ഫൂക്കറ്റിൽ നിന്ന് ന്യൂഡൽഹിയിലേക്ക് വരികയായിരുന്ന എയർ ഇന്ത്യ വിമാനം വിമാനമധ്യേ പെട്ടെന്ന് 300 അടിയോളം താഴേക്ക് പതിച്ച് 17 പേർക്ക് പരിക്കേറ്റ സംഭവത്തിൽ ഞെട്ടിക്കുന്ന വിവരങ്ങൾ പുറത്ത്. വിമാനത്തിലെ മുഖ്യ പൈലറ്റ് (Pilot-in-Command) കഞ്ചാവ് ഉപയോഗിച്ചിരുന്നതായി രണ്ടാമത് നടത്തിയ ലാബ് പരിശോധനയിൽ (Confirmatory Test) സ്ഥിരീകരിച്ചു. ഓഗസ്റ്റ് 4-ന് നടന്ന അപകടത്തിന് പിന്നാലെ ഇരു പൈലറ്റുമാരുടെയും രക്ത-മൂത്ര സാമ്പിളുകൾ മാനസിക വിഭ്രാന്തിയുണ്ടാക്കുന്ന ലഹരിവസ്തുക്കളുടെ (Psychoactive Substances) സാന്നിധ്യം അറിയാനായി പരിശോധനയ്ക്ക് അയച്ചിരുന്നു. ഇതിലാണ് പൈലറ്റ്-ഇൻ-കമാൻഡ് ലഹരി ഉപയോഗിച്ചതായി തെളിഞ്ഞത്.
ഓഗസ്റ്റ് 4-ന് 137 യാത്രക്കാരും 8 ജീവനക്കാരുമായി ഫൂക്കറ്റിൽ നിന്ന് ഡൽഹിയിലേക്ക് പറന്ന AI2379 എയർബസ് A320 വിമാനമാണ് ക്രൂയിസിംഗിനിടെ വൻ അപകടത്തിൽപ്പെട്ടത്. പെട്ടെന്നുണ്ടായ കാറ്റും ആടിയുലച്ചിലും (Turbulence) മൂലമാണ് വിമാനം താഴേക്ക് പതിച്ചതെന്നായിരുന്നു എയർ ഇന്ത്യയുടെ ആദ്യ വിശദീകരണം. എന്നാൽ ഡൽഹിയിൽ ലാൻഡ് ചെയ്തതിന് പിന്നാലെ 13 യാത്രക്കാരെയും സുഷുമ്നാ നാഡിക്കും കഴുത്തിനും ഗുരുതരമായി പരിക്കേറ്റ 4 വിമാന ജീവനക്കാരെയും ആശുപത്രിയിൽ പ്രവേശിപ്പിക്കേണ്ടി വന്നു. തുടർന്നാണ് ഡയറക്ടറേറ്റ് ജനറൽ ഓഫ് സിവില് ഏവിയേഷൻ (DGCA) സംഭവം അതീവ ഗൗരവമുള്ള അപകടമായി (Serious Incident) പ്രഖ്യാപിക്കുകയും എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ (AAIB) അന്വേഷണം ആരംഭിക്കുകയും ചെയ്തത്.
ലഹരി ഉപയോഗത്തിന് പുറമെ വിമാനത്തിന് കടുത്ത സാങ്കേതിക തകരാറുകൾ ഉണ്ടായിരുന്നതായും അന്വേഷണ സംഘത്തിന് വിവരങ്ങൾ ലഭിച്ചിട്ടുണ്ട്. പറക്കലിനിടെ ഓട്ടോപൈലറ്റ് സംവിധാനം വേർപെടുകയും, ഹൈഡ്രോളിക് സിസ്റ്റം മൂന്നുതവണ തകരാറിലാകുകയും ചെയ്തതായി റിപ്പോർട്ടുകളുണ്ട്. തുടർന്ന് കോ-പൈലറ്റ് വിമാനത്തിന്റെ നിയന്ത്രണം സ്വമേധയാ ഏറ്റെടുക്കുകയായിരുന്നു. എയർബസ് കമ്പനിയും ഫ്രഞ്ച് ഏവിയേഷൻ സംഘവും നിലവിൽ അന്വേഷണത്തിൽ പങ്കാളികളാണ്. സംഭവത്തിന്റെ പശ്ചാത്തലത്തിൽ എയർ ഇന്ത്യ സി.ഇ.ഒ ക്യാംപ്ബെൽ വത്സനെ വ്യോമയാന മന്ത്രാലയം വിളിച്ചുവരുത്തി വിശദീകരണം തേടി. ഇരു പൈലറ്റുമാരെയും നിലവിൽ പറക്കൽ ചുമതലകളിൽ നിന്ന് നീക്കിയിട്ടുണ്ട്.
