സംസ്ഥാനത്ത് ഇന്നും ഭാഗികമായി വൈദ്യുതി നിയന്ത്രണം ഏർപ്പെടുത്തേണ്ടി വരുമെന്ന് കേരള സ്റ്റേറ്റ് ഇലക്ട്രിസിറ്റി ബോർഡ് അറിയിച്ചു. നിലവിൽ സംസ്ഥാനത്ത് ആവശ്യമായതിനേക്കാൾ 400 മുതൽ 500 മെഗാവാട്ട് വരെ വൈദ്യുതിയുടെ കുറവാണ് രേഖപ്പെടുത്തുന്നത്. ഇതാണ് പെട്ടെന്നുള്ള നിയന്ത്രണത്തിലേക്ക് നയിച്ചതെന്നാണ് കെഎസ്ഇബി നൽകുന്ന ഔദ്യോഗിക വിശദീകരണം.
സംസ്ഥാനത്ത് പരക്കെ മഴക്കുറവ് അനുഭവപ്പെടുന്നതും അതോടൊപ്പം അന്തരീക്ഷ താപനില താരതമ്യേന ഉയർന്ന നിലയിൽ തുടരുന്നതുമാണ് പെട്ടെന്നുള്ള പ്രതിസന്ധിക്ക് കാരണമായത്. ചൂട് വർധിച്ചതോടെ സംസ്ഥാനത്തുടനീളം വൈദ്യുതിയുടെ ആവശ്യകതയിൽ വൻ വർധനവാണ് ഉണ്ടായിട്ടുള്ളത്. ഈ സാഹചര്യത്തിൽ ഉൽപ്പാദനവും വിതരണവും തമ്മിലുള്ള വലിയ വ്യത്യാസം പരിഹരിക്കുന്നതിനാണ് താൽക്കാലികമായി നിയന്ത്രണം ഏർപ്പെടുത്താൻ ബോർഡ് തീരുമാനിച്ചിരിക്കുന്നത്. വരും ദിവസങ്ങളിലെ കാലാവസ്ഥയും ഉപയോഗവും വിലയിരുത്തി മാത്രമായിരിക്കും അടുത്ത നടപടികൾ കൈക്കൊള്ളുകയെന്നും കെഎസ്ഇബി വൃത്തങ്ങൾ സൂചിപ്പിച്ചു.
