ബംഗ്ലാദേശിലെ നോഖാലിയിൽ അഞ്ഞൂറ് വർഷം പഴക്കമുള്ള ചരിത്രപ്രസിദ്ധമായ ഒരു ഹൈന്ദവ ക്ഷേത്രം ബുൾഡോസർ ഉപയോഗിച്ച് തകർത്തു. ഈ സംഭവത്തിന് പിന്നാലെ, ബംഗ്ലാദേശ് പ്രധാനമന്ത്രി താരിഖ് റഹ്മാന്റെ നിർദ്ദേശപ്രകാരമാണ് ഈ പൊളിച്ചുമാറ്റൽ നടന്നതെന്ന തരത്തിലുള്ള കടുത്ത ആരോപണങ്ങളും വിഡിയോകളും സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്.
ഒരു പുരാതന നിർമ്മിതി ബുൾഡോസർ ഉപയോഗിച്ച് തകർക്കുന്ന ദൃശ്യങ്ങളാണ് ഇന്റർനെറ്റിൽ വ്യാപകമായി പ്രചരിക്കുന്നത്. തങ്ങളുടെ ചരിത്രപ്രസിദ്ധമായ ആരാധനാലയത്തിന് നേരെയാണ് ഈ നടപടിയുണ്ടായതെന്ന് പ്രാദേശിക ഹൈന്ദവ സമൂഹം ആരോപിക്കുന്നു. പശ്ചിമ ബംഗാളിലെ നേതാജി സുഭാഷ് ചന്ദ്രബോസ് അന്താരാഷ്ട്ര വിമാനത്താവളത്തിന്റെ റൺവേ വികസിപ്പിക്കുന്നതിനായി വർഷങ്ങൾ നീണ്ട ചർച്ചകൾക്കൊടുവിൽ അവിടെയുണ്ടായിരുന്ന ‘ബങ്ക്റ മസ്ജിദ്’ എന്നറിയപ്പെടുന്ന 136 വർഷം പഴക്കമുള്ള ഗൗരിപൂർ ജാമിയ മസ്ജിദ് മാറ്റിസ്ഥാപിക്കാൻ പശ്ചിമ ബംഗാൾ സർക്കാർ തീരുമാനിച്ചതിന് പ്രതികാരമായാണ് ബംഗ്ലാദേശിൽ ഈ നടപടിയുണ്ടായതെന്നാണ് സോഷ്യൽ മീഡിയയിലെ ഒരു വിഭാഗം അവകാശപ്പെടുന്നത്.
പശ്ചിമ ബംഗാളിൽ പള്ളി മാറ്റിസ്ഥാപിക്കാനാണ് മുഖ്യമന്ത്രി ശുഭേന്ദു അധികാരി ശ്രമിച്ചതെങ്കിൽ, ബംഗ്ലാദേശ് പ്രധാനമന്ത്രി താരിഖ് റഹ്മാൻ പുരാതന ക്ഷേത്രം പൂർണ്ണമായി തകർക്കാനാണ് ഉത്തരവിട്ടതെന്നാണ് ‘വോയ്‌സ് ഓഫ് ബംഗ്ലാദേശി ഹിന്ദുസ്’ എന്ന എക്സ് അക്കൗണ്ട് ആരോപിക്കുന്നത്. ബംഗ്ലാദേശ് സർക്കാരിന്റെ നേരിട്ടുള്ള പിന്തുണയോടെയാണ് ഈ പൊളിച്ചുമാറ്റൽ നടന്നതെന്ന ആരോപണവും ശക്തമാണ്.
ബംഗ്ലാദേശിൽ 81 അടി ഉയരമുള്ള ശ്രീരാമ പ്രതിമ നിർമ്മിക്കാൻ മുൻകൈ എടുത്ത ഹരിദാസ് ചന്ദ്ര തരണി ദാസ് എന്ന വ്യക്തിയെ പണം വെളുപ്പിക്കൽ കേസിൽ പോലീസ് അറസ്റ്റ് ചെയ്ത് ദിവസങ്ങൾക്കുള്ളിലാണ് പുതിയ സംഭവം ഉണ്ടായിരിക്കുന്നത്. ബംഗ്ലാദേശിലെ ഗായ്ബാന്ധ ജില്ലയിലെ പലാഷ്ബാരിയിലുള്ള ശ്രീ ശ്രീ രാധാ ഗോവിന്ദ കാളി ക്ഷേത്രത്തിൽ പ്രതിമ നിർമ്മിക്കാൻ നിർദ്ദേശിച്ച ഇയാളെ ജൂലൈ 12-ന് രാത്രി വൈകിയാണ് പോലീസ് കസ്റ്റഡിയിലെടുത്തത്. ഈ രണ്ട് സംഭവങ്ങളും ബംഗ്ലാദേശിലെ ന്യൂനപക്ഷ വിഭാഗങ്ങൾക്കിടയിൽ വലിയ ആശങ്കയ്ക്ക് കാരണമായിട്ടുണ്ട്.
