മുതിർന്ന കോൺഗ്രസ് നേതാവ് സോണിയാ ഗാന്ധിയുടെ ഏറെ പ്രതീക്ഷയോടെ കാത്തിരിക്കുന്ന ആത്മകഥയായ ‘ബിലോങ്ങിംഗ്: എ ജേർണി ഓഫ് ലവ് ഇൻ ഇന്ത്യ’ പ്രസിദ്ധീകരിക്കുന്നതിൽ നിന്ന് പ്രമുഖ പ്രസാധകരായ പെൻഗ്വിൻ റാൻഡം ഹൗസ് ഇന്ത്യ പിന്മാറി. പുസ്തകത്തിലെ ചില നിർണായക ഭാഗങ്ങളിൽ മാറ്റങ്ങളും വെട്ടിത്തിരുത്തലുകളും വരുത്തണമെന്ന് പ്രസാധകർ ആവശ്യപ്പെട്ടെങ്കിലും സോണിയാ ഗാന്ധി ഇതിന് തയ്യാറാകാത്തതിനെ തുടർന്നാണ് കരാർ റദ്ദാക്കിയത്. പെൻഗ്വിൻ പിന്മാറിയതോടെ പുസ്തകത്തിന്റെ പ്രസാധനാവകാശം ഏറ്റെടുക്കാൻ മറ്റ് പ്രമുഖ പ്രസാധകർ രംഗത്തെത്തിയിട്ടുണ്ട്
പ്രമുഖ പ്രസാധകരായ ഹാർപ്പർ കോളിൻസ് ഇന്ത്യയിൽ പുസ്തകം പ്രസിദ്ധീകരിച്ച് വിതരണം ചെയ്യാനുള്ള കരാറിലേക്ക് അടുക്കുന്നതായാണ് റിപ്പോർട്ടുകൾ. നവംബർ പത്തിന് അന്താരാഷ്ട്ര തലത്തിൽ പുറത്തിറക്കാൻ നിശ്ചയിച്ചിരുന്ന പുസ്തകത്തിന്റെ പ്രാരംഭ ഘട്ടത്തിൽ ഒരു ലക്ഷം കോപ്പികൾ അച്ചടിക്കാനായിരുന്നു പെൻഗ്വിന്റെ ഇംപ്രിന്റായ ആൽഫ്രഡ് എ. നോഫ് പദ്ധതിയിട്ടിരുന്നത്. രണ്ടാം ലോകമഹായുദ്ധാനന്തര ഇറ്റലിയിലെ ബാല്യകാലം മുതൽ രാജീവ് ഗാന്ധിയുമായുള്ള വിവാഹം, ഇന്ദിരാഗാന്ധി, സഞ്ജയ് ഗാന്ധി, രാജീവ് ഗാന്ധി എന്നിവരുടെ അപ്രതീക്ഷിത വിയോഗങ്ങൾ സൃഷ്ടിച്ച ആഘാതം, 2004-ൽ പ്രധാനമന്ത്രി പദം നിരസിച്ച നിർണായക തീരുമാനം വരെയുള്ള കാര്യങ്ങൾ ഉൾക്കൊള്ളുന്നതാണ് സോണിയയുടെ ഏറ്റവും വ്യക്തിപരമായ ഈ പുസ്തകം.
പതിറ്റാണ്ടുകളായി സൂക്ഷിച്ചിരുന്ന സ്വകാര്യതകൾ മാറ്റിവെച്ച്, തന്റെ കുടുംബത്തെക്കുറിച്ചും ആറ് പതിറ്റാണ്ടുകളായി താൻ കണ്ട രാഷ്ട്രീയ-സാമൂഹിക മാറ്റങ്ങളെക്കുറിച്ചും ഉള്ള തുറന്നെഴുത്താണ് ഈ ആത്മകഥയെന്ന് സോണിയാ ഗാന്ധി നേരത്തെ വ്യക്തമാക്കിയിരുന്നു.
