ആഗോള നയതന്ത്ര വേദികളിൽ ഭാരതത്തിന്റെ കരുത്തും സ്വാധീനവും എത്രത്തോളം വർദ്ധിച്ചുവെന്ന് തെളിയിക്കുന്ന മറ്റൊരു അപൂർവ്വ മുഹൂർത്തത്തിന് കൂടി ലോകം സാക്ഷ്യം വഹിച്ചിരിക്കുകയാണ്. ഫ്രാൻസിൽ നടന്ന ജി7 ഉച്ചകോടിയുടെ സമാപനത്തിന് പിന്നാലെ, എല്ലാവിധ നയതന്ത്ര പ്രോട്ടോക്കോളുകളും കാറ്റിൽപ്പറത്തി പ്രധാനമന്ത്രി നരേന്ദ്ര മോദിക്ക് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ നൽകിയ യാത്രയയപ്പാണ് ഇപ്പോൾ അന്താരാഷ്ട്ര തലത്തിൽ ശ്രദ്ധേയമാകുന്നത്. ലോക നേതാക്കൾ നോക്കിനിൽക്കെ ഭാരതത്തിന്റെ സ്വന്തം മാതൃഭാഷയായ ഹിന്ദിയിലാണ് മാക്രോൺ പ്രധാനമന്ത്രി നരേന്ദ്ര മോദിക്ക് വിടവാങ്ങൽ സന്ദേശം നൽകിയത്.
തന്റെ ഔദ്യോഗിക സോഷ്യൽ മീഡിയ അക്കൗണ്ടുകളിലൂടെ പങ്കുവെച്ച പ്രത്യേക വീഡിയോ സന്ദേശത്തിലാണ് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഹിന്ദിയിൽ സംസാരിച്ചത്. “പ്രിയ മിത്ര നരേന്ദ്ര, മുഛെ ബഹുത് ഖുഷി ഹേ, ദൗരെ കേ ലിയേ സ്വാഗത് കർതേ, ഫ്രാൻസ് ഭാരത് കീ ദോസ്തി അമർ രഹേ” (പ്രിയ സുഹൃത്ത് നരേന്ദ്ര, അങ്ങയുടെ ഈ സന്ദർശനത്തിൽ എനിക്ക് ഏറെ സന്തോഷമുണ്ട്. ഫ്രാൻസ്-ഭാരത സൗഹൃദം ശാശ്വതമായി നിലനിൽക്കട്ടെ) എന്നായിരുന്നു മാക്രോണിന്റെ വാക്കുകൾ. അല്പം പ്രയാസപ്പെട്ടാണെങ്കിലും അതീവ ഹൃദ്യമായി ഹിന്ദി വാചകങ്ങൾ പൂർത്തിയാക്കിയ ശേഷം, താൻ പറഞ്ഞത് ശരിയാണോ എന്ന ഭാവത്തിൽ “ഇത് ശരിയാണെന്ന് ഞാൻ കരുതുന്നു” എന്ന് മോദിയെ നോക്കി പുഞ്ചിരിയോടെ മാക്രോൺ ചോദിക്കുകയും ചെയ്തു. തുടർന്ന് ഇംഗ്ലീഷിലേക്ക് മാറിയ അദ്ദേഹം, ഭാരതവുമായുള്ള സൗഹൃദത്തിന് നന്ദി പറയുകയും ഫ്രാൻസിന് മോദിയോടുള്ള സ്നേഹം വെളിപ്പെടുത്തുകയും ചെയ്തു. സന്ദേശത്തിന്റെ ഒടുവിൽ “ജയ് ഹിന്ദ്” എന്ന് മാക്രോൺ ആവേശത്തോടെ വിളിച്ചുപറഞ്ഞത് ഭാരതീയർക്ക് ഇരട്ടി അഭിമാനമായി.
പ്രധാനമന്ത്രി നരേന്ദ്ര മോദിയുടെ വ്യക്തിപ്രഭാവവും ശക്തമായ നയതന്ത്ര നീക്കങ്ങളും കാരണം വിദേശ മണ്ണിൽ ഭാരതത്തിന്റെ അന്തസ്സ് വാനോളമുയർന്നുവെന്നാണ് ഈ സംഭവം വ്യക്തമാക്കുന്നത്. മുൻകാലങ്ങളിൽ പാശ്ചാത്യ ശക്തികൾക്ക് മുന്നിൽ കൈകൂപ്പി നിന്നിരുന്ന ഒരു വിദേശനയത്തിൽ നിന്നും, ഇന്ന് ഭാരതത്തിന്റെ ഭാഷയും സംസ്കാരവും ലോക നേതാക്കൾ അഭിമാനത്തോടെ നെഞ്ചേറ്റുന്ന തരത്തിലേക്ക് രാജ്യം മാറിയിരിക്കുന്നു. ഫ്രാൻസിലെ നൈസ്, എവിയൻ, പാരീസ് എന്നീ നഗരങ്ങളിൽ നടത്തിയ സന്ദർശനവും ജി7 ഉച്ചകോടിയിലെ പങ്കാളിത്തവും ഇരുരാജ്യങ്ങളും തമ്മിലുള്ള തന്ത്രപ്രധാനമായ ആഗോള പങ്കാളിത്തത്തെ കൂടുതൽ ശക്തമാക്കിയിട്ടുണ്ട്. പ്രതിരോധം, ബഹിരാകാശം, നിർമ്മിത ബുദ്ധി (AI) തുടങ്ങിയ മേഖലകളിൽ വൻ വികസനക്കുതിപ്പിനാണ് ഈ സന്ദർശനം വഴിയൊരുക്കിയത്.
സോഷ്യൽ മീഡിയയിൽ ഈ വീഡിയോ പ്രത്യക്ഷപ്പെട്ടതോടെ നിമിഷങ്ങൾക്കകമാണ് ഇത് ആഗോളതലത്തിൽ തരംഗമായി മാറിയത്. ഭാരതീയ ദേശീയതയെയും രാജ്യത്തിന്റെ വളർന്നുവരുന്ന ആഗോള ശക്തിയെയും പ്രകീർത്തിച്ചുകൊണ്ട് ലക്ഷക്കണക്കിന് ആളുകളാണ് വീഡിയോ പങ്കുവെക്കുന്നത്. വിദേശ രാജ്യത്തലവന്മാർ പോലും നരേന്ദ്ര മോദിയെയും ഭാരതത്തെയും ഇത്രമേൽ ആദരിക്കുന്നത് കാണുമ്പോൾ അഭിമാനമുണ്ടെന്ന് നെറ്റിസൺസ് കുറിക്കുന്നു.
