സംസ്ഥാനത്ത് ലഹരി വ്യാപനം വർദ്ധിക്കുന്ന സാഹചര്യത്തിൽ, ഓൺലൈൻ ഫുഡ് ഡെലിവറി ജീവനക്കാർക്ക് കർശന താക്കീതുമായി ആഭ്യന്തര മന്ത്രി രമേശ് ചെന്നിത്തല രംഗത്ത്. സ്വിഗ്ഗി , സൊമാറ്റോ (തുടങ്ങിയ ഓൺലൈൻ പ്ലാറ്റ്ഫോമുകളിലെ ഡെലിവറി ഏജന്റുമാർ ലഹരി വിൽപ്പന നടത്തുന്നതായി വ്യാപകമായി പരാതികൾ ലഭിച്ചിട്ടുണ്ടെന്നും, ഈ പ്രവണത തുടർന്നാൽ അതികർശനമായ നിയമനടപടികൾ നേരിടേണ്ടിവരുമെന്നും അദ്ദേഹം മുന്നറിയിപ്പ് നൽകി.
സംസ്ഥാനത്തെ ലഹരിമാഫിയയെ അമർച്ച ചെയ്യാൻ ലക്ഷ്യമിട്ട് ആരംഭിച്ച ‘ഓപ്പറേഷൻ തൂഫാൻ’ (കേസുകളിൽ കർശനമായ നിലപാടാണ് സർക്കാർ സ്വീകരിക്കുന്നത്. ഓപ്പറേഷൻ തൂഫാനുമായി ബന്ധപ്പെട്ട് രജിസ്റ്റർ ചെയ്യുന്ന കേസുകളിൽ യാതൊരു വിധത്തിലുള്ള ബാഹ്യ ഇടപെടലുകളോ ശുപാർശകളോ അനുവദിക്കില്ലെന്ന് പോലീസിന് കർശന നിർദ്ദേശം നൽകിയിട്ടുണ്ട്. നിയമം കൃത്യമായി നടപ്പാക്കുന്നതിൽ ഒരു വിട്ടുവീഴ്ചയുമുണ്ടാകില്ല.
ഓൺലൈൻ ഡെലിവറിക്കാർക്ക് പുറമെ, ആംബുലൻസുകൾ ഉപയോഗിച്ചും സംസ്ഥാനത്ത് ലഹരിക്കടത്ത് നടക്കുന്നതായി പരാതികൾ ലഭിച്ചിട്ടുണ്ട്. ജീവൻ രക്ഷാ വാഹനങ്ങളെന്ന പരിഗണന മുതലെടുത്തുള്ള ഈ നീക്കം തടയാൻ ഇത്തരം വാഹനങ്ങളും ഇനി മുതൽ കർശന പരിശോധനയ്ക്ക് വിധേയമാക്കും. ലഹരിക്കെതിരെയുള്ള സർക്കാരിന്റെയും പോലീസിന്റെയും പോരാട്ടം വിജയിക്കാൻ പൊതുജനങ്ങളുടെ സജീവ പങ്കാളിത്തം അനിവാര്യമാണെന്ന് ആഭ്യന്തരമന്ത്രി ഓർമ്മിപ്പിച്ചു. ജനങ്ങളുടെ പിന്തുണയെ സ്വാഗതം ചെയ്ത അദ്ദേഹം സമൂഹത്തോട് ഒരു പ്രധാന ആഹ്വാനവും നടത്തി,”ലഹരിക്കെതിരായ ഈ പോരാട്ടത്തിൽ ജനങ്ങൾ തന്നെ ‘തൂഫാൻ വാരിയേഴ്സ്’ ആയി മുന്നിട്ടിറങ്ങണം.”
