കേന്ദ്ര ആഭ്യന്തര മന്ത്രി അമിത് ഷായ്‌ക്കെതിരെ മോശം പരാമർശങ്ങൾ നടത്തിയെന്നാരോപിച്ച് കോൺഗ്രസ് മാധ്യമവിഭാഗം തലവൻ പവൻ ഖേരയ്‌ക്കെതിരെ ബിജെപി പോലീസിൽ പരാതി നൽകി. ഷിംലയിൽ എഫ്ഐആർ രജിസ്റ്റർ ചെയ്ത് നിയമനടപടി സ്വീകരിക്കണമെന്ന് ആവശ്യപ്പെട്ട് ബിജെപി ചീഫ് വക്താവും എംഎൽഎയുമായ രാകേഷ് ജംവാളിന്റെ നേതൃത്വത്തിലുള്ള പ്രതിനിധി സംഘം ഷിംല എസ്പിക്ക് രേഖാമൂലം പരാതി സമർപ്പിച്ചു. അമിത് ഷായുടെ വ്യക്തിത്വത്തെയും നിലവാരത്തെയും ചോദ്യം ചെയ്യുന്ന വിധത്തിൽ തടിപ്പാർ, ഒളിച്ചോടിയവൻ, കുള്ളൻ തുടങ്ങിയ അധിക്ഷേപകരമായ വാക്കുകൾ ഖേര പരസ്യമായി ഉപയോഗിച്ചുവെന്നാണ് ബിജെപിയുടെ പ്രധാന ആരോപണം.
ജനാധിപത്യത്തിൽ രാഷ്ട്രീയ വിയോജിപ്പുകളും വിമർശനങ്ങളും സ്വാഭാവികമാണെങ്കിലും ഒരു കേന്ദ്ര ആഭ്യന്തര മന്ത്രിക്കെതിരെ ഇത്തരം നിലവാരമില്ലാത്ത ഭാഷ ഉപയോഗിക്കുന്നത് രാഷ്ട്രീയ മര്യാദകളുടെ എല്ലാ അതിർവരമ്പുകളും ലംഘിക്കുന്നതാണെന്ന് പരാതി നൽകിയ ശേഷം രാകേഷ് ജംവാൾ കുറ്റപ്പെടുത്തി. ഭാരതീയ ന്യായ സംഹിതയിലെ ബന്ധപ്പെട്ട വകുപ്പുകൾ ചുമത്തി കേസ് എടുക്കണമെന്നും ഇതിനാവശ്യമായ വീഡിയോ, ഓഡിയോ തെളിവുകളും സമൂഹമാധ്യമ പോസ്റ്റുകളും അന്വേഷണ സംഘത്തിന് കൈമാറുമെന്നും ബിജെപി അറിയിച്ചു.
പ്രസംഗത്തിന്റെ കൃത്യമായ പശ്ചാത്തലം പരിശോധിച്ച്, പരാമർശങ്ങൾ വ്യക്തമായ ക്രിമിനൽ കുറ്റത്തിന്റെ പരിധിയിൽ വരുന്നതാണെങ്കിൽ അടിയന്തരമായി എഫ്ഐആർ രജിസ്റ്റർ ചെയ്യണമെന്നും ബിജെപി നേതൃത്വം ആവശ്യപ്പെട്ടു.
