പാകിസ്താൻ ഭീകര സംഘടനയായ ഐഎസ്ഐയുടെ പിന്തുണയോടെ പ്രവർത്തിക്കുന്ന അന്താരാഷ്ട്ര ആയുധക്കടത്ത് റാക്കറ്റിലെ രണ്ടുപേരെ ദില്ലി ക്രൈംബ്രാഞ്ച് അറസ്റ്റ് ചെയ്തു. പ്രമുഖ കുപ്രസിദ്ധ ഗുണ്ടാതലവൻ ഷഹബാസ് അൻസാരിയുടെ ഗാംഗിൽപ്പെട്ട ദില്ലി സീലംപൂർ സ്വദേശി മഹ്ഫൂസ് അലി എന്ന ബബി, ഉത്തർപ്രദേശിലെ ജൗൻപൂർ സ്വദേശി മുഹമ്മദ് അഹമ്മദ് എന്നിവരാണ് പിടിയിലായത്. രഹസ്യവിവരത്തിന്റെ അടിസ്ഥാനത്തിൽ എസിപി സഞ്ജയ് കുമാർ നാഗ്പാലിന്റെ മേൽനോട്ടത്തിൽ ഇൻസ്പെക്ടർമാരായ മാൻ സിംഗ്, സുന്ദർ ഗൗതം എന്നിവരടങ്ങിയ സംഘമാണ് പ്രതികളെ വലയിലാക്കിയത്. ഒരു സബ് മെഷീൻ ഗൺ, മൂന്ന് പിസ്റ്റളുകൾ, 82 ജീവനുള്ള തിരകൾ എന്നിവയാണ് ഇവരിൽ നിന്നും ദില്ലി പോലീസ് പിടിച്ചെടുത്തത്. നിയമവിരുദ്ധ പ്രവർത്തനങ്ങൾ തടയൽ നിയമം (യുഎപിഎ) പ്രകാരമാണ് പ്രതികൾക്കെതിരെ കേസ് രജിസ്റ്റർ ചെയ്തിരിക്കുന്നത്.
ഇതോടെ ഈ അന്താരാഷ്ട്ര ആയുധക്കടത്ത് കേസിൽ അറസ്റ്റിലായവരുടെ ആകെ എണ്ണം 16 ആയി ഉയർന്നു. വിദേശ നിർമ്മിത അത്യാധുനിക തോക്കുകൾ ഉൾപ്പെടെ കേസിൽ ഇതുവരെ 28 പിസ്റ്റളുകളും 281 തിരകളും പോലീസ് സംഘം കണ്ടുകെട്ടിയിട്ടുണ്ട്. അറസ്റ്റിലായ മഹ്ഫൂസ് അലി കൊലപാതകം, വധശ്രമം തുടങ്ങി നിരവധി കേസിൽ പ്രതിയും വർഷങ്ങളായി പോലീസിനെ വെട്ടിച്ച് കഴിയുന്ന കുപ്രസിദ്ധ കുറ്റവാളിയുമാണ്. പ്രശസ്ത പഞ്ചാബി ഗായകൻ സിദ്ധു മൂസെവാല വധക്കേസിലെ പ്രതികൾക്ക് ആയുധങ്ങളും വാഹ സൗകര്യങ്ങളും എത്തിച്ചുനൽകിയതിലും ഈ സംഘത്തിന് നിർണായക പങ്കുണ്ടെന്നാണ് ക്രൈംബ്രാഞ്ചിന്റെ ചോദ്യം ചെയ്യലിൽ തെളിഞ്ഞത്. ജയിലിൽ കഴിയുന്ന ഗുണ്ടാതലവൻ ഹാഷിം ബാബയുടെ നിർദ്ദേശപ്രകാരമാണ് മൂസെവാലയെ വധിച്ച സംഘത്തെ പഞ്ചാബിലേക്ക് കടത്താനും, കൃത്യത്തിന് ശേഷം തെളിവ് നശിപ്പിക്കുന്നതിന്റെ ഭാഗമായി അക്രമികളുടെ മൊബൈൽ ഫോണുകളും ഡോംഗിളുകളും യമുനാനദിയിൽ എറിഞ്ഞു കളയാനും മഹ്ഫൂസ് അലി സഹായിച്ചതെന്ന് പോലീസ് പറഞ്ഞു.
വെൽഡിംഗ് മെഷീനുകളിലും ഗിയർ ബോക്സുകളിലും സൂക്ഷ്മമായി അഴിച്ചുമാറ്റിയ നിലയിലാണ് പാകിസ്ഥാനിൽ നിന്ന് വിമാനമാർഗ്ഗം നേപ്പാളിലെ കാഠ്മണ്ഡുവിലേക്ക് തോക്കുകൾ എത്തിച്ചിരുന്നത്. അവിടെ നിന്ന് അനധികൃതമായി ഇന്ത്യയിലേക്ക് കടത്തുന്ന ആയുധഭാഗങ്ങൾ ദില്ലിയിൽ വെച്ച് വീണ്ടും കൂട്ടിയോജിപ്പിച്ച് വിവിധ ഗുണ്ടാസംഘങ്ങൾക്ക് വിതരണം ചെയ്യുകയായിരുന്നു ഇവരുടെ രീതി. സലീം പിസ്റ്റൾ എന്ന പേരിൽ അറിയപ്പെടുന്ന സലീം അഹമ്മദും ഷഹബാസ് അൻസാരിയും ചേർന്നാണ് ഈ വലിയ ശൃംഖല നിയന്ത്രിച്ചിരുന്നത്. ബിഹാറിലെ മുൻഗർ കേന്ദ്രീകരിച്ച് അനധികൃത തോക്ക് വിതരണം നടത്തിയിരുന്ന മുഹമ്മദ് അഹമ്മദും സംഘത്തിൽ ചേർന്ന് പ്രവർത്തിച്ചു വരികയായിരുന്നു. സ്വാതന്ത്ര്യദിനത്തോടനുബന്ധിച്ച് പഞ്ചാബിൽ നിന്നും വൻ ആയുധശേഖരങ്ങൾ പിടികൂടിയതിന് പിന്നാലെ തലസ്ഥാനത്ത് നടന്ന ഈ അറസ്റ്റ്, ഭീകരാക്രമണ പദ്ധതികൾ തകർക്കുന്നതിൽ രാജ്യത്തെ സുരക്ഷാ ഏജൻസികൾക്ക് വൻ നേട്ടമായിട്ടുണ്ട്.
