കോൺഗ്രസ് നേതാവ് രാഹുൽ ഗാന്ധിക്കെതിരെ കടുത്ത ജാതിവിമർശനവുമായി സിപിഎം കേന്ദ്ര കമ്മിറ്റി അംഗവും മുൻ മന്ത്രിയുമായ എ കെ ബാലൻ രംഗത്ത്. രാഹുൽ ഗാന്ധിയുടെ ഉള്ളിലുള്ളത് സവർണ ബോധമാണെന്ന് അദ്ദേഹം കുറ്റപ്പെടുത്തി. ഇന്ത്യ സഖ്യത്തിന്റെ യോഗത്തിൽ വെച്ച് പിണറായി വിജയനെ കെട്ടിപ്പിടിച്ച് ആലിംഗനം ചെയ്യാൻ തനിക്കാവില്ലെന്ന് രാഹുൽ ഗാന്ധി പറഞ്ഞിരുന്നു. കേരളത്തിലെ രാഷ്ട്രീയ പോരാട്ടം ചൂണ്ടിക്കാണിച്ചായിരുന്നു രാഹുലിന്റെ ഈ പരാമർശമെങ്കിലും, ഇതിന് പിന്നിൽ രാഹുലിന്റെ മനസ്സിലുള്ള ജാതിബോധമാണെന്നാണ് എ കെ ബാലൻ ആരോപിക്കുന്നത്.
പ്രധാനമന്ത്രി നരേന്ദ്ര മോദിയെ പാർലമെന്റിൽ വെച്ചടക്കം കെട്ടിപ്പിടിക്കുന്നതിൽ രാഹുൽ ഗാന്ധിക്ക് യാതൊരുവിധ മടിയോ കുഴപ്പമോ ഉണ്ടായിരുന്നില്ലെന്ന് എ കെ ബാലൻ ചൂണ്ടിക്കാണിച്ചു. എന്നാൽ പിണറായി വിജയനെ കെട്ടിപ്പിടിക്കാൻ വരുമ്പോൾ മാത്രം രാഹുലിന് പ്രശ്നമുണ്ടാകുന്നു. ഈ വിവേചനത്തിന് കാരണം രാഹുൽ ഗാന്ധിയുടെ മനസ്സിന്റെ ഉള്ളിലുള്ള ജാതിബോധവും സവർണ ചിന്താഗതിയുമാണെന്നും എ കെ ബാലൻ ശക്തമായ ഭാഷയിൽ വിമർശിച്ചു.
