ദേശീയ സുരക്ഷയുടെ കാര്യത്തിൽ ഒരിഞ്ചുപോലും വിട്ടുവീഴ്ചയില്ലെന്ന നരേന്ദ്ര മോദി സർക്കാരിന്റെ ശക്തമായ രാഷ്ട്രീയ ഇച്ഛാശക്തി വിളംബരം ചെയ്തുകൊണ്ട് ഭാരതത്തിന്റെ പ്രതിരോധ ചരിത്രത്തിൽ സുവർണ്ണ അധ്യായം കുറിക്കുന്നു. ശത്രുരാജ്യങ്ങളുടെ ഏതൊരു നുഴഞ്ഞുകയറ്റ ശ്രമങ്ങളെയും അതിർത്തിയിൽ തന്നെ ചാമ്പലാക്കാൻ ശേഷിയുള്ള 5,000 കോടി രൂപയുടെ ബൃഹദ് ആയുധ ശേഖരണ പദ്ധതിക്കാണ് മോദി സർക്കാർ ഇപ്പോൾ അനുമതി നൽകിയിരിക്കുന്നത്. ലോകത്തിന് മുന്നിൽ യാചിച്ചുനിന്നിരുന്ന ഒരു പഴയ കാലത്തുനിന്നും, ആയുധ ഇറക്കുമതി പൂർണ്ണമായും അവസാനിപ്പിച്ച് ‘ആത്മനിർഭർ ഭാരതം’ എന്ന സിംഹഗർജ്ജനത്തോടെ ആഗോള പ്രതിരോധ നിർമ്മാണ ഹബ്ബായി രാജ്യം മാറുന്ന കാഴ്ചയ്ക്കാണ് ഇന്ന് ലോകം സാക്ഷ്യം വഹിക്കുന്നത്. ചൈനയുടെയും പാകിസ്താന്റെയും ഉറക്കം കെടുത്തുന്ന ഈ നവഭാരത തന്ത്രം, ആധുനിക സൈനിക സാങ്കേതികവിദ്യയിൽ ഭാരതത്തെ സൂപ്പർ പവറാക്കി മാറ്റുമെന്നതിൽ സംശയമില്ല.
പ്രതിരോധ മന്ത്രി രാജ്നാഥ് സിങ്ങിന്റെ അധ്യക്ഷതയിൽ ചേർന്ന ഡിഫൻസ് അക്വിസിഷൻ കൗൺസിൽ (DAC) യോഗത്തിലാണ് ഭാരതത്തിന്റെ സൈനിക വീര്യം വാനോളമുയർത്തുന്ന ഈ തന്ത്രപ്രധാന തീരുമാനങ്ങൾ കൈക്കൊണ്ടത്. ചീഫ് ഓഫ് ഡിഫൻസ് സ്റ്റാഫ് ജനറൽ അനിൽ ചൗഹാൻ, കരസേനാ മേധാവി ജനറൽ ഉപേന്ദ്ര ദ്വിവേദി, നാവികസേനാ മേധാവി അഡ്മിറൽ ദിനേഷ് കെ. ത്രിപാഠി, വ്യോമസേനാ മേധാവി എയർ ചീഫ് മാർഷൽ എ.പി. സിങ് എന്നിവരടങ്ങുന്ന പുതിയ സൈനിക നേതൃത്വം ഒന്നിച്ച് പങ്കെടുത്ത ആദ്യ യോഗം എന്ന സവിശേഷതയും ഇതിനുണ്ട്. സൈന്യത്തിന്റെ മൂന്ന് വിഭാഗങ്ങളെയും ഒരേപോലെ ആധുനികവത്കരിക്കുക എന്ന ലക്ഷ്യത്തോടെയാണ് ഈ മെഗാ ഡീൽ രൂപകൽപ്പന ചെയ്തിരിക്കുന്നത്.
ഗാൽവൻ താഴ്വരയിലെ ചൈനീസ് പ്രകോപനത്തിന് പിന്നാലെ ഭാരതം അടിയന്തരമായി ഫ്രാൻസിൽ നിന്നും ഇറക്കുമതി ചെയ്ത ഹാമർ (Highly Agile Modular Munition Extended Range) പ്രിസിഷൻ ബോംബുകൾ ഇനി ‘മേക്ക് ഇൻ ഇന്ത്യ’ പദ്ധതിയിലൂടെ ഭാരതത്തിന്റെ മണ്ണിൽ തന്നെ നിർമ്മിക്കുമെന്നതാണ് ഈ കരാറിന്റെ ഏറ്റവും വലിയ സവിശേഷത. ഫ്രഞ്ച് കമ്പനിയായ സാഫ്രാനുമായി സഹകരിച്ച് ഭാരത് ഇലക്ട്രോണിക്സ് ലിമിറ്റഡ് (BEL) ആണ് 2,400 കോടിയുടെ ഈ പദ്ധതിയിലൂടെ 600 ഹാമർ ബോംബുകൾ രാജ്യത്ത് നിർമ്മിക്കുക. വ്യോമസേനയുടെ അഭിമാനമായ റഫാൽ, തദ്ദേശീയ യുദ്ധവിമാനമായ എൽസിഎ തേജസ് എന്നിവയിലും നാവികസേനയുടെ റഫാൽ മറൈൻ വിമാനങ്ങളിലും ഈ മാരക ബോംബുകൾ ഘടിപ്പിക്കുന്നതോടെ ശത്രുവിന്റെ ബങ്കറുകളും കമാൻഡ് സെന്ററുകളും നിമിഷനേരം കൊണ്ട് തവിടുപൊടിയാക്കാൻ ഭാരതത്തിന് സാധിക്കും. അന്ധമായി ബോംബുകൾ വർഷിക്കുന്നതിന് പകരം, ലക്ഷ്യസ്ഥാനം കൃത്യമായി കണ്ടെത്തി തകർക്കാൻ ശേഷിയുള്ള ‘സ്മാർട്ട് ആയുധങ്ങൾ’ നിർമ്മിക്കുന്നതിൽ ഭാരതം കൈവരിച്ച മുന്നേറ്റമാണിത്.
ഇതിനുപുറമെ, ശത്രുവിന്റെ ടാങ്കുകളെ തകർത്തുതരിപ്പണമാക്കാൻ ഡിആർഡിഒ (DRDO) പൂർണ്ണമായും തദ്ദേശീയമായി വികസിപ്പിച്ച മാൻ-പോർട്ടബിൾ ആന്റി ടാങ്ക് ഗൈഡഡ് മിസൈലുകൾ (MP-ATGM) വൻതോതിൽ വാങ്ങാനും യോഗത്തിൽ അനുമതിയായി. ഭാരത് ഡൈനാമിക്സ് ലിമിറ്റഡ് (BDL) നിർമ്മിക്കുന്ന ഈ മിസൈൽ പദ്ധതിക്കായി 2,600 കോടി രൂപയാണ് വകയിരുത്തിയിരിക്കുന്നത്. ഇതിലൂടെ 100 ലോഞ്ചറുകളും 2,300 മിസൈലുകളും അഞ്ച് സിമുലേറ്ററുകളും ഇന്ത്യൻ സൈന്യത്തിന് ലഭിക്കും. സ്വകാര്യ പങ്കാളികളെക്കൂടി ഉൾപ്പെടുത്തി ഇതിന്റെ ഉത്പാദനം യുദ്ധകാലാടിസ്ഥാനത്തിൽ വർധിപ്പിക്കാനാണ് ഭാരതത്തിന്റെ നീക്കം. റഷ്യൻ സാങ്കേതികവിദ്യയിലുള്ള ‘വെർബ’ വ്യോമപ്രതിരോധ മിസൈലുകൾ അദാനി ഡിഫൻസ് വഴി ഇന്ത്യയിൽ നിർമ്മിക്കാനുള്ള അനുമതിയും ഇതോടൊപ്പം നൽകിയിട്ടുണ്ട്.
ഭാരതത്തിന്റെ അതിർത്തി സുരക്ഷ ഉറപ്പാക്കുന്നതിനൊപ്പം ആയുധ ഇറക്കുമതി പൂർണ്ണമായും അവസാനിപ്പിച്ച് ഭാരതീയരുടെ സ്വന്തം ആയുധങ്ങൾ ഉപയോഗിച്ച് ശത്രുവിനെ നേരിടുക എന്ന പ്രധാനമന്ത്രി നരേന്ദ്ര മോദിയുടെ ദീർഘവീക്ഷണമാണ് ഇവിടെ യാഥാർഥ്യമാകുന്നത്. പ്രതിരോധ ഉത്പാദനം റെക്കോർഡ് വേഗത്തിൽ 1.78 ലക്ഷം കോടി കടന്ന ഈ സാഹചര്യത്തിൽ, അയൽരാജ്യങ്ങളുടെ ഏതൊരു അവിവേകത്തിനും തക്കതായ മറുപടി നൽകാൻ ഭാരതത്തിന്റെ സായുധ സേന പൂർണ്ണ സജ്ജമാണെന്ന ശക്തമായ നയതന്ത്ര സന്ദേശമാണ് ഭാരതം ഇതിലൂടെ ലോകത്തിന് നൽകുന്നത്. ശത്രുക്കളുടെ ഏത് വെല്ലുവിളിയെയും നേരിടാൻ ഭാരതാംബയുടെ കാവൽഭടന്മാർ ഇനി അത്യാധുനിക സ്വയംഭൂ ആയുധങ്ങളുമായി അതിർത്തികളിൽ കാവലുണ്ടാകും.
