ഏഷ്യൻ റിലേ ചാമ്പ്യൻഷിപ്പിൽ വൻശക്തികളായ ചൈനയെ അവരുടെ സ്വന്തം മണ്ണിൽ അട്ടിമറിച്ച് ഇന്ത്യയുടെ വനിതാ 4×100 മീറ്റർ റിലേ ടീം ചരിത്ര സ്വർണം സ്വന്തമാക്കി. ചൈനയിലെ ഷാക്സിങ്ങിൽ നടന്ന ആവേശകരമായ ഫൈനലിൽ കനത്ത വെല്ലുവിളി ഉയർത്തിയ ചൈനീസ് താരങ്ങളെയും അവർക്കായി ആർത്തുവിളിച്ച ഗാലറിയെയും നിശബ്ദമാക്കിയാണ് ഇന്ത്യൻ പെൺപട സുവർണ്ണ നേട്ടത്തിലേക്ക് കുതിച്ചെത്തിയത്. എസ്.എസ് സ്നേഹ, സുദേഷ്ണ ശിവങ്കർ, തമന്ന, ശ്രബാനി നന്ദ എന്നിവരടങ്ങിയ ഇന്ത്യൻ സഖ്യം തങ്ങളുടെ സീസണിലെ ഏറ്റവും മികച്ച സമയമായ 43.85 സെക്കൻഡിൽ ഓടിയെത്തിയാണ് ഒന്നാമതായത്. ഫോട്ടോ ഫിനിഷിലേക്ക് നീണ്ട പോരാട്ടത്തിൽ 44.09 സെക്കൻഡിൽ ഫിനിഷ് ചെയ്ത ചൈന വെള്ളിയും, 44.11 സെക്കൻഡിൽ ഫിനിഷ് ചെയ്ത തായ്‌ലൻഡ് വെങ്കലവും നേടി. ഇന്ത്യയുടെ സ്വർണ്ണക്കുതിപ്പിന്റെ ദൃശ്യങ്ങൾ ഇപ്പോൾ സമൂഹമാധ്യമങ്ങളിൽ വൻതോതിൽ വൈറലാവുകയാണ്.
റിലയൻസ് ഫൗണ്ടേഷന്റെ പരിശീലകനായ മാർട്ടിൻ ഓവൻസിന്റെ കൃത്യമായ തന്ത്രങ്ങളാണ് ഇന്ത്യയ്ക്ക് തുണയായത്. വേഗതയേക്കാൾ ബാറ്റിൻ കൈമാറ്റത്തിലെ (Baton exchange) കൃത്യത നിർണ്ണായകമാകുന്ന റിലേ മത്സരത്തിൽ, എക്സ്ചേഞ്ച് സോണുകളിൽ ഇന്ത്യൻ താരങ്ങൾ പുലർത്തിയ അച്ചടക്കമാണ് ചൈനയെ മറികടക്കാൻ സഹായിച്ചത്. ടൂർണമെന്റിൽ ഇന്ത്യയുടെ മിന്നും പ്രകടനത്തോടെ സ്നേഹയും തമന്നയും രണ്ട് മെഡലുകൾ വീതം സ്വന്തമാക്കി. നേരത്തെ നടന്ന മിക്സഡ് 4×100 മീറ്റർ റിലേയിൽ ദേശീയ റെക്കോർഡ് ജേതാവ് അനിമേഷ് കുജൂർ, പ്രണവ് ഗുരവ് എന്നിവർക്കൊപ്പം ചേർന്ന് ഈ സഖ്യം ഇന്ത്യയ്ക്കായി വെങ്കല മെഡലും (41.27 സെക്കൻഡ്) നേടിയിരുന്നു.
ടൂർണമെന്റിന്റെ മറ്റൊരു ആവേശകരമായ മത്സരത്തിൽ മിക്സഡ് 4×400 മീറ്റർ റിലേയിൽ ഇന്ത്യ വെള്ളി മെഡൽ സ്വന്തമാക്കി. തീർത്ഥേഷ് പി ഷെട്ടി, എം.ആർ പൂവമ്മ, ഭരത് ശ്രീധർ, നീരു പഥക് എന്നിവരടങ്ങിയ സംഘം 3:17.06 സെക്കൻഡിൽ ഓടിയെത്തിയാണ് വെള്ളി നേടിയത്. എന്നാൽ 4×400 മീറ്റർ പുരുഷ-വനിതാ റിലേ മത്സരങ്ങളിൽ ഇന്ത്യയ്ക്ക് പോഡിയത്തിൽ എത്താനായില്ല. വനിതകളുടെ 4×400 മീറ്ററിൽ ഇന്ത്യ നാലാം സ്ഥാനത്തും പുരുഷന്മാരുടെ മത്സരത്തിൽ അഞ്ചാം സ്ഥാനത്തുമാണ് ഫിനിഷ് ചെയ്തത്. ഈ രണ്ട് ഇനങ്ങളിലും വിയറ്റ്നാം സഖ്യമാണ് സ്വർണം തൂത്തുവാരിയത്. പരിക്ക് മൂലം പുരുഷന്മാരുടെ 4×100 മീറ്റർ റിലേയിൽ ഇന്ത്യ ടീമിനെ ഇറക്കിയിരുന്നില്ല.
ഈ വർഷം ജപ്പാനിൽ നടക്കാനിരിക്കുന്ന ഏഷ്യൻ ഗെയിംസിന് മുന്നോടിയായി ഈ സ്വർണ്ണ നേട്ടം ഇന്ത്യൻ ടീമിന് വലിയ ആത്മവിശ്വാസമാണ് നൽകുന്നത്. അന്താരാഷ്ട്ര കരിയറിൽ രണ്ട് പതിറ്റാണ്ടിലധികം പിന്നിട്ട 35-കാരിയായ ശ്രബാനി നന്ദയുടെ കഠിനാധ്വാനത്തിനുള്ള പ്രതിഫലം കൂടിയാണ് ഈ മെഡൽ. മരുന്നടിയോട് പൂർണ്ണമായും വിമുഖത കാണിക്കുന്ന താരം, മരുന്നുകളില്ലാതെ തന്നെ നമുക്ക് വലിയ വിജയങ്ങൾ നേടാനാകുമെന്ന ചിന്താഗതി വളരേണ്ടതുണ്ടെന്ന് മത്സരശേഷം പി.ടി.ഐയോട് പ്രതികരിച്ചു. ഏഷ്യൻ ഗെയിംസിൽ മെഡൽ നേടുക എന്നതാണ് തന്റെ അടുത്ത ലക്ഷ്യമെന്നും താരം കൂട്ടിച്ചേർത്തു. മൂന്ന് മെഡലുകളുമായി ഇന്ത്യ ചാമ്പ്യൻഷിപ്പ് അവസാനിപ്പിക്കുമ്പോൾ, അടുത്ത വർഷത്തെ (2027) ഏഷ്യൻ റിലേ ചാമ്പ്യൻഷിപ്പിന് ഇന്ത്യയിലെ ചണ്ഡീഗഡ് വേദിയാകുമെന്ന പ്രഖ്യാപനവും കായികപ്രേമികൾക്ക് ഇരട്ടി മധുരമാകുന്നു.
