‘സ്ത്രീകൾക്ക് മാത്രമല്ല, പുരുഷന്മാർക്കുമുണ്ട് ആർത്തവവിരാമം;ശരീരം തരുന്ന മുന്നറിയിപ്പുകൾ;എന്താണ് ആൻഡ്രോപോസ്?

നാൽപ്പതുകളോ അൻപതുകളോ പിന്നിട്ട ഒരു പുരുഷൻ സ്വന്തം ശരീരത്തിലേക്ക് നോക്കി അമ്പരക്കുന്ന ഒരു നിമിഷമുണ്ട്; ജിമ്മിൽ പോയി എത്ര വിയർപ്പൊഴുക്കിയാലും പഴയതുപോലെ മസിൽ രൂപപ്പെടുന്നില്ല, ഓഫീസിലെ ജോലി കഴിഞ്ഞ് വീട്ടിലെത്തിയാൽ കട്ടിലിലേക്ക് വീഴാൻ മാത്രമുള്ള വല്ലാത്തൊരു തളർച്ച, ചെറിയ കാര്യങ്ങൾക്ക് പോലും അകാരണമായി ദേഷ്യം വരുന്നു, പങ്കാളിയോടുള്ള ലൈംഗിക താല്പര്യം അറിയാതെ പടിയിറങ്ങിപ്പോകുന്നു. ‘വയസ്സ് നാല്പത്തഞ്ചായില്ലേ, അതിന്റെ ക്ഷീണമായിരിക്കും’ എന്ന് പറഞ്ഞ് സ്വയം സമാധാനിച്ച് ഭൂരിഭാഗം പുരുഷന്മാരും ഈ മാറ്റങ്ങളെ നിസ്സാരമായി തള്ളിക്കളയുകയാണ് പതിവ്. എന്നാൽ, പുരുഷശരീരത്തിൽ നിശബ്ദമായി സംഭവിക്കുന്ന വലിയൊരു ഹോർമോൺ വ്യതിയാനത്തിന്റെ മുന്നറിയിപ്പാണ് ഇതെന്ന സത്യം എത്രപേർ തിരിച്ചറിയുന്നുണ്ട്? സ്ത്രീകളിലെ ആർത്തവവിരാമം അഥവാ ‘മെനോപോസ്’ പോലെ പുരുഷന്മാർക്കും സംഭവിക്കുന്ന ഒന്നാണോ ഇത്?

‘മെയിൽ മെനോപോസ്’ അല്ലെങ്കിൽ ‘ആൻഡ്രോപോസ്’ (Andropause) എന്ന പേരിൽ പൊതുവെ അറിയപ്പെടുമ്പോഴും, ശാസ്ത്രീയമായി ഇത് സ്ത്രീകളിലെ മെനോപോസിന്റെ തുല്യമായ പതിപ്പല്ല എന്നതാണ് ഏറ്റവും പ്രധാനപ്പെട്ട മെഡിക്കൽ സത്യം. സ്ത്രീകളിൽ ഒരു പ്രത്യേക പ്രായമെത്തുമ്പോൾ അണ്ഡോത്പാദനം പൂർണ്ണമായി നിലയ്ക്കുകയും ഹോർമോൺ ഉത്പാദനം പെട്ടെന്ന് താഴേക്ക് വീഴുകയും ചെയ്യുന്നു. എന്നാൽ പുരുഷന്മാരിൽ ഒരു സുപ്രഭാതത്തിൽ ടെസ്റ്റോസ്റ്റിറോൺ നിർമ്മാണം പാടേ നിലച്ചുപോകുന്നില്ല. പകരം, മുപ്പതുകളുടെ അവസാനത്തോടെ ഓരോ വർഷവും വളരെ ചെറിയ ശതമാനമായി പതുക്കെ താഴേക്ക് പോവുകയാണ് ചെയ്യുന്നത്. അതുകൊണ്ടുതന്നെ മെഡിക്കൽ ലോകം ഇതിനെ ആൻഡ്രോപോസ് എന്നതിനേക്കാൾ ‘ഏജ് റിലേറ്റഡ് ലോ ടെസ്റ്റോസ്റ്റിറോൺ’ (Age-related Low Testosterone) അല്ലെങ്കിൽ ‘ലേറ്റ്-ഓൺസെറ്റ് ഹൈപ്പോഗൊണാഡിസം’ എന്നാണ് വിളിക്കുന്നത്.

ടെസ്റ്റോസ്റ്റിറോൺ എന്നത് കിടപ്പറയിലെ ലൈംഗികശേഷിയിൽ മാത്രം ഒതുങ്ങിനിൽക്കുന്ന ഒന്നല്ല; പുരുഷന്റെ മാംസപേശികളുടെ ബലം, അസ്ഥികളുടെ സാന്ദ്രത, രക്തത്തിലെ ചുവന്ന രക്താണുക്കളുടെ നിർമ്മാണം, ശരീരത്തിലെ കൊഴുപ്പിന്റെ വിതരണം, മാനസികമായ ഉന്മേഷവും ഊർജ്ജസ്വലതയും എന്നിവയെല്ലാം നിയന്ത്രിക്കുന്ന സുപ്രധാന ചാലകശക്തിയാണത്. ഈ ഹോർമോൺ അളവ് അസാധാരണമായി കുറയുമ്പോൾ ലൈംഗിക താല്പര്യക്കുറവും ഉദ്ധാരണപ്രശ്നങ്ങളും വരാം. എന്നാൽ ഉദ്ധാരണക്കുറവ് കാണുമ്പോൾത്തന്നെ അതൊരു ഹോർമോൺ തകരാറാണെന്ന് ഉറപ്പിക്കരുത്; ഹൃദയ-രക്തക്കുഴൽ രോഗങ്ങളുടെയും അനിയന്ത്രിതമായ പ്രമേഹത്തിന്റെയും ഉയർന്ന ബിപിയുടെയും ആദ്യ അപായസൂചന കൂടിയാകാം അത്.

ഹോർമോൺ കുറയുമ്പോൾ പേശികൾ ശുഷ്കിക്കുകയും അടിവയറ്റിൽ കൊഴുപ്പ് വന്ന് അടിയുകയും ചെയ്യുന്നു. കഠിനമായ ക്ഷീണം, കാര്യങ്ങളിൽ ശ്രദ്ധ കേന്ദ്രീകരിക്കാനുള്ള ബുദ്ധിമുട്ട്, ഉറക്കക്കുറവ്, അസ്ഥികൾ ദുർബലമാകുന്ന അവസ്ഥ (ഓസ്റ്റിയോപൊറോസിസ്), ചിലരിൽ രക്തക്കുറവ് അഥവാ അനീമിയ എന്നിവയും ഇതിന്റെ ഭാഗമായി കണ്ടുവരാറുണ്ട്. അമിതവണ്ണമുള്ളവരിലും, പ്രമേഹബാധിതരിലും, സ്ലീപ് അപ്നിയ ഉള്ളവരിലുമാണ് ഈ ഹോർമോൺ ഇടിവ് കൂടുതലായി പ്രകടമാകുന്നത്.

ഇന്റർനെറ്റിലെ വിവരങ്ങൾ വായിച്ച് സ്വയം ടെസ്റ്റോസ്റ്റിറോൺ സപ്ലിമെന്റുകളോ ഇഞ്ചക്ഷനുകളോ വാങ്ങി ഉപയോഗിക്കുന്നത് സ്വന്തം ജീവനെത്തന്നെ അപകടത്തിലാക്കുന്ന അബദ്ധമാണ്. ടെസ്റ്റോസ്റ്റിറോൺ റീപ്ലേസ്മെന്റ് തെറാപ്പി (TRT) എന്നത് വെറുമൊരു ബോഡിബിൽഡിംഗ് കുറുക്കുവഴിയോ എനർജി ബൂസ്റ്ററോ അല്ല. ഒരു ലളിതമായ രക്തപരിശോധന കൊണ്ടുമാത്രം ഇത് നിർണയിക്കാനുമാകില്ല; രാവിലെ കൃത്യസമയത്ത് എടുക്കുന്ന രക്തസാമ്പിളുകൾ ആവർത്തിച്ച് പരിശോധിച്ചും മറ്റ് രോഗാവസ്ഥകൾ തള്ളിക്കളഞ്ഞും മാത്രമേ ഡോക്ടർമാർ ഇത് സ്ഥിരീകരിക്കാറുള്ളൂ. വിശേഷിച്ച്, കുട്ടികൾ ഉണ്ടാകാൻ ആഗ്രഹിക്കുന്ന പുരുഷന്മാർ പുറത്തുനിന്ന് ടെസ്റ്റോസ്റ്റിറോൺ എടുത്താൽ അത് ബീജോത്പാദനത്തെ പൂർണ്ണമായി തകരാറിലാക്കും. പലരിലും കൃത്യമായ വ്യായാമത്തിലൂടെയും വണ്ണം കുറയ്ക്കുന്നതിലൂടെയും ഉറക്കം ശരിയാക്കുന്നതിലൂടെയും ഈ ഹോർമോൺ നില സ്വാഭാവികമായി മെച്ചപ്പെടുത്താൻ സാധിക്കും.

പ്രായം നാല്പതുകളിലേക്ക് കടക്കുമ്പോൾ ശരീരത്തിലും മനസ്സിലും അനുഭവപ്പെടുന്ന വല്ലാത്ത മാറ്റങ്ങളെ ‘പ്രായമായതിന്റെ ക്ഷീണം’ എന്ന് കരുതി അവഗണിക്കരുത്. ശരീരഭാരം, പ്രമേഹം, മാനസിക സമ്മർദ്ദം എന്നിവയെല്ലാം മാറ്റിവെച്ച്, നിങ്ങളിലെ ഊർജ്ജക്കുറവിനും അസ്വസ്ഥതകൾക്കും പിന്നിലെ യഥാർത്ഥ കാരണം ഒരു ഡോക്ടറുടെ സഹായത്തോടെ കൃത്യമായി തിരിച്ചറിയുകയാണ് ആദ്യ പടി.