ലോകത്തിലെ ഏറ്റവും അത്യാധുനികവും പരിഷ്കൃതവുമായ നഗരമെന്ന ഖ്യാതി നിലനിർത്തുന്നതിനും കൂടുതൽ ഉയരങ്ങളിലേക്ക് കുതിക്കുന്നതിനുമായി പൊതു ഇടങ്ങളിലെ പെരുമാറ്റ രീതികൾക്കും ആഘോഷങ്ങൾക്കും കർശന നിയന്ത്രണങ്ങളുമായി ദുബായ് ഭരണകൂടം. നഗരത്തിന്റെ പാരമ്പര്യവും സാംസ്കാരിക തനിമയും ഒപ്പം അന്തസ്സും കാത്തുസൂക്ഷിക്കുക എന്ന ലക്ഷ്യത്തോടെയാണ് പുതിയ പരിഷ്കാരങ്ങൾ ഏർപ്പെടുത്തുന്നത്. ദുബായ് സിവിലിറ്റി കമ്മിറ്റിയുടെ അഞ്ചാമത് യോഗത്തിലാണ് ഇതുസംബന്ധിച്ച സുപ്രധാന തീരുമാനങ്ങൾ കൈക്കൊണ്ടത്. ഇതിന്റെ ഭാഗമായി പൊതുസ്ഥലങ്ങളിൽ പാലിക്കേണ്ട മര്യാദകളും പെരുമാറ്റച്ചട്ടങ്ങളും വിശദമായി ഉൾക്കൊള്ളിച്ച് പ്രത്യേക ‘സിവിലിറ്റി ഗൈഡ്ബുക്ക്’ ഉടൻ തന്നെ പുറത്തിറക്കുമെന്നും അധികൃതർ വ്യക്തമാക്കിയിട്ടുണ്ട്.
നഗരത്തിൽ നടക്കുന്ന ചെറുതും വലുതുമായ ആഘോഷങ്ങൾ ദുബായിലെ മൂല്യങ്ങളെയും ഉത്തരവാദിത്തങ്ങളെയും പൂർണ്ണമായി പ്രതിഫലിപ്പിക്കുന്നുവെന്ന് ഉറപ്പുവരുത്താൻ പുതിയ ഗൈഡ്ബുക്കിലൂടെ സാധിക്കും. സ്വദേശികൾക്കും വിദേശി താമസക്കാർക്കും വിനോദസഞ്ചാരികൾക്കും ഒരുപോലെ ബാധകമാകുന്ന രീതിയിലാണ് മാർഗ്ഗനിർദ്ദേശങ്ങൾ തയാറാക്കുന്നത്. ഇതിന് പുറമെ, നഗരത്തിന് ഒരേ സ്വഭാവത്തിലുള്ള ദൃശ്യഭംഗി നൽകുന്നതിനായി പുതിയ ‘ലൈറ്റിങ് സ്ട്രാറ്റജി’യും നടപ്പിലാക്കാൻ യോഗത്തിൽ തീരുമാനമായിട്ടുണ്ട്. നഗരവാസികൾക്കും സന്ദർശകർക്കും സമാനതകളില്ലാത്ത ലോകോത്തര ജീവിതാനുഭവം ഉറപ്പാക്കുകയാണ് ദുബായ് ഭരണകൂടം ഇതിലൂടെ ലക്ഷ്യമിടുന്നത്. യുഎഇയുടെ സാംസ്കാരിക മൂല്യങ്ങൾ കാത്തുസൂക്ഷിക്കുന്നതിനൊപ്പം നഗരത്തിന്റെ സുരക്ഷയും അച്ചടക്കവും കൂടുതൽ ശക്തമാക്കാൻ പുതിയ നീക്കം ഉപകരിക്കുമെന്നാണ് വിലയിരുത്തൽ.
ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ ദീർഘവീക്ഷണത്തോടെയുള്ള വികസനപാത പിന്തുടർന്ന്, കഴിഞ്ഞ സെപ്റ്റംബറിലാണ് ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമിന്റെ നിർദേശപ്രകാരം സിവിലിറ്റി കമ്മിറ്റി രൂപീകരിച്ചത്. എക്സിക്യൂട്ടിവ് ഓഫിസ് ചെയർമാനും ദുബായ് സിവിലിറ്റി കമ്മിറ്റി ചെയർമാനുമായ മുഹമ്മദ് അബ്ദുല്ല അൽ ഗർഗാവിയുടെ അധ്യക്ഷതയിലാണ് സുപ്രധാന തീരുമാനങ്ങൾ എടുത്ത അഞ്ചാമത് യോഗം ചേർന്നത്. ആർടിഎ ചെയർമാൻ മത്തർ അൽ തായർ, ദുബായ് കിരീടാവകാശിയുടെ ഓഫിസ് ഡയറക്ടർ ജനറൽ ഒമർ സുൽത്താൻ അൽ ഒലാമ, എക്സിക്യൂട്ടീവ് കൗൺസിൽ സെക്രട്ടറി ജനറൽ അബ്ദുല്ല മുഹമ്മദ് അൽ ബസ്തി, ദുബായ് പൊലീസ് കമാൻഡർ-ഇൻ-ചീഫ് ലഫ്. ജനറൽ അബ്ദുല്ല ഖലീഫ അൽ മർറി, ഡി.ഇ.ടി ഡയറക്ടർ ജനറൽ ഹിലാൽ സഈദ് അൽ മർറി, ദുബായ് മുൻസിപ്പാലിറ്റി ഡയറക്ടർ ജനറൽ മർവാൻ അഹമ്മദ് ബിൻ ഗലിത തുടങ്ങിയ ഉന്നത ഉദ്യോഗസ്ഥരും ഭരണാധികാരികളും യോഗത്തിൽ പങ്കെടുത്തു. കോടിക്കണക്കിന് സഞ്ചാരികൾ എത്തുന്ന ദുബായിൽ പുതിയ നിയമങ്ങൾ കർശനമായി നടപ്പിലാക്കാനാണ് പോലീസിനും മുൻസിപ്പാലിറ്റിക്കും നൽകിയിരിക്കുന്ന നിർദ്ദേശം.
