പാലക്കാട് കഞ്ചിക്കോട് ഗവൺമെന്റ് ഹയർ സെക്കൻഡറി സ്കൂളിൽ കായികവിനോദങ്ങളിൽ ഏർപ്പെട്ടതിന്റെ പേരിൽ വിദ്യാർത്ഥികളെ അധ്യാപകൻ അതിക്രൂരമായി മർദിച്ചതായി പരാതി. സ്കൂളിലെ ആറാം ക്ലാസിൽ പഠിക്കുന്ന ഇരുപത്തിയാറോളം കുട്ടികളാണ് ശാരീരിക ഉപദ്രവത്തിനും മോശം പദപ്രയോഗങ്ങൾക്കും ഇരയായത്. സംഭവത്തിൽ യുപി സ്കൂൾ വിഭാഗം കായികാധ്യാപകനും കൊടുവായൂർ സ്വദേശിയുമായ സാദിഖിനെതിരെ വാളയാർ പൊലീസ് നിയമനടപടി സ്വീകരിച്ചു. രണ്ട് ദിവസം മുൻപ് നടന്ന സംഭവത്തിൽ കുട്ടികൾക്ക് നേരെ ചൂരൽ ഉപയോഗിച്ചായിരുന്നു അതിക്രമം.
പിടി പീരിഡിന്റെ സമയത്ത് ഫുട്ബോൾ കളിക്കാൻ പോയതാണ് അധ്യാപകനെ പ്രകോപിപ്പിച്ചത്. ക്രൂരമായ മർദനത്തിൽ ചില കുട്ടികളുടെ വിരലുകൾക്ക് ഗുരുതരമായി പരിക്കേൽക്കുകയും അസഹ്യമായ വേദനയെത്തുടർന്ന് മൂന്ന് വിദ്യാർത്ഥികളെ ആശുപത്രിയിൽ പ്രവേശിപ്പിച്ചു ചികിത്സ ലഭ്യമാക്കേണ്ടതായും വന്നു. അധ്യാപകന്റെ പെരുമാറ്റത്തിനെതിരെ രക്ഷിതാക്കൾ രംഗത്തെത്തുകയും പോലീസിൽ ഔദ്യോഗികമായി പരാതി നൽകുകയുമായിരുന്നു. കുട്ടികൾക്കെതിരെയുള്ള അതിക്രമങ്ങൾ തടയുന്ന ജൂവനൈൽ ജസ്റ്റിസ് ആക്ട് (ജെ.ജെ ആക്ട്) പ്രകാരമാണ് അധ്യാപകനെതിരെ നിലവിൽ കേസെടുത്തിരിക്കുന്നത്.
മുൻപും ഈ അധ്യാപകന്റെ ഭാഗത്തുനിന്ന് സമാനമായ രീതിയിൽ മോശം പെരുമാറ്റം ഉണ്ടായിട്ടുണ്ടെന്നും വിദ്യാർത്ഥിനികളോട് അധിക്ഷേപകരമായ രീതിയിൽ സംസാരിച്ചിട്ടുണ്ടെന്നും കുട്ടികൾ ആരോപിക്കുന്നു. എന്നാൽ, ക്ലാസ് സമയത്ത് പഠനത്തിൽ ശ്രദ്ധ കേന്ദ്രീകരിക്കാൻ ആവശ്യപ്പെട്ടിട്ടും അത് അനുസരിക്കാതെ കളിക്കാൻ പോയതിനാണ് കുട്ടികളെ ശിക്ഷിച്ചതെന്നാണ് സ്കൂൾ അധികൃതർ നൽകുന്ന വിശദീകരണം. സംഭവത്തിൽ പൊലീസും വിദ്യാഭ്യാസ വകുപ്പും കൂടുതൽ അന്വേഷണം നടത്തിവരികയാണ്.
