വിദേശ വനിതകൾക്ക് ഇന്ത്യയിൽ ഒറ്റയ്ക്ക് യാത്ര ചെയ്യാൻ സുരക്ഷിതത്വമില്ലെന്ന തരത്തിലുള്ള ചർച്ചകൾ സോഷ്യൽ മീഡിയയിൽ പലപ്പോഴും വരാറുണ്ട്. എന്നാൽ അത്തരം മുൻവിധികൾക്കും തെറ്റായ പ്രചാരണങ്ങൾക്കും മറുപടിയുമായി രംഗത്തെത്തിയിരിക്കുകയാണ് ഒരു ഓസ്‌ട്രേലിയൻ യുവതി. ഇന്ത്യയിലൂടെ ഒരു മാസം മുഴുവൻ ഒറ്റയ്ക്ക് യാത്ര ചെയ്ത തന്റെ യാത്രാനുഭവങ്ങൾ പങ്കുവെച്ചുകൊണ്ട് പെയ്ജ് എന്ന വ്ലോഗറാണ് ഇൻസ്റ്റാഗ്രാമിൽ വീഡിയോ പങ്കുവെച്ചിരിക്കുന്നത്. താൻ കണ്ടുമുട്ടിയതിൽ വെച്ച് ലോകത്തിലെ ഏറ്റവും അതിഥിപ്രിയരും കാരുണ്യമുള്ളവരുമായ മനുഷ്യരാണ് ഇന്ത്യക്കാർ എന്നാണ് പെയ്ജ് സാക്ഷ്യപ്പെടുത്തുന്നത്. ‘എന്റെ ജീവൻ കൊടുത്തും ഞാൻ വാദിക്കുന്ന ഒരു കാര്യമായിരിക്കും ഇത്’ (A hill I will die on) എന്ന ആമുഖത്തോടെയാണ് യുവതി തന്റെ അനുഭവം വിവരിക്കുന്നത്.
തനിക്ക് ഇന്ത്യയിൽ നിന്ന് ലഭിച്ച മറക്കാനാകാത്ത ചില അനുഭവങ്ങളും പെയ്ജ് പങ്കുവെക്കുന്നുണ്ട്. ഒരിക്കൽ അർദ്ധരാത്രിയിൽ ഡൽഹി വിമാനത്താവളത്തിൽ ഇറങ്ങി താൻ ബുക്ക് ചെയ്ത ഹോട്ടലിലേക്ക് പോകുമ്പോൾ ആ റോഡിൽ വാഹനങ്ങൾക്ക് നിയന്ത്രണമുണ്ടായിരുന്നു. എന്നാൽ തന്നെ വഴിയിൽ ഉപേക്ഷിക്കാൻ ആ ഊബർ ഡ്രൈവർ തയ്യാറായില്ല. സുരക്ഷിതമായി ഹോട്ടലിൽ എത്തുന്നതുവരെ അദ്ദേഹം വണ്ടി പാർക്ക് ചെയ്ത് തന്റെ കൂടെ നടന്നു വന്നുവെന്ന് പെയ്ജ് ഓർക്കുന്നു. അപരിചിതനായ ഒരു മനുഷ്യൻ തന്റെ സുരക്ഷയ്ക്കായി അത്രയധികം മുൻകരുതൽ എടുത്തത് തന്നെ അത്ഭുതപ്പെടുത്തിയെന്ന് യുവതി പറയുന്നു. മറ്റൊരു ദിവസം ഒരു മെഡിക്കൽ ഷോപ്പിൽ നിന്ന് സാധനം വാങ്ങിയപ്പോൾ ബാക്കി തരാൻ ചില്ലറ പൈസയില്ലാത്തതിനാൽ കടക്കാരൻ തനിക്ക് സൗജന്യമായി ഒരു ഹാൻഡ് സാനിറ്റൈസർ നൽകിയ കാര്യവും വീഡിയോയിൽ പങ്കുവെക്കുന്നുണ്ട്.
വഴി തെറ്റിപ്പോയപ്പോൾ ബസ് സ്റ്റേഷൻ വരെ കൂടെ നടന്നു വന്ന ഒരു സ്ത്രീയെക്കുറിച്ചും, കനത്ത മഴയത്ത് പെട്ടുപോയപ്പോൾ സ്കൂട്ടറിൽ ലിഫ്റ്റ് നൽകിയ ഒരു റസ്റ്റോറന്റ് ഉടമയെക്കുറിച്ചും പെയ്ജ് ഹൃദയസ്പർശിയായി കുറിച്ചു. യാത്രയ്ക്കിടയിൽ കണ്ടുമുട്ടിയ ഒരു പ്രായമായ അമ്മ താൻ തീർച്ചയായും രുചിച്ചു നോക്കണമെന്ന് നിർബന്ധിച്ച് ഒരു പ്ലേറ്റ് പക്കോഡ സ്നേഹത്തോടെ നൽകിയതും പെയ്ജിന്റെ മനസ്സിൽ മായാതെ കിടക്കുന്നു. ഒറ്റയ്ക്ക് ഒരു വിദേശരാജ്യത്തേക്ക് യാത്ര തിരിക്കുമ്പോൾ തനിക്ക് വലിയ ഭയവും ആശങ്കയും ഉണ്ടായിരുന്നുവെന്നും എന്നാൽ ഇന്ത്യയിൽ കാലുകുത്തിയ നിമിഷം മുതൽ ആ ഭയമെല്ലാം അലിഞ്ഞുപോയെന്നും അവർ തുറന്നുപറഞ്ഞു. തന്നെ അത്രയേറെ സ്നേഹത്തോടെയും ആദരവോടെയുമാണ് ഇവിടുത്തെ ജനങ്ങൾ വരവേറ്റത്. ഇന്ത്യയെ ഇത്രയധികം സ്നേഹിക്കാൻ കാരണവും ഈ മനുഷ്യരുടെ നല്ല മനസ്സുകളാണെന്ന് പെയ്ജ് പറയുന്നു.
ഇൻസ്റ്റാഗ്രാമിൽ പങ്കുവെച്ച ഈ വീഡിയോ ഇതിനോടകം തന്നെ ലക്ഷക്കണക്കിന് ആളുകളാണ് കണ്ടത്. ഭാരതീയ സംസ്കാരത്തിന്റെ ഭാഗമായ ‘അതിഥി ദേവോ ഭവ’ എന്ന സങ്കൽപ്പത്തെ ഓർമ്മിപ്പിക്കുന്നതാണ് ഈ വിദേശ വനിതയുടെ അനുഭവമെന്ന് നിരവധി പേർ കമന്റ് ചെയ്തു. ലോകത്തിന് മുന്നിൽ ഇന്ത്യയെക്കുറിച്ച് നല്ലൊരു സന്ദേശം എത്തിച്ചതിന് യുവതിക്ക് നന്ദി അറിയിച്ചുകൊണ്ടുള്ള കമന്റുകളും വീഡിയോയ്ക്ക് താഴെ നിറയുകയാണ്.
