അതിശക്തമായ ഇരട്ട ഭൂകമ്പം വിഴുങ്ങിയ വെനിസ്വേലയിൽ രക്ഷകരായി ഇന്ത്യൻ സൈന്യത്തിന്റെ വജ്രായുധം. ദുരന്ത ഭൂമിയിൽ രക്ഷാപ്രവർത്തനവും സൗജന്യ ചികിത്സയുമായി കളം നിറഞ്ഞ ഇന്ത്യൻ ആർമിയുടെ ഫീൽഡ് ഹോസ്പിറ്റൽ സമാനതകളില്ലാത്ത കാരുണ്യപ്രവർത്തിയിലൂടെ വീണ്ടുമൊരു ജീവൻ കൂടി കാത്തുരക്ഷിച്ചു. ഭൂകമ്പത്തിൽ തകർന്നടിഞ്ഞ വീടിന്റെ അവശിഷ്ടങ്ങൾക്കിടയിൽ കുടുങ്ങിപ്പോയ 79 വയസ്സുകാരിയായ വൃദ്ധയ്ക്കാണ് ഇന്ത്യൻ സൈന്യത്തിലെ മെഡിക്കൽ സംഘം അടിയന്തര ചികിത്സ നൽകി ജീവൻ തിരിച്ചുനൽകിയത്. ഇന്ത്യ വെനിസ്വേലയിൽ നടത്തുന്ന ‘ഓപ്പറേഷൻ അമിസ്താദ്’ (Operation Amistad) എന്ന രക്ഷാദൗത്യത്തിന്റെ ഭാഗമായാണ് ഈ അപൂർവ നേട്ടം.
ഭൂകമ്പം കവർന്ന വെനിസ്വേലൻ തലസ്ഥാനമായ കാരക്കാസിലെ ലാ റിൻകോനാഡ റേസ്കോഴ്സിൽ ജൂൺ 28-നാണ് ഇന്ത്യൻ സൈന്യം അത്യാധുനിക സജ്ജീകരണങ്ങളോടെയുള്ള ഫീൽഡ് ഹോസ്പിറ്റൽ സ്ഥാപിച്ചത്. റിക്ടർ സ്കെയിലിൽ 7.2, 7.5 തീവ്രത രേഖപ്പെടുത്തിയ മാരകമായ ഭൂകമ്പങ്ങൾ നടന്ന് ഒരാഴ്ചയോളമായിട്ടും തകർന്ന കെട്ടിടങ്ങൾക്കിടയിൽ ജീവനോടെ അവശേഷിച്ച വൃദ്ധയെ ജൂൺ 29-നാണ് അതീവ ഗുരുതരാവസ്ഥയിൽ ഇന്ത്യൻ സൈന്യത്തിന്റെ ഈ താൽക്കാലിക ആശുപത്രിയിൽ എത്തിക്കുന്നത്. കാലിന് ഗുരുതരമായി ഒടിവേൽക്കുകയും ‘പെരിഫറൽ ആർട്ടീരിയൽ ഡിസീസ്’ (രക്തധമനികളിലെ തടസ്സം) എന്ന രോഗാവസ്ഥ നേരിടുകയും ചെയ്തിരുന്ന അവർക്ക് ദിവസങ്ങളോളം ചികിത്സ ലഭിക്കാതിരുന്നതിനാൽ കാലിൽ വലിയ അണുബാധയും അസഹനീയമായ വേദനയും അനുഭവപ്പെട്ടിരുന്നു. ഒടിഞ്ഞ എല്ലുകൾ നേരെയാക്കിയും അത്യാധുനിക മുറിവ് പരിചരണ സംവിധാനങ്ങൾ ഉപയോഗിച്ചും ഇന്ത്യൻ ആർമിയുടെ വിദഗ്ധ ഡോക്ടർമാർ ഇവരെ ജീവിതത്തിലേക്ക് തിരികെ കൊണ്ടുവരികയായിരുന്നു. ചികിത്സയ്ക്ക് ശേഷം “ഇപ്പോൾ എനിക്ക് വളരെ ആശ്വാസമുണ്ട്” എന്ന് നിറഞ്ഞ കണ്ണുകളോടെ വൃദ്ധ പ്രതികരിച്ചതായി ഇന്ത്യൻ സൈന്യം എക്സിലൂടെ (ട്വിറ്റർ) പങ്കുവെച്ചു.
ഇന്ത്യൻ സൈന്യത്തിന്റെ ഈ കാരുണ്യ സ്പർശത്തിന് മുന്നിൽ കൈകൂപ്പുകയാണ് വെനിസ്വേലൻ ജനത. “എന്റെ 60 വർഷത്തെ ജീവിതത്തിനിടയിൽ ഇത്രയും മികച്ചൊരു മെഡിക്കൽ പരിചരണം ഞാൻ കണ്ടിട്ടില്ല” എന്നാണ് ആശുപത്രിയിൽ ചികിത്സ തേടിയ മറ്റൊരു ഭൂകമ്പബാധിതൻ വികാരാധീനനായി പറഞ്ഞത്. 24 മണിക്കൂറും തികച്ചും സൗജന്യമായി പ്രവർത്തിക്കുന്ന ഈ ആർമി ഫീൽഡ് ഹോസ്പിറ്റലിലെ സർജന്മാർ ഉൾപ്പെടെയുള്ള വിദഗ്ധരുടെ സേവനത്തിന് നന്ദി പറഞ്ഞ് നിരവധി കുടുംബങ്ങളാണ് രംഗത്തെത്തുന്നത്. വെനിസ്വേലൻ വൈസ് ഹെൽത്ത് മിനിസ്റ്ററും കാരക്കാസ് ഗവർണറും ഇന്ത്യൻ ക്യാമ്പ് സന്ദർശിച്ച് നന്ദി അറിയിച്ചിരുന്നു.
ഇന്ത്യൻ വ്യോമസേനയുടെ രണ്ട് സി-17 ഗ്ലോബ്മാസ്റ്റർ (C-17 Globemaster) വിമാനങ്ങളിലായി ഡൽഹിയിൽ നിന്നും 14,000 കിലോമീറ്ററിലധികം സഞ്ചരിച്ചാണ് 66 ടൺ അത്യാധുനിക മെഡിക്കൽ സാമഗ്രികളും ദുരിതാശ്വാസ നിധികളും വെനിസ്വേലയിൽ എത്തിച്ചത്. ഇന്ത്യൻ ആർമിയുടെ വിഖ്യാതമായ ’60 പാര ഫീൽഡ് ഹോസ്പിറ്റലിലെ’ (60 Para Field Hospital) 9 മെഡിക്കൽ ഓഫീസർമാർ, സർജന്മാർ, അനസ്തെറ്റിസ്റ്റുകൾ, ഡെന്റൽ-ഓർത്തോപീഡിക് വിദഗ്ധർ എന്നിവരടങ്ങുന്ന 41 അംഗ എലൈറ്റ് മെഡിക്കൽ സംഘമാണ് കാരക്കാസിൽ രാപ്പകലില്ലാതെ സേവനം ചെയ്യുന്നത്.
ഇതോടൊപ്പം ഇന്ത്യയുടെ സ്വന്തം അഭിമാനമായ രണ്ട് ഭീഷ്മ ക്യൂബുകളും (BHISHM Cubes) ഇവിടെ സജ്ജീകരിച്ചിട്ടുണ്ട്. ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയിൽ പ്രവർത്തിക്കുന്ന ഈ മൊബൈൽ ഹോസ്പിറ്റൽ യൂണിറ്റുകൾ വെറും 12 മിനിറ്റിനുള്ളിൽ എവിടെയും സ്ഥാപിക്കാൻ കഴിയും. മിനി ഓപ്പറേഷൻ തിയേറ്ററുകൾ, വെന്റിലേറ്ററുകൾ, സ്വന്തമായി ഓക്സിജൻ ഉത്പാദിപ്പിക്കാനുള്ള പ്ലാന്റുകൾ എന്നിവയടങ്ങുന്ന ഭീഷ്മ ക്യൂബിന് ഒരേസമയം 200 ഓളം അത്യാഹിത രോഗികളെ ചികിത്സിക്കാൻ ശേഷിയുണ്ട്. ലോകമെമ്പാടും ദുരന്തമുഖങ്ങളിൽ ഇന്ത്യ നീട്ടുന്ന സഹായഹസ്തങ്ങൾ വെനിസ്വേലയിലും വലിയൊരു ജനതയ്ക്ക് പ്രത്യാശയുടെ പ്രകാശഗോപുരമായി മാറിക്കഴിഞ്ഞു.
