ആഗോള വിപണിയിൽ ഇന്ത്യൻ ഉൽപ്പന്നങ്ങളുടെ സ്വീകാര്യത വർദ്ധിപ്പിക്കുന്നതിനും രാജ്യാന്തര വിതരണ ശൃംഖലയിൽ കരുത്തുറ്റ പങ്കാളിയാകുന്നതിനുമായി ഇന്ത്യ കൂടുതൽ സ്വതന്ത്ര വ്യാപാര കരാറുകളിലേക്ക് (FTA) കടക്കുന്നു. ഏകദേശം 15 ട്രില്യൺ ഡോളർ ജിഡിപിയുള്ള 8 മുതൽ 9 വരെ പുതിയ രാജ്യങ്ങളുമായും രാജ്യങ്ങളുടെ കൂട്ടായ്മകളുമായും ചർച്ചകൾ പുരോഗമിക്കുകയാണെന്ന് ടോക്കിയോയിൽ ഇന്ത്യ-ജപ്പാൻ ബിസിനസ് പ്രതിനിധികളെ അഭിസംബോധന ചെയ്യവെ കേന്ദ്ര വാണിജ്യ വ്യവസായ മന്ത്രി പിയൂഷ് ഗോയൽ വ്യക്തമാക്കി. ഇതോടെ ലോക വ്യാപാരത്തിന്റെ 75 ശതമാനവും ഇന്ത്യയുടെ സ്വതന്ത്ര വ്യാപാര കരാറുകൾക്ക് കീഴിൽ വരുമെന്നാണ് കണക്കുകൂട്ടുന്നത്.
കഴിഞ്ഞ നാല് വർഷത്തിനിടെ 60 ട്രില്യൺ ഡോളർ സംയുക്ത ജിഡിപിയുള്ള 38 വികസിത രാജ്യങ്ങളുമായി ഒൻപത് വ്യാപാര കരാറുകളിൽ ഇന്ത്യ ഇതിനകം ഒപ്പുവെച്ചുകഴിഞ്ഞു. ജപ്പാൻ, ദക്ഷിണ കൊറിയ, ആസിയാൻ രാജ്യങ്ങൾ എന്നിവയുമായുള്ള മുൻകാല കരാറുകൾ വഴി 10 ട്രില്യൺ ഡോളറിന്റെ വിപണിയിലേക്ക് ഇന്ത്യ നേരത്തെ തന്നെ പ്രവേശനം നേടിയിരുന്നു.
ഇതോടെ നിലവിൽ 70 ട്രില്യൺ ഡോളറിന്റെ ആഗോള സമ്പദ്വ്യവസ്ഥയിലേക്ക് മുൻഗണനാടിസ്ഥാനത്തിൽ ഇന്ത്യൻ ഉൽപ്പന്നങ്ങൾക്ക് എത്തിച്ചേരാൻ സാധിക്കുന്നുണ്ടെന്ന് മന്ത്രി ചൂണ്ടിക്കാട്ടി. ഭൗമരാഷ്ട്രീയ സംഘർഷങ്ങളും താരിഫ് നിയന്ത്രണങ്ങളും ആഗോള സപ്ലൈ ചെയിനുകളിൽ മാറ്റങ്ങൾ വരുത്തുന്ന പശ്ചാത്തലത്തിൽ, കയറ്റുമതി വൈവിധ്യവത്കരിക്കാൻ ഇത്തരം കരാറുകൾ അത്യന്താപേക്ഷിതമാണ്.
ഇന്ത്യയും ജപ്പാനും തമ്മിലുള്ള ഉഭയകക്ഷി വ്യാപാരം കൂടുതൽ സന്തുലിതമാക്കുന്നതിനായി 200-ലധികം ഇന്ത്യൻ ബിസിനസ് പ്രതിനിധികളടങ്ങുന്ന സംഘത്തെ നയിച്ചാണ് കേന്ദ്രമന്ത്രി ജപ്പാനിലെത്തിയത്. ഡാറ്റാ സെന്ററുകൾ, നിർമ്മാണ മേഖല, ആർട്ടിഫിഷ്യൽ ഇന്റലിജൻസ് (AI) തുടങ്ങിയ പുത്തൻ മേഖലകളിൽ ജപ്പാൻ നിക്ഷേപകർക്ക് ഇന്ത്യയിൽ വൻ അവസരങ്ങളുണ്ടെന്ന് അദ്ദേഹം ഓർമ്മിപ്പിച്ചു. വിപുലമായ ആഭ്യന്തര വിപണിയും വിദേശ രാജ്യങ്ങളിലേക്കുള്ള എളുപ്പത്തിലുള്ള വ്യാപാര പ്രവേശനവും ഇന്ത്യയെ ലോകോത്തര നിക്ഷേപ കേന്ദ്രമാക്കി മാറ്റാൻ സഹായിക്കുമെന്നും കേന്ദ്ര സർക്കാർ വിലയിരുത്തുന്നു.
