ടെസ്റ്റ് ക്രിക്കറ്റിൽ ചരിത്ര നേട്ടം സ്വന്തമാക്കി ഇന്ത്യൻ വിക്കറ്റ് കീപ്പർ ബാറ്റർ റിഷഭ് പന്ത്. ടെസ്റ്റ് ക്രിക്കറ്റ് ചരിത്രത്തിൽ 100 സിക്സറുകൾ പൂർത്തിയാക്കുന്ന ആദ്യ ഇന്ത്യൻ താരമെന്ന സുവർണ്ണ നേട്ടമാണ് പന്ത് തന്റെ പേരിൽ കുറിച്ചത്. ഇന്ത്യയ്ക്ക് 400 റൺസിന്റെ കൂറ്റൻ ലീഡ് സമ്മാനിക്കാനുള്ള പോരാട്ടത്തിനിടെ വെറും 53 പന്തുകളിൽ നിന്നാണ് പന്ത് തന്റെ കരിയറിലെ 20-ാം ടെസ്റ്റ് അർദ്ധസെഞ്ചുറി തികച്ചത്. അർദ്ധസെഞ്ചുറിക്ക് പിന്നാലെ സിക്സറുകളിലൂടെ പന്ത് ടെസ്റ്റ് ചരിത്രത്തിലെ മറ്റൊരു നാഴികക്കല്ലും പിന്നിടുകയായിരുന്നു.
ഈ നേട്ടം കൈവരിക്കുന്ന ചരിത്രത്തിലെ ആദ്യ ഏഷ്യൻ താരം കൂടിയാണ് റിഷഭ് പന്ത്. വെറും 51 ടെസ്റ്റുകളിലെ 89 ഇന്നിംഗ്സുകളിൽ നിന്നാണ് പന്ത് 100 സിക്സറുകൾ അടിച്ചുകൂട്ടിയത്. ഇതോടെ ടെസ്റ്റ് ക്രിക്കറ്റ് ചരിത്രത്തിൽ ഏറ്റവും വേഗത്തിൽ 100 സിക്സറുകൾ തികയ്ക്കുന്ന താരമെന്ന ലോക റെക്കോർഡും പന്തിന് സ്വന്തമായി. ആദം ഗിൽക്രിസ്റ്റിന്റെ (100 സിക്സുകൾ) റെക്കോർഡിനൊപ്പമെത്തിയ പന്തിന് മുന്നിൽ ഇനി ബ്രെൻഡൻ മക്കല്ലവും (107) ബെൻ സ്റ്റോക്സും (138) മാത്രമാണുള്ളത്.
ടെസ്റ്റ് ക്രിക്കറ്റിൽ അഞ്ചാം നമ്പറിൽ ബാറ്റിംഗിനിറങ്ങി സ്ഥിരതയാർന്ന വെടിക്കെട്ട് പ്രകടനങ്ങളിലൂടെ ഇന്ത്യയുടെ വിശ്വസ്തനായി മാറിയ പന്ത്, ഒരിക്കൽക്കൂടി നിർണായക ഘട്ടത്തിൽ ഇന്ത്യയുടെ രക്ഷകനായി മാറുന്ന കാഴ്ചയ്ക്കാണ് കളിക്കളം സാക്ഷ്യം വഹിച്ചത്. പ്രതിരോധം തീർക്കുന്നതിന് പകരം എതിർ ബൗളർമാരെ കടന്നാക്രമിച്ച് റൺസ് വാരിക്കൂട്ടുന്ന പന്തിന്റെ തനത് ശൈലി വീണ്ടും ഇന്ത്യൻ ടീമിന് മത്സരത്തിൽ സമ്പൂർണ്ണ ആധിപത്യം സമ്മാനിച്ചിരിക്കുകയാണ്. ടെസ്റ്റ് ചരിത്രത്തിലെ തന്നെ ഏറ്റവും അപകടകാരിയായ ബാറ്റർമാരിൽ ഒരാളായി റിഷഭ് പന്ത് സ്വയം അടയാളപ്പെടുത്തുന്നതാണ് ഈ അപൂർവ്വ നേട്ടം.
നിലവിൽ 354 റൺസ് ഒന്നാം ഇന്നിംഗ്സ് ലീഡ് ഉള്ള ഇന്ത്യക്കായി 69 പന്തിൽ 66 റൺസ് എടുത്താണ് പന്ത് മടങ്ങിയത്..
