ഇസ്ലാമാബാദ്: 2021-ലെ ടി20 ലോകകപ്പിൽ ഇന്ത്യയ്ക്കെതിരെ നേടിയ വിജയമാണ് പാകിസ്താൻ ക്രിക്കറ്റിന്റെ തകർച്ചയ്ക്ക് തുടക്കം കുറിച്ചതെന്ന നിരീക്ഷണവുമായി മുൻ സൂപ്പർ താരം മുഹമ്മദ് യൂസഫ്. ദുബായിൽ നടന്ന ലോകകപ്പ് മത്സരത്തിൽ ഇന്ത്യയെ 10 വിക്കറ്റിന് പരാജയപ്പെടുത്തിയതിന് ശേഷം കളിക്കാരുടെ മനോഭാവത്തിൽ വന്ന മാറ്റങ്ങളും അഹങ്കാരവുമാണ് ടീമിന്റെ അധഃപതനത്തിന് വഴിവെച്ചതെന്ന് പാക് ചാനലായ സമ ടിവിയോട് (Samaa TV) സംസാരിക്കവെ അദ്ദേഹം തുറന്നടിച്ചു.
ലോകകപ്പ് വേദിയിൽ ഇന്ത്യക്കെതിരെ ആദ്യമായി നേടിയ ആ ജയത്തോടെ എല്ലാം കൈവരിച്ചെന്ന തെറ്റായ ചിന്തയിലേക്ക് കളിക്കാർ എത്തിപ്പെട്ടെന്ന് യൂസഫ് ആരോപിച്ചു. വിജയങ്ങൾ ഉണ്ടാകുമ്പോൾ വിനയം പുലർത്തുന്നതിന് പകരം കോളർ പൊക്കി നടക്കാനും അഹങ്കരിക്കാനും തുടങ്ങിയതോടെ പ്രശ്നങ്ങൾ ആരംഭിച്ചു. പാക് ക്രിക്കറ്റ് ടീമിൽ ഉത്തരവാദിത്തം ഏറ്റെടുത്ത് കളിക്കാൻ ആരും തയ്യാറായില്ല. പകരം ടീമിലെ എല്ലാവർക്കും ക്യാപ്റ്റൻ പദവി സ്വന്തമാക്കാനായിരുന്നു തിടുക്കം. വോൾഡ് ടെസ്റ്റ് ചാമ്പ്യൻഷിപ്പിൽ ആകെയുള്ള ഒൻപത് ടീമുകളിൽ ഒൻപതാം സ്ഥാനത്താണ് പാക്കിസ്ഥാൻ നിൽക്കുന്നത്. ഇത് രാജ്യാന്തര തലത്തിൽ പാക് ക്രിക്കറ്റിന്റെ പ്രതിച്ഛായയെ വല്ലാതെ ബാധിച്ചതായും അദ്ദേഹം ഓർമ്മിപ്പിച്ചു.
നിലവിൽ ഇംഗ്ലണ്ടിനെതിരെയുള്ള ടെസ്റ്റ് പരമ്പരയിൽ കനത്ത തോൽവികൾ ഏറ്റുവാങ്ങിയതിനെ തുടർന്ന് പരമ്പരയുടെ പകുതിവെച്ച് ഏഴ് പ്രമുഖ താരങ്ങളെയും കോച്ചുമാരെയും പാക്കിസ്ഥാൻ ക്രിക്കറ്റ് ബോർഡ് (PCB) നാട്ടിലേക്ക് തിരിച്ചയച്ചിരുന്നു. ബോർഡിന്റെ ഈ കടുത്ത നടപടിയെ മുഹമ്മദ് യൂസഫ് പിന്തുണച്ചു. കഴിഞ്ഞ നാലഞ്ച് വർഷങ്ങളായി ഏകദിന, ടി20 ലോകകപ്പുകളിലും ഏഷ്യാ കപ്പിലും ചാമ്പ്യൻസ് ട്രോഫിയിലുമെല്ലാം പാക്കിസ്ഥാൻ മോശം പ്രകടനമാണ് കാഴ്ചവെക്കുന്നത്. പരിശീലകരെയും ബോർഡ് ഭാരവാഹികളെയും എത്ര മാറ്റിയാലും കളിക്കാർക്ക് വീണ്ടുവിചാരം ഉണ്ടാകാത്തിടത്തോളം പാക് ക്രിക്കറ്റ് രക്ഷപ്പെടില്ലെന്ന് യൂസഫ് കൂട്ടിച്ചേർത്തു.
