ന്യൂഡൽഹി : ജന്തർ മന്തറിലെ സിജെപി പ്രക്ഷോഭകർക്ക് നേരെയുണ്ടായ പോലീസ് നടപടികൾ പാർലമെന്റിൽ വിശദീകരിച്ച് കേന്ദ്ര ആരോഗ്യമന്ത്രി ജെ.പി നദ്ദ. രാജ്യസഭയിൽ പ്രതിപക്ഷ നേതാവ് മല്ലികാർജുൻ ഖാർഗെയും സിപിഐ(എം) എം.പി ജോൺ ബ്രിട്ടാസും അടക്കമുള്ള പ്രതിപക്ഷ നേതാക്കൾ പോലീസ് നടപടിയെ രൂക്ഷമായി വിമർശിച്ചപ്പോഴാണ്, ഇത് ക്രമസമാധാന പരിപാലനത്തിന്റെ ഭാഗമായുള്ള “സാധാരണ നടപടിക്രമം” (Normal law and order activity) മാത്രമാണെന്ന് നദ്ദ വ്യക്താമാക്കിയത്. താൻ ഒരു വിദ്യാർത്ഥി പ്രക്ഷോഭകനായിരുന്ന കാലഘട്ടങ്ങളെ അനുസ്മരിച്ച അദ്ദേഹം, കോൺഗ്രസ് ഭരണകാലത്തെ അടിയന്തരാവസ്ഥയിൽ ക്ലാസ് മുറികളിൽ നിന്നുപോലും തന്നെ രണ്ടുതവണ പോലീസ് അറസ്റ്റ് ചെയ്തിട്ടുണ്ടെന്നും, നിയമം കൈയിലെടുക്കുന്ന പ്രക്ഷോഭകർക്ക് ഇത്തരം പോലീസ് നടപടികൾ നേരിടേണ്ടി വരുമെന്നും ചൂണ്ടിക്കാട്ടി.
ചോദ്യപേപ്പർ ചോർച്ചയുമായി ബന്ധപ്പെട്ട് പ്രതിഷേധിച്ച പ്രക്ഷോഭകർക്ക് നേരെ കണ്ണീർവാതകവും ലാത്തിച്ചാർജ്ജും പ്രയോഗിച്ചതിനെച്ചൊല്ലി രാജ്യസഭയിൽ കടുത്ത വാഗ്വാദമാണ് ഉയർന്നത്. സിപിഐ(എം) ദേശീയ ഓഫീസിൽ കയറി പ്രക്ഷോഭകരായ വിദ്യാർത്ഥി നേതാക്കളെ അറസ്റ്റ് ചെയ്യാൻ ശ്രമിച്ച നടപടിയെ പ്രതിപക്ഷം ചോദ്യം ചെയ്തപ്പോൾ, പോലീസിന്റെ ഭാഗത്തുനിന്നുണ്ടായ അടിയന്തര സുരക്ഷാ നിർദ്ദേശങ്ങൾ ലംഘിക്കുന്നവർക്കെതിരെ നിയമം സ്വാഭാവികമായി കടമ നിർവ്വഹിക്കുക മാത്രമാണ് ചെയ്തതെന്ന് കേന്ദ്രമന്ത്രി കൂട്ടിച്ചേർത്തു. എന്നാൽ, സംഭവത്തെ രാഷ്ട്രീയവൽക്കരിക്കാനും അനാവശ്യമായി വിവാദമാക്കാനും പ്രതിപക്ഷം ശ്രമിക്കുകയാണെന്ന് നദ്ദ ആരോപിച്ചു. നദ്ദയുടെ പ്രതികരണത്തിൽ പ്രതിഷേധിച്ച് പ്രതിപക്ഷം സഭയുടെ നടുക്കളത്തിൽ ഇറങ്ങി പ്രതിഷേധിച്ചതിനെ തുടർന്ന് രാജ്യസഭാ നടപടികൾ താൽക്കാലികമായി നിർത്തിവെക്കേണ്ടി വന്നു.
