിംഗ് പ്രകടനം. തന്റെ ഇന്നിങ്സിൽ 4 ഫോറുകളും 3 മനോഹരമായ സിക്സറുകളുമാണ് രാഹുൽ പറത്തിയത്.
ഇതിൽ രാഹുൽ അടിച്ച ഒരു അസാധ്യ സിക്സർ കണ്ട് ഹെഡ് കോച്ച് ഗൗതം ഗംഭീർ പോലും അമ്പരന്നു നിൽക്കുന്ന വീഡിയോ സോഷ്യൽ മീഡിയയിൽ വൈറലായി. ഹ്രസ്വ ഫോർമാറ്റിൽ തനിക്ക് ഇനിയും വലിയ കാര്യങ്ങൾ ചെയ്യാനാകുമെന്ന് ടീം മാനേജ്മെന്റിന് മുന്നിൽ തെളിയിക്കാൻ രാഹുലിന് ഈ ഇന്നിങ്സിലൂടെ സാധിച്ചു. മത്സരത്തിലെ വിജയത്തിന് ശേഷം ടീമിന്റെ പ്രകടനത്തെ വിലയിരുത്തി ക്യാപ്റ്റൻ ശുഭ്മൻ ഗിൽ സംസാരിച്ചു. തുടക്കത്തിൽ അഫ്ഗാനിസ്ഥാൻ കളിയിൽ വലിയ ആധിപത്യം പുലർത്തിയെങ്കിലും ഇന്ത്യ ശക്തമായി തിരിച്ചടിച്ചുവെന്ന് ഗിൽ പറഞ്ഞു.
“ഞങ്ങൾ തുടങ്ങിയ രീതി വെച്ച് അവർ കളി ഞങ്ങളിൽ നിന്ന് അകറ്റിയിരുന്നു. റഹ്മാനുള്ള ഗുർബാസ് മിന്നും പ്രകടനമാണ് കാഴ്ചവെച്ചത്. എന്നാൽ ഞങ്ങൾ നന്നായി പോരാടി തിരികെ വന്നു. ബാറ്റിംഗിന് അനുകൂലമായ പിച്ചായിരുന്നു ഇത്. ഞങ്ങൾ ബോൾ ചെയ്യുമ്പോൾ പന്തിന് ചെറിയ ഗ്രിപ്പ് ലഭിച്ചിരുന്നു, എന്നാൽ ബാറ്റിംഗിന് ഇറങ്ങിയപ്പോൾ പന്ത് നന്നായി ബാറ്റിലേക്ക് വരുന്നുണ്ടായിരുന്നു,” ഗിൽ വ്യക്തമാക്കി. മത്സരത്തിൽ മികച്ച ബോളിങ് കാഴ്ചവെച്ച നവാഗത താരം ഗുർനൂർ ബ്രാറിനെയും സ്പിന്നർ ഹർപ്രീത് ബ്രാറിനെയും ക്യാപ്റ്റൻ പ്രത്യേകം അഭിനന്ദിച്ചു.
പുതിയ പന്തിൽ മികച്ച രീതിയിൽ പന്തെറിയുകയും പിന്നീട് ഡെത്ത് ഓവറുകളിൽ വന്ന് വിക്കറ്റുകൾ വീഴ്ത്തുകയും ചെയ്ത ഗുർനൂറിന്റെ പ്രകടനം ഗംഭീരമായിരുന്നുവെന്ന് ഗിൽ പറഞ്ഞു. ആദ്യ ഓവറിൽ റൺസ് വഴങ്ങിയിട്ടും ശക്തമായി കളിയിലേക്ക് തിരിച്ചുവന്ന ഹർപ്രീത് ബ്രാറിന്റെ ബോളിങ്ങിനെയും ഗിൽ പുകഴ്ത്തി.
ഏകദിന മത്സരങ്ങളിൽ മധ്യ ഓവറുകൾ വളരെ നിർണ്ണായകമാണെന്നും ബോളിംഗിൽ നിരന്തരം വിക്കറ്റ് അവസരങ്ങൾ സൃഷ്ടിച്ച് സമ്മർദ്ദം ചെലുത്തണമെന്നും, ബാറ്റിംഗിൽ ഗ്യാപ്പുകൾ കണ്ടെത്തി സ്ട്രൈക്ക് റൊട്ടേറ്റ് ചെയ്യണമെന്നതുമാണ് ടീം മീറ്റിംഗുകളിൽ പ്രധാനമായും ചർച്ച ചെയ്യാറുള്ളതെന്നും ഗിൽ കൂട്ടിച്ചേർത്തു.
THE REACTION OF GAUTAM GAMBHIR ON KL RAHUL’S SIX. 🥶 pic.twitter.com/4UrvNk4srn
— Mufaddal Vohra (@mufaddal_vohra) June 13, 2026
